Նինո Քաթամաձեի երեւանյան 2 համերգն ու «խուլիգան» խոսքերը

Երեւանյան հանդիսատեսին նոր երգեր մատուցելու ցանկությունն ու հայ ընկերների հանդեպ մեծ սերն էթնո-ջազ երգչուհի Նինո Քաթամաձեին կրկին բերել էին մեր մայրաքաղաք: Վրացուհին մարտի 9-ին ու 10-ին «Yans» ակումբում մենահամերգներ է ունեցել իր «Insight» բենդի հետ ու կատարել նոր՝ «Green» ալբոմի, ինչպես նաեւ իր հին ու սիրված ջազ գործերը: BRAVO.am-ը ներկա է եղել առաջին օրվա մենահամերգին, երբ երգչուհուն անակնկալ են մատուցել համերգի կազմակերպիչները:

Ողջունելով ակումբում հավաքվածներին՝ Քաթամաձեն իր երաժիշտ ընկերոջը՝ Վազգեն Ասատրյանին, շնորհակալություն հայտնեց համերգային հրավերի համար. «Երեւանն ընկերներիս համար եմ սիրում: Երբ պետք է Երեւան գամ, միշտ հարցնում եմ, Վահագուշկան այնտե՞ղ է լինելու:): Շատ եմ սիրում, որ միասին իմպրովիզներ ենք անում», - ասաց երգչուհին ու կատարեց ջազմեն Վահագն Հայրապետյանին նվիրված նոր երգը: Մոտ երկու ժամ տեւողությամբ համերգային երեկոյի ընթացքում նա մի քանի անգամ բեմ հրավիրեց Երեւանի գլխավոր «Կատվին», որը ոչ միայն նվագում էր, այլեւ ձայնակցում ու իմպրովիզներ էր անում վրաց երաժիշտների հետ:

Նինոն իրեն բնորոշ անմիջականությամբ շփվում էր ներկաների հետ, երբեմն բեմից իջնում ու քայլում էր սրահում, գրեթե ամեն երգից հետո կրկնում էր «ցավդ տանեմ» արտահայտությունն ու օդային համբույրներ էր հղում հանդիսատեսին: Ներկաներն էլ երբեմն ձայնակցում էին նրան, հատկապես «Օլեյ» երգի ժամանակ դահլիճը երգչուհու հետ միաձայն երգում էր:

Հանդիսատեսի շարքերում նստած երգիչ Մհերը գրավել էր Քաթամաձեի ուշադրությունը. նրանք միասին հանպատրաստից երգեցին, որից հետո նա Մհերին կրկին հրավիրեց բեմ՝ ձայնակցելու իրեն: Երգչուհու համար անակնկալ էին պատրաստել համերգի կազմակերպիչները. նրա հետ ելույթ ունեցան երիտասարդ ջազ երգչուհի Մարինա Հակոբյանն ու շրթհարմոնահար Արտակ Ներսիսյանը կամ ինչպես նրան հաճախ անվանում են՝ «Mr. Harmonica»-ն:

Նինոն նաեւ մարտի 8-ի առթիվ շնորհավորեց կանանց՝ ավելացնելով. «Եթե կանայք մայր են, ապա տղամարդիկ լավ են աշխատում: Կներեք “խուլիգան” խոսքերիս համար:): Ուզում եմ, որ Աստծուց տրված ամեն րոպեն գնահատենք եւ ուրախ ապրենք»:

40-ամյա վրացուհին ոչ միայն երգում, այլեւ բենդի հետ հարվածային ու ստեղնաշարային գործիքներ է նվագում: Տասը տարուց ավելի նա համերգներ է տալիս «Insight» խմբի կիթառահար Գոչա Կաչեիշվիլիի, բաս-կիթառահար Ուչա Գուգունավայի եւ հարվածային գործիքներ նվագող Դավիդ Աբուլաձեի հետ: Մեներգչուհին կատակելով նշեց, որ թեեւ սկզբում տղամարդկանց հետ դժվար էր, բայց որպես կին ավելի է արժեւորվել. «Ինձ համար կարեւոր է, որ հարազատ մարդկանցով եմ շրջապատված: Միմյանց շատ լավ ենք ճանաչում, մենք ոչ թե պարզապես համագործակցում, այլ միասին ապրում ենք»: Խմբի հիմնադիր-անդամ Գոչա Գաչեիշվիլին էլ հաստատեց նրա խոսքերն ու հավելեց, որ հոգեւոր կապվածությունն ու մտերմությունը թիմում շատ ուժեղ է:

Քաթամաձեն նաեւ հանդիպում է ունեցել լրագրողների հետ եւ պատմել, որ իրեն հատկապես դուր է եկել մենահամերգի եզրափակիչ հատվածը. «Երբ Վազգենը սոլո-կիթառ էր նվագում, Վահագնը՝ ձայնակցում, երիտասարդ երաժիշտներն ինձ հետ միասին բեմում էին, շատ էի զարմացել, նույնիսկ ուզում էի արտասվել»:

Երգչուհու համոզմամբ՝ ջազը երաժշտական ժանր է, որը տալիս է բոլոր հարցերի պատասխանները: Նա երգում է աշխարհի տարբեր ջազային դահլիճներում, ակումբներում, բաց բեմերում, նշում է՝ երբեւէ չի երգի եկեղեցում. «Եկեղեցում նույնիսկ ստորագրություն չեմ տալիս: Այնտեղ հիանալի երգչախումբ է երգում, ես ինձ թույլ չեմ տա երգել, իմ կողմից էգոիզմ կլինի»:

Քանի որ իր ձայնասկավառակներն ունեն գունային անուններ՝ “Սպիտակ”, “Սեւ”, “Կապույտ”, “Կարմիր”, "Կանաչ", Նինոն մտածում է՝ գույներից հետո կանցնի բնական երեւույթներին՝ քամի, կրակ եւ այլն, իսկ ինքն իրեն ասոցիացնում է սպիտակ գույնի ու քամու հետ:

Տարվա ընթացքում երգչուհին ընդամենը մեկ-երկու ամիս է տանը լինում, ասում է՝ շրջագայության մեկնելիս միշտ նույն ճանապարհով է անցնում. «Երբեմն էական տարբերություն չկա, թե որ երկրում եմ գտնվում՝ Նյու-Յորքում, Փարիզում, թե մեկ այլ քաղաքում: Ինքնաթիռից իջնելով՝ նստում եմ ավտոմեքենա, գնում հյուրանոց, հետո՝ համերգի վայրը, քանի որ ինձ համար առաջնայինը իմ ելույթի որակական մասն է»:

Նինո Քաթամաձեն համոզված է՝ երեւանցիները սիրում ու ընկալում են ջազը: Նա մեր մայրաքաղաքում համերգ է ունեցել նաեւ 2008 թվականին տեղի ունեցած «Հայկական ջազ 70» նախագծի շրջանակում եւ 2011-ի մարտին: