Հեղինե Բիշարյանի շնորհավորական ուղերձը Կանանց տոնի առթիվ

«Սիրելի՛ կանայք,

Գարնանային այս գեղեցիկ ու լուսավոր օրերին մենք ոչ միայն շնորհավորում ու բարեմաղթանքի խոսքեր ենք հղում միմյանց, այլև բարձրաձայնում և լսելի ենք դարձնում այն բոլոր խնդիրներն ու մարտահրավերները, որոնք ծառացած են հայ կնոջ առջև:
Այո, որքան էլ մեզանում կնոջ դերը արժեվորվում է, այնուամենայնիվ, ժամանակը իր հետ բերում է խնդիրներ, որոնք անհապաղ լուծման կարիք ունեն:

Պետք է փաստեմ, որ «Օրինաց երկիր» կուսակցությունը մշտապես կանգնած է եղել հայ կնոջ կողքին իր խնդիրների հաղթահարման ճանապարհին:

Ավելի առարկայական լինելու համար նշեմ, որ դեռևս 2006 թվականին մեր կողմից նախաձեռնված կանանց և տղամարդկանց հավասար իրավունքների և հնարավորությունների մասին օրենքը, կառավարության հետ համատեղ նախագծի տեսքով մոտ ժամանակներս օրենքի ուժ կստանա: Օրենքը, հավոզված եմ, առանցքային նշանակություն կունենա հասարակական, քաղաքական կյանքում, պետական և այլ ոլորտներում կնոջ ներգրավումը խոչնդոտող արհեստական արգելքների վերացմանը:

Այսօր էլ, կնոջ հիմնախնդիրները լուծելու համար ակտիվ օրենսդրական աշխատանք ենք ծավալում: Մեր նախաձեռնությամբ արդեն շրջանառության մեջ է դրված նախագիծ, որով առաջարկում ենք երեխայի խնամքի 18 հազար դրամ նպաստ տրամադրել բոլոր մայրերին, անկախ նրանից, նրանք աշխատում են թե ոչ: Համոզված ենք կառավարության աջակցությամբ այն կարող է կյանքի կոչվել, թեկուզ փուլային տարբերակով' սկսելով ուսանող մայրերից:

Հաջորդ կարևոր նախաձեռնությունը մի քանի օր առաջ շրջանառության մեջ դրված Բազմազավակ ընտանիքների և բազմազավակ մայրերի պետական խրախուսման մասին օրենքի նախագիծն է, որի նպատակն է պետության կողմից սոցիալապես աջակցել և խրախուսել բազմազավակ ընտանիքներին և մայրերին: Մասնավորապես, նախագծով առաջարկվում է ամենամյա դրամական աջակցություն յուրաքանչյուր անչափահաս երեխայի համար, բազմազավակ ընտանիքների ջեռուցման, ջրամատակարարման, գազի, էլեկտրաէներգիայի, հեռախոսի, աղբահանության հարցերի լուծման համար տրամադրել օգնություն: Աջակցել, հատկապես, գյուղական բնակավայրերում բնակվող բազմազավակ ընտանիքներին' բնակարանային հարցերը լուծելու համար: Բոլորին է հայտնի, թե հայ ընտանիքներում որքան մեծ է կնոջ ծանրաբեռնվածությունը' հատկապես, երբ խոսքը գնում է բազմազավակ ընտանիքների մասին, ուստի թվարկածս խնդիրների լուծումը զգալիորեն կթեթևացնի նաև կնոջ հոգսերը և ծանրաբեռնվածությունը:

Սիրելի կանայք, առողջ եղեք:

Գարնան, գեղեցկության, սիրո այս հրաշալի տոների առթիվ շնորհավորում եմ ձեզ: Ցանկանում եմ, որ լինեք գարնան պես միշտ լուսավոր ու կենսատու, իսկ աշխարհի բոլոր ծաղիկները թող ժպտան ու բուրեն միայն ձեզ համար»:
Գրում է Հեղինե Բիշարյանը ֆեյսբուքյան իր էջում