Տարոն Մարգարյանը մասնակցել է «Հայուհի 2013» մրցանակաբաշխությանը

Երևանի քաղաքապետ Տարոն Մարգարյանը Արամ Խաչատրյան համերգասրահում մասնակցել է Համազգային վստահության խորհրդի կողմից կազմակերպված «Հայուհի 2013» մրցանակաբաշխությանը: Այս մասին հայտնում են Երևանի քաղաքապետարանի տեղեկատվության և հասարակայնության հետ կապերի վարչությունից։

Միջոցառման սկզբում, մրցանակաբաշխության կազմակերպիչների նախաձեռնությամբ, տեղի է ունեցել «Մեր օրերի հայ անվանի կանայք» գրքի շնորհանդեսը, որի առաջին օրինակները քաղաքապետ Տարոն Մարգարյանը հանդիսավորությամբ հանձնել է միջոցառմանը ներկա գրքում ներկայացված կանանց:

Շնորհավորելով մարտի 8-ի և տոնին համընկած շնորհանդեսի կապակցությամբ՝ քաղաքապետը, մասնավորապես, նշել է, որ կնոջ հանդեպ դրսևորած սերն ու հարգանքը մեր ազգային ընդգծված առանձնահատկություններից մեկն է:

«Գաղտնիք չէ, որ մեր ընտանիքներում մեծամասամբ հենց հայ կինն է իր ուսերին տանում մեր երեխաների դաստիարակության ու կրթության պատասխանատու բեռը: Նաև այս տեսանկյունից է շատ ողջունելի հայ կանանց նվիրված գրքի ստեղծման գաղափարը: Առիթից օգտվելով՝ նաև սրտանց շնորհավորում եմ մեր սիրելի մայրերին, կանանց ու քույրերին՝ իրենց գեղեցիկ տոնի առիթով: Շնորհակալ ենք, որ դուք կաք, մեր կողքին եք: Առողջ եղեք, ու թող երջանկությունն ու հաջողություններն անպակաս լինեն ձեր օջախներից»,- ընդգծել է Տարոն Մարգարյանը:

Միջոցառումն ուղեկցվել է «Սիրո և գեղեցկության գարնանային գույներ» խորագրով համերգային ծրագրով:

«Սոցիոմետր» անկախ սոցիոլոգիական կենտրոնի տնօրեն Ահարոն Ադիբեկյանը Երևանի քաղաքապետ Տարոն Մարգարյանին է փոխանցել դեռևս նախորդ տարեվերջին անցկացված հատուկ սոցիոլոգիական հարցումների տվյալների համաձայն վերջին 20 տարիների Երևանի լավագույն քաղաքապետ ճանաչվելու մասին վկայագիրը: