Տոնական բազմազանություն. իրենց տարբերակներն են առաջարկում հայ երգիչները

Գարունն ինքնին կարծես տոն լինի, ինչը լրացնում է նաև կանանց մեկամսյակը: Իսկ թե ինչպես ուրախանալ ու առանձնահատուկ դարձնել սիրելիի տոնը, կօգնի մեր անդրադարձը: Հայտնիներն այս անգամ իրենք են առաջարկում տոնն անցկացնելու իրենց տարբերակը` ելնելով իրենց անհատականությունից, իսկ քեզ մնում է միայն տոնն իսկապես ուրախության վերածել, չընկնել խորոված-քյաբաբի հետևից ու մի լավ «տժաաաաալ»: Կարդա ու ընտրիր տոնի քո տարբերակը…Իսկ ես գնացի տոնելու:

Խենթ տարբերակ` Ջուսից

- Խենթ ու զվարթ խորհուրդներ նրանց համար, ովքեր ցանկանում են արտասովոր ու անմոռանալի կերպով անցկացնել գարնան առաջիկա տոները' սկսած մարտի 8-ից: Կարելի է ընկերներով մեկնել Ծաղկաձոր և բնության գրկում մի լավ փարթի կազմակերպել: Այնուհետև խարույկ վառել, սիրած էակի հետ ստել կրակի շուրջ, խաղեր խաղալ: Իսկ ապրիլի 1-ին կանանց խորհուրդ կտամ զգոն լինել: Խաբելու օրը կարելի է կեղծ հարսանիք կազմակերպել և ընկերներին հրավիրել, իսկ որպես փեսացու` ընտրել, ասենք, մոտ 65-ամյա մեկին: Մինչ բոլորը շոկի մեջ կլինեն, դուք նրանց այլ սենյակ կամ սրահ կհրավիրեք` մի լավ ուրախանալու, իսկ այդ ապրիլի 1-ը ոչ ոք չի մոռանա:

«Ազատ» տարբերակ` Աստղիկ Սաֆարյանից

- Ես միշտ փորձում եմ ցանկացած տոն անմոռանալի դարձնել, իսկ մարտի 8-ին առաջինը շնորհավորում եմ մայրիկիս, ապա քույրերիս, ընկերուհիներիս: Սիրում եմ նվերներ տալ ու դեմ չեմ, երբ ինձ ևս նվիրեն: Ազատություն սիրողներին կարող եմ հուշել, որ կիթառ վերցնեն ու քաղաքից դուրս մեկնեն, նստեն մի հովտում ու զեփյուռի օրորի հետ վայելեն «ազատության շունչը»: Հարկավոր է լավ տրամադրվել բոլոր տոներին, հետաքրքիր անակնկալներ պատրաստել մտերիմների համար: Մեջբերեմ նաև Ռազմիկ Դավոյանի խոսքերը. «Եկեք կյանք դարձնենք կյանքն աղավաղված»:

Թիթիզ տարբերակ Սյուզի Մելիքյանից

- Ես նախընտրում եմ տոներն անցկացնել ծնողներիս կամ մտերիմներիս հետ, ինչն էլ առաջարկում եմ նաև մյուսներին: Տոնախմբության սիրահարներին առաջարկում եմ օրիգինալ մի տարբերակ մտածել և իրագործել. ասենք` գնալ Սևան կամ մեկ այլ լիճ, փոքրիկ քաղաք,գտնել ապակեպատ առանձնատուն, որից բնության կամ ծովակի հրաշալի տեսարան կբացվի և երաժշտության ներքո ամբողջացնել օրը: Կարծում եմ, սենյակը զարդարելու համար կարելի է գնել փուչիկներ, սմայլիկներ` լավ ու թիթիզ ձևավորմամբ, բայց տոնն անցկացնել առանց ճոխ սեղանի:

Ռոմանտիկ տարբերակ` Արամեից

- Ես տոնն իսկապես լավ և անմոռանալի անցկացնելու կողմնակից եմ: Նախընտրում եմ միշտ ընկերներով լավ ուրախանալը: Տոնը ռոմանտիկ դարձնելու համար կարելի է անգամ տեղում մի բան հորինել: Երբ խոսքը վերաբերում է ռոմանտիկային, երրորդն ավելորդ է: Կառաջարկեմ ընտրել մի փոքրիկ ուգողտրիկ վայր` առանձնատուն կամ բացօթյա` քաղաքից դուրս, որտեղ հնարավոր լինի խարույկ վառել, կամ եթե առանձնատանը որոշեն անցկացնել` անպայման սեղանին լինի մեկ շիշ գինի, զույգ մոմեր, ծաղիկներ և այնպիսի ուտեստ, որը հետո չի խանգարի զույգի անմոռանալի համբույրի շարունակությանն ու միմյանց վայելելուն...

Ոչ ծախսատար տարբերակ` Էրիկից

- Ես տոներին, իհարկե, նախընտրում եմ «խելահեղություններ» անելը ու որպեսզի այն թե անմոռանալի լինի և թե մատչելի, կառաջարկեմ տոնն անցկացնել, չզարմանաք, շենքի տանիքին: Այստեղ ձեզանից գումար չեն պահանջի, պետք է միայն զգույշ լինել տանիքը չվնասելու համար :), ինչպես նաև հնարավոր կլինի անգամ ընկերներով լուսանկարվել քաղաքի համայնապատկերի ֆոնին: Տոնն ամբողջացնելու համար կարելի է նաև թույլ ալկոհոլային խմիչք վերցնել, միրգ, խմորեղեն և` այդքանը...

Պարզ տարբերակ` Սիլվա Հակոբյանից

- Պետք է խոստովանեմ, որ ինձ համար շատ կարևոր է, որ տոնը հիշարժան լինի: Սիրում եմ, երբ կողքիս են հարազատներս ու մտերիմ ընկերներս: Սիրում եմ քեֆ անել, ուրախանալ, մասնակցել հարազատների խնջույքներին: Պարտադիր չէ, որ տոներին ճոխ սեղաններ և ախորժաբեր ուտեստներ լինեն: Հասակակիցներիս խորհուրդ կտամ գնել հյութեր, քացրավենիք ու գնալ այգի, նստել, հաճելի ժամանակ անցկացնել օրն անմոռանալի դարձնելու` ձերը դարձնելու համար:

Կարևոր է չմոռանալ նաև տեսախցիկի, եթե այն ունեք, ու լուսանկարչական ապարատի մասին. մի մոռացեք անմահացնել հաջողված դրվագները:

«Ե՞ս Yes!» ամսագիր, արխիվ