Սերժ Սարգսյանը Վլադիմիր Պուտինին հրավիրել է Հայաստան

Պաշտոնական այցով Ռուսաստան այցելած ՀՀ նախագահ Սերժ Սարգսյանը ՌԴ նախագահ Վլադիմիր Պուտինի հետ հանդիպման ընթացքում հաստատել է Պուտինին Հայաստան այցելելու իր հրավերը, ինչպես նաև հույս հայտնել ռուսական կողմից ստացվող աջակցության և օգնության համար:

Պուտինի քաղաքամերձ առանձնատանը կայացած երկկողմ հանդիպան ընթացքում Սարգսյանը հիշեցրել է, որ Ռուսաստան կատարած իր այցն ընտրություններից հետո նրա առաջին պաշտոնական այցն է արտասահման. գրում է РИА Новости-ն:

«Այն, որ ես առաջին պաշտոնական այցով ժամանել եմ հենց Մոսկվա, օրինաչափ է: Ռուսաստանը մեր ռազմավարական դաշնակիցն է, մեր գործընկերը, և դրանով ամեն բան ասված է»,-հայտարարել է Սարգսյանը և հավելել, որ ևս մեկ անգամ հաստատում է Հայաստան այցելելու Պուտինին արված իր հրավերը:

Իր հերթին Պուտինը նշել է, որ Հայաստանին և Ռուսաստանին կապում են հատուկ հարաբերություններ, և շնորհավորել Սարգսյանին վերընտրվելու կապակցությամբ:

«Մենք Հայաստանի հետ հատուկ հարաբերություններ ունենք: Ընդհանուր առմամբ՝ դրանք լավ են զարգանում: Չնայած տնտեսության ոլորտում առկա որոշակի խնդիրներին՝ անցյալ տարի ապրանքաշրջանառության աճը կազմել է 20%, և ինձ համար շատ հաճելի է, որ Ռուսաստանը շարունակում է առաջին տեղում գտնվել Հայաստանի ապրանքատնտեսական շրջանառության մեջ»,-ասել է ՌԴ նախագահը:

Նա նաև նշել է, որ Ռուսաստանը նաև առաջին տեղն է զբաղեցնում Հայաստանում կուտակված օտարերկրյա ներդրումների առումով, որոնց ընդհանուր գումարը կազմում է 3 մլրդ դոլար:

Պուտինի խոսքերով՝ պակաս ակտիվ չեն նաև շփումները քաղաքական ոլորտում: