Եկեղեցին խուսափում է անդրադառնալ իր հասցեին հնչող քննադատություններին

Երևանի Ազատության հրապարակում երեկ հրավիրած հանրահավաքից հետո Րաֆֆի Հովհաննիսյանը հայտարարեց հացադուլ սկսելու մասին՝ նշելով, որ քանի դեռ Սերժ Սարգսյանն ինքնաբացարկ չի հայտնել, մնալու է Ազատության հրապարակում:

Նա քննադատություն ուղղեց նաև Ամենայն հայոց կաթողիկոս Գարեգին Բ-ի հասցեին՝ անընդունելի համարելով եկեղեցու սերտաճումը քաղաքականությանը:

«Եթե Սերժ Սարգսյանն ինքնաբացարկ չարեց, ես մի խնդրանք ունեմ՝ թող Վեհափառ Հայրապետն ասի նրան, որ եկեղեցին անջատ է պետությունից, ոչ թե գործիք է իշխանության ձեռքին, իսկ Սերժ Սարգսյանն էլ թող ասի Վեհափառին, որ տաճարում պետք չկա խմելու որևէ մեկի, անգամ նախագահի կենացը: Հայրապե՛տ, Դուք էլ ինձ համար աղոթեցե՛ք, այնպես, ինչպես ես Ձեզ համար: Աստված բոլորիս տա սեր և մարդկայնություն»,- ասաց Րաֆֆի Հովհաննիսյանը:

Ավելի ուշ ֆեյսբուք սոցցանցում բուռն քննարկում սկսվեց: Հնչեցին մեղադրանքներ Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի հասցեին առ այն, որ երկրի համար կարևոր այս օրերին վերջինս լռում է:

Լուրեր.com-ն այս ամենի մասին փորձեց մեկնաբանություն ստանալ Մայր Աթոռ Ս. Էջմիածնի տեղեկատվական համակարգի տնօրեն Տ. Վահրամ քահանա Մելիքյանից:

Վերջինս հրաժարվեց մեկնաբանություններ տալ և ասաց. «Ես այս պահին որևէ մեկնաբանություն այդ առնչությամբ անել չեմ կարող: Զանգահարե՛ք մի փոքր ավելի ուշ»:

Ավելի ուշ Լուրեր.com-ը կրկին փորձեց կապ հաստատել վերջինիս հետ, սակայն մեր բազմաթիվ զանգերն այդպես էլ մնացին անպատասխան, իսկ ավելի ուշ վերջինս պարզապես անջատեց հեռախոսը:

Հ.Գ. Դեռ հին ժամանականերից եկեղեցին միշտ հանդիսացել է հայ ժողովրդին համախմբող կառույց և ունեցել է կարևոր դերակատարություն Հայաստանի ներսում ծավալվող իրադարձություններում:

Մեզ համար անհասկանալի է, թե ինչու է եկեղեցին այսօր խուսափում անդրադառնալ իր հասցեին հնչող քննադատություններին, և ինչու է խուսափում հաղորդակցվել զանգվածային լրատվամիջոցի ներկայացուցիչների հետ: