Բրազիլիայում Ռուսաստանի հյուպատոսարանի մուտքի մոտ մարդու գանգ են թողել

Բրազիլիայի Սան Պաուլո քաղաքում գտնվող Ռուսաստանի հյուպատոսարանի աշխատակիցները շենքի մուտքի մոտ հայտնաբերել են մարդու գանգ: Այս մասին տեղի ոստիկանությունը հայտնել է բրազիլական «Folha de S. Paulo» թերթին:

Գանգը բավական հին է եղել, և դատելով դրա վրա առկա կեղտերից՝ այն դուրս է հանվել հողից: Գանգը փաթաթված է եղել կարմիր տոնական փաթեթավորմամբ: Համանման գանգեր են հայտնաբերվել Բրազիլիայում Չեխիայի, Հարավային Աֆրիկայի հյուպատոսարանների և մի քանի մորմոն-քրիստոնյաների տաճարների մուտքի մոտ:

Տեսախցիկներն արձանագրել են 30-40 տարեկան մի կնոջ, որի մասին հայտնում են միայն այն, որ նա երկար շրջազգեստով է եղել:

Տեղի ոստիկանությունը կարծում է, որ կինը փորձել է կախարդանքի արարողություն անցկացնել: Չնայած այն կարծիքին, որ գանգը փորվել հանվել է հողի տակից, ոստիկանությունը գերեզմանապղծության որևէ ահազանգ չի ստացել, ուստի հնարավոր է, որ գանգերը կինը ձեռք է բերել Սան Պաուլուի տարածքից դուրս: