Անանասի սցենարն աշխատեց

Երևանի ավագանու ընտրությունների շունչն այսօր էլ արդեն իրեն զգացնել է տալիս, չնայած որ դրան դեռ գրեթե երկու ամիս կա:

Օր օրի ավելի ու ավելի հետաքրքրքական են դառնում Հայաստանում ծավալվող ներքաղաքական զարգացումները՝ ի ցույց դնելով ընչաքաղցության գերբարձր մակարդակը: Այսպես, այն բանից հետո, երբ ԲՀԿ-ն արտահերթ խորհրդարանական նիստ հրավիրեց, որն էլ իր հերթին վարում էր Գագիկ Ծառուկյանը, պարզվեց ավագանու ընտրություններում ԲՀԿ մասնակցության ձևաչափը՝ ԲՀԿ-ն մասնակցում է Երևանի ավագանու ընտրություններին առանձին և դիտարկում է միասնական մասնակցության տարբերակը միայն իր առանցքի շուրջ, իսկ ցուցակն էլ գլխավորելու է, դժվար չէ գուշակել, Վարդան Օսկանյանը՝ միակ համապատասխան թեկնածուն ամբողջ ԲՀԿ-ում: Ու հետաքրքիրն այն է, որ դեռևս նախագահական ընտրությունների նախընտրական պրոցեսների ժամանակ Վարդան Օսկանյանի դեմ «Молчание ягнят» հեռուստասերիալի մոտիվներով հետապնդումն ի չիք է եղել:

Ստացվում է, որ Գագիկ Ծառուկյանը, որքան էլ խորթ չհնչի, վերցնում է չգրված օրենքով իրեն հասանելիք բաժինը, որը, հավատացե՛ք, բավականին խոստումնալից հիմք կարող է հանդիսանալ առաջիկա տարիների ընթացքում: Խոսքը նախագահական ընտրությունների, ավելի կոնկրետ՝ փետրվարի 18-ի թեկնածուների ցուցակից Գագիկ Ծառուկյանի անվան բացակայության մասին է, որն այժմ, ըստ երևույթին, վերաձևափոխվել է ավագանու ընտրություններում հաղթանակի: Ինչպես նշում է Նաիրա Զոհրաբյանը, ԲՀԿ-ի նշաձողը հաղթանակն է։ Այո, հենց այդպես էլ գրված է սցենարում, որի վրա բազմաթիվ պրիմիտիվ ուղեղներ են աշխատել։ Սակայն այստեղ հարց է առաջանում՝ ինչո՞ւ ձեր նշաձողը նախագահական ընտրություններին եղավ անտարբերությունը, բացակայությունը… ինչևէ: Հենց այդ նույն սցենարով էլ առաջնորդվում է ՀՀԿ-ն՝ նորից թույլ տալով Տարոն Մարգարյանին գլխավորել ավագանու ցուցակը, հաղթահարելի դառնալով ավագանու ընտրություններում:

Այդ պարագայում ինչո՞վ էր պայմանավորված Գագիկ Ծառուկյան-Րաֆֆի Հովհաննիսյան հանդիպումը. ամենաիրական տարբերակը, այնուամենայնիվ, մնում է մեկը՝ Րաֆֆի Հովհաննիսյանը դիմել էր հանդիպելու խնդրանքով կամ առաջարկով, որին ի պատասխան՝ Գագիկ Ծառուկյանը համաձայնել էր՝ ընդամենը ցուցաբերելով իր մեծահոգությունն ու ժողովրդի կողքին լինելու պատրանքի թևով ցանկությունը:
Հանդիպման ընթացքում ամենահավանական հիմնական թեման, որ կարող էր քննարկվել, ավագանու ընտրություններին մասնակցության ձևաչափն էր։ Դժվար թե Րաֆֆի Հովհաննիսյանը մի ամբողջ երեք ժամ անանասի լուռ ներկայությամբ Գագիկ Ծառուկյանին համոզեր գալ Ազատության հրապարակ կամ իր հանրահավաքներին:

Առաջարկ, որն այդ  հանդիպման ժամանակ արել էր Րաֆֆի Հովհաննիսյանը, ուղղակիորեն, ինչպես Սերժ Սարգսյանի դեպքում, այնպես էլ այս դեպքում, ամենայն հավանականությամբ, մերժվել էր, ԲՀԿ-ն դիտարկում է միայն սեփական առանցքի շուրջ միավորվելու տարբերակը, չէ՞ որ դա վաղուց արդեն մշակված տարբերակն էր: Այդ իսկ պատճառով էլ դեռևս անորոշություն է տիրում «Ժառանգություն»-ում. նրանք դեռ չեն քննարկել ավագանու ընտրություններին իրենց մասնակցության հարցը, և այլն: Այս պարագայում պարզ է, որ Րաֆֆի Հովհաննիսյանն էլ է գիտակցում, որ նախագահական ընտրություններում իրեն բաժին հասած ձայների առյուծի բաժինն ըննդեմ գործող ռեժիմի էր, իսկ դրանց մի մասն իր հերթին հօգուտ Գագիկ Ծառուկյանի էր:

Եվ այսօր ստեղծված, հիմնականում լատինամերիկյան սերիալների սցենարներին բնորոշ բավական սրտաճմլիկ իրականությունում, ամեն մեկը փորձում է իր փայն ունենալ իբր փայատյաց այս երկրում, որտեղ ժողովուրդն ազատություն է տենչում, իսկ իշխանություններն էլ իրենց պարտքերն են վերադարձնում, իսկ ժողովրդի անունից հանդես եկողներն էլ իբր պատահականորեն վերցնում են իրենց հասանելիքն ու լռում, արդյունքում տուժում է, ցավոք սրտի, միայն ժողովուրդը:

Գևորգ Ավետիսյան