Ավագանու դե ֆակտո թեկնածուները դեռ փաստաթղթեր չեն ներկայացրել

Այս պահի դրությամբ Կենտրոնական ընտրական հանձնաժողով դեռևս որևէ կուսակցություն կամ կուսակցությունների դաշինք Երևանի ավագանու ընտրություններում ընտրական ցուցակների գրանցման համար անհրաժեշտ փաստաթղթեր չի ներկայացրել: Այս մասին Լուրեր.com-ի հետ զրույցում ասաց ԿԸՀ մամլո խոսնակ Հերմինե Հարությունյանը:

Հիշեցնենք, որ մարտի 11-ին մեկնարկել է մայիսի 5-ին կայանալիք Երևանի ավագանու ընտրություններում կուսակցությունների ընտրական ցուցակների առաջադրումը, իսկ ընտրական ցուցակների գրանցման համար անհրաժեշտ փաստաթղթերը Կենտրոնական ընտրական հանձնաժողով կուսակցությունները կարող են ներկայացնել մինչև մարտի 21-ը՝ ժամը 18:00-ը: Ընտրական ցուցակների գրանցումը կկատարվի մարտի 21-31-ը: 

Նախընտրական քարոզարշավը կմեկնարկի ապրիլի 7-ին ու կտևի մինչև մայիսի 3-ը, իսկ մայիսի 4-ը լռության օր է:

Կուսակցություններից Երևանի ավագանու ընտրություններում իրենց մասնակցության մասին հայտնել են ՀՀԿ-ն, ԲՀԿ-ն և ՕԵԿ-ը։

Հանրապետական կուսակցության ցուցակը կգլխավորի գործող քաղաքապետ Տարոն Մարգարյանը, ԲՀԿ ցուցակը՝ Վարդան Օսկանյանը, իսկ ՕԵԿ ցուցակը կգլխավորի Արտակարգ իրավիճակների նախարար Արմեն Երիցյանը։

Մյուս քաղաքական ուժերը դեռևս որևէ պաշտոնական հայտարարություն ավագանու ընտրությունների վերաբերյալ դեռևս չեն արել: