Դիզայներ Նուռ. Ես օծանելիքը պատրաստում եմ զարդի մեջ

Դիզայներ Նուռը, ով հայտնի է իր յուրօրինակ զարդերով, այժմ նաև թողարկում է օծանելիք: Այս մասին ավելի մանրամասն ArmStar.am–ը զրուցեց հենց դիզայների հետ:

-Նո՛ւռ, ամիսներ առաջ խոսվում էր այն մասին, որ պատրաստվում եք օծանելիք թողարկել, ու այն, ինչպես Ձեր պատրաստած զարդերը, իրենց երկրորդ օրինակը չէին ունենալու: Պատվիրատուի բույրից երկրորդը չէր ստեղծվելու: Արդարացա՞ն ձեր սպասելիքները:

-Այո՛, իրականացել են սպասելիքներս, ու շարունակվում են իրականանալ:

-Գիտեմ նաև, որ օծանելիքը պատրատվելու էր միայն մի տարբերակով. նախապես Դուք պետք է շփվեք պատվիրատուի հետ, ապա, հասկանալով նրա էությունը՝ ստեղծեք բույրը: Հենց այդ սկզբունքով ե՞ք աշխատում:

-Այո: Առհասարակ իմ բոլոր նախագծերը, ինչպես նախապես պլանավորվում են, այդպես էլ իրականանում են, եթե չեն զարգանում ավելի, ապա փոփոխության հաստատ չեն ենթարկվում:

-Իսկ օծանելիքի պատվիրատուները հիմնականում այն մարդիկ են, ովքեր նաև Ձեզնից զարդե՞ր են պատվիրել: Այսինքն Ձեր հաճախորդնե՞րն են:

-Գիտեք, ես հիմնականում չեմ ունենում մշտական հաճախորդներ: Քանի որ թե՛ զարդը, թե՛ օծանելիքը նույն օրինակից երկրորդը չի ունենում: Այն բնորոշում է հենց տվյալ անհատին, ուստի երկրորդը չի կարող գոյություն ունենալ: Մարդու ներքին աշխարհը մեկն է: Ու ամենաշատն այն կարող է ունենալ երեք արտահայտման ձև, ոչ ավելին:
Այնպես որ, մշտական հաճախորդներ, այս դեպքում, չեն լինում, թեև բացառություններ հանդիպում են:

-Նուռ, Իսկապե՞ս կարծում եք, որ օծանելիքը կարող է խոսել մարդու էության, ներաշխարհի մասին:

-Պետք չէ մոռանալ, որ մարդը կենդանի է, ու կան կենդանական բնազդներ, որոնք շատ խորը թաքնված են մարդու մեջ, ու ենթագիտակցորեն մարդը մյուս մարդուն ընկալում է ըստ հոտի: Եվ հիմա էլ է այդպես, ուղղակի մենք չենք հասցնում դա գիտակցել:

-Պետք է, որ բավականին բարդ աշխատանք լինի…

-Շատ պատասխանատու, ու բարդ աշխատանք է: Վտանգավոր է նաև, քանի որ գուցե չկարողանաս հասկանալ, թե այդ մարդուն բնորոշող իրական բույրը որն է:
Ու այդ ստեղծված բույրի հիմնական առիթը լինում է հենց տվյալ մարդու իսկական բույրը: Հենց նրա բույրի հիման վրա ստեղծում եմ իր օծանելիքը:

-Հետաքրքիր է, Դուք ինչ բույրեր եք նախընտրում և արդյո՞ք օգտվում եք միայն Ձեր պատրաստած օծանելիքից, թե՞…

-Անշուշտ: Ի դեպ ես վաղուց եմ օգտվում հենց իմ պատրաստած օծանելիքից: Արդեն բավականին ժամանակ է, որ չեմ գնում խանութներում վաճառվող քիմիական նյութերից պատրաստված օծանելիքներ: Յուրաքանչյուր ոք, ով օգտագործում է բնական բույրով օծանելիք, նա այլևս չի կարողանա օգտվել խանութում վաճառվողներից:

-Ավելի լավ «ճանաչելով» օծանելիքի ուժը, ունե՞ք այն օգտագործելու Ձեր տարբերակները:

-Ես օծանելիքը պատրաստում եմ զարդի մեջ: Օծանելիքը լցվում է այնտեղ և մարդն այն կրելով, կարիք չի ունենում օծել իր հագուստի վրա: Իմ պատրաստած օծանելիքի մեկ կաթիլը բուրում է մոտավորապես 6 ամիս:

-Իսկ տարբերություն կա՞ տղամարդու և կնոջ բույրերի միջև:

-Իհակե, այդ բույրերն այնքան տարբեր են, որքան կինն ու տղամարդը:

-Ու, ո՞ր սեռի դեպքում է ավելի հեշտ ստեղծագործելը:

-Այս դեպքում հեշտի ու դժվարի խնդիր չկա, ուղակի կան բարդ ու ավելի հեշտ մարդիկ, դրանից էլ կախված է իմ աշխատանքի հեշտ ու դժվար լինելը:

-Շուտով կանանց տոներն են. ըստ Ձեզ, օծանելիքը ճի՞շտ է դասել նվերների շարքում:

-Օծանելիքը համարում եմ լավ նվեր, այն իսկապես կուրախացնի հակառակ սեռին: Ու այնպես չէ, որ բոլորին կոչ եմ անում գնել բնական բույրեր, քանի որ դա մեծ հաշվով մատչելի չէ: Այն նաև պահանջում է ժամանակ, մոտեցում: Ես միայն կարող եմ կոչ անել, որպեսզի առհասարակ նախընտրեն բնական նյութերը:

Որովհետև ամեն կին կարող է բուրել ուղակի մի փունջ ուրցով, որ կհավաքի սարից, կտրորի ձեռք մեջ և կքսի իր վրա: Դա շատ ավելի հաճելի կլինի:

-Այսինքն օծանելիքը Դուք չե՞ք համարում ինտիմ նվեր:

-Չէ՛: Թեև նվերի պարագայում միշտ պետք է ընտրության տարբերակ թողնել, կամ նվերը գնել այնպիսի խանութից, որտեղ կգործի այն փոխելու տարբերակը, ինչը մեր երկրում հազվադեպ է հանդիպում: