«Ազգ». «Հրկիզումների հեղափոխությունը» հասել է Նախիջևա՞ն

Ադրբեջանում սոցիալական դժգոհության ամենատարածված ձևը իշխող վարչախմբի ներկայացուցիչների առանձնատների հրկիզումն է, որ սկիզբ է առել անցյալ գարնանը Ղուբայի շրջանից: Այս տարվա փետրվարին նույնը կրկնվեց Իսմայիլիիում: Երկու դեպքում էլ գործադիր իշխանության ղեկավարներն ազատվեցին զբաղեցրած պաշտոններից: Ինչպես տեղեկագրում է haqqin.az-ը, «անցյալ շաբաթ օրը լրիվ այրվել է Նախիջևանի Գերագույն մեջլիսի նախագահ Վասիֆ Թալիբովի ամառանոցը, որ կառուցված էր Շահբուզի շրջանի բարձրլեռնային Բաթաբաթ տեղանքում, լողացող կղզիով հայտնի լճի ափին»:

Որ տեղի ունեցածը դիտավորյալ հրկիզման հետևանք է, լրատվամիջոցը, հղում անելով «Նախիջևանից իրազեկ աղբյուրների», մեկնաբանում է, որ «ամառանոցում ձմռանը էլեկտրականությունն անջատվում է, և այդ պահին այնտեղ ոչ ոք չի եղել»: Հրշեջ-փրկարարները հնարավորություն չեն ունեցել փրկելու ամառանոցը, «քանի որ «առատ ձյան պատճառով ճանապարներն անանցանելի էին»:

Փետրվարի 4-ին elitar.az-ը գրել էր, որ Վասիֆ Թալիբովը «ինֆարկտ է տարել և բուժվում է Թուրքիայի առաջատար կլինիկաներից մեկում»: Հայտնի չէՙ Թալիբովը ներկայումս շարունակո՞ւմ է բուժումը, թե՞ վերադարձել է Նախիջևան: Ամեն դեպքում փաստն արտառոց է նրանով, որ Թալիբովը համարվում է Նախիջևանի «խան», որ լիովին վերահսկում է իր «հայրենակալվածքի» ամենաչնչին անցուդարձն իսկ:

Ադրբեջանի իշխող վարչախմբում Վասիֆ Թալիբովը հնաբնակներից է: Նա Նախիջևանի Գերագույն մեջլիսի նախագահ է ընտրվել 1993-ի ամռանը, երբ Հեյդար Ալիևը «հրավիրվել է» Բաքու: Թալիբովը իշխող վարչախմբի ոչ միայն քաղաքական համախոհն է, այլև՝ հարազատը: Նրա կինը Հեյդար Ալիևի մորաքրոջ թոռն է: Թալիբովը բարեկամական կապ ունի նաև Իլհամ Ալիևի անվտանգության ծառայության պետ Բեյլար Էյուբովի հետ, նրանք քենակալներ են:

Այս ամենի նկատառմամբ կարելի է ասել, որ Վասիֆ Թալիբովի դեմ որևէ քայլ պետք է համարել ընդդեմ Իլհամ Ալիևի, ընդդեմ իշխող ընտանիքի «անառարկելի հեղինակության և բարձր ժողովրդականության»: Բայց կա նաև խնդրի երկրորդ կողմը՝ Թալիբովի առանձնատան հրկիզումը վկայում է, որ Նախիջևանի «խանությունում» սոցիալական դժգոհությունն այն աստիճանի սուր է, որ մարդիկ, դիմելով ծայրահեղ քայլի, հոգեբանորեն հաղթահարել են վախը:

Բացառված չէ, որ Նախիջևանում մոտակա օրերին սկսվի բռնությունների նոր ալիք: Իսկ դա իր հերթին կարող է սրել իրավիճակը՝ տեղիք տալով բողոքի զանգվածային ցույցերի: