«Առավոտ». Իրանցին հայ կնոջն անպատվել ու ծեծել է

«Ձեզ քիչ է, լավ են արել թուրքերը, որ ձեզ մորթել են, պետք է ձեր քոքը լրիվ կտրվի»։ Այս խոսքերը Իրանի քաղաքացի Աբոլֆազլ Ղոլամ Հասսան Դոլաթխահին ասել է մի հայ կնոջ՝ Ժաննա Զաքարյանին, որը Հանրապետության հրապարակում սպասելիս է եղել Իրանից ժամանող զբոսաշրջիկ մի ընտանիքի։ 

Կինը, մինչև հոգու խորքը վիրավորվելով, Իրանի քաղաքացուց զայրացած պահանջել է բացատրություն տալ նման պահվածքի համար, սակայն այս անգամ էլ կինը ենթարկվել է ֆիզիկական բռնության։ Աբոլֆազլ Ղոլամ Հասսան Դոլաթխահին Ժաննա Զաքարյանին ծեծել է, ապա կծել կնոջ ձեռքը և քաշել մազերը։ Այս ամենը մանրամասն նկարագրված է նաև Իրանի քաղաքացուն առաջադրված մեղադրական եզրակացության մեջ, սակայն ինչպես պատմեց երեկ «Առավոտի» խմբագրություն եկած Ժաննա Զաքարյանը, այսօր դատավորից սկսած՝ ոստիկաններով ու դատախազով համոզում են, որ կինը հաշտության գնա։ Դեպքին ականատես վկաներին էլ սպառնում են, որ ցուցմունքները փոխեն և տիկին Ժաննային էլ մտափոխեն՝ չբողոքի։

«Ինձ նույնիսկ գումար են առաջարկում, բայց ինձ փող պետք չէ, սա ինքնասիրության հարց է։ Նա անարգել է իմ երկիրը և պետք է իր ասածների համար պատասխան տա»,-«Առավոտի» հետ զրույցում ասաց Ժաննա Զաքարյանը։

Նրա պատմելով՝ դեպքը տեղի է ունեցել անցյալ տարի հուլիսի 31-ին գիշերը ժամը 1-ին։ Ժաննա Զաքարյանը պնդում է, որ իրենից գրավոր բողոքն ընդունեն. «Ներողություն խնդրելու փոխարեն Աբոլֆազլ Ղոլամ Հասսանն ինձ հաթաթա է տալիս, թե միևնույն է՝ իրեն ոչինչ չեն անի, քանի որ իր մեջքին Ծառուկյանն է կանգնած։ Տեղեկություններ կան, որ նա Հայաստանի դրոշի տակ հանդես եկող սպորտսմեն է»։

Այսօր առավոտյան Կենտրոն և Նորք Մարաշ վարչական շրջանների ընդհանուր իրավասության դատարանում դատավոր Մխիթար Պապոյանի մոտ լսվելու է քրեական այս գործի շարունակությունը։

Ժաննա Զաքարյանը արցախյան ազատամարտի ազատամարտիկ է, երկրապահ անդամ և հայրենիքին մատուցած իր ծառայությունների համար պարգևատրվել է պատվոգրերով։