Նստացույց ԵՊՀ-ի դիմաց. դասադուլավորների կրքերը չեն մարում (տեսանյութ)

Այսօր՝ մարտի 11-ին, դասադուլի մասնակից ուսանողները նստացույց էին կազմակերպել ԵՊՀ կենտրոնական մասնաշենքի դիմաց: Նստացույցը մեկնարկել էր ժամը 11:00-ին և շարունակվեց մինչև 15:00: Ուսանողների ձեռքին կային «30 արծա՞թ, թե՞ հայրենիք», «Մի՛ ոտնահարեք մեր իրավունքները», «Դուք գցում եք մայր բուհի պատիվը» և այլ գրություններով պաստառներ: 

Նստացույցի մասնակից ուսանողներից մեկը Lurer.com-ի թղթակցի հետ զրույցում ասաց, որ դասադուլը լինելու է հերթափոխով, այն չի արվելու ակցիայի մասնակիցների դասերի հաշվին:

«Մենք նստացույց ենք կազմակերպել, որպեսզի պահանջենք Գևորգ Մելքոնյանի հրաժարականը ոչ պատշաճ վարվելակերպի համար: Նա չի համապատասխանում իր զբաղեցրած պաշտոնին: Մենք ամեն գնով հասնելու ենք մեր ուզածին, մենք չենք կոտրվելու, մենք պայքարելու ենք»,-ասաց ԵՊՀ կենսաբանական ֆակուլտետի առաջին կուրսի ուսանող Մայլյան Տաթևիկը:

Լրագրողի հարցին, թե այս անգամ Գևորգ Մելքոնյանը զորք չի բերել, վերջինս պատասխանեց, որ այս անգամ ինքը նման բան չի նկատել։