Հռիփսիմե Խուրշուդյան. «Երեխայիս ծնվելուց հետո ես դեռ չեմպիոն պետք է դառնամ»

Օրերս ծանրամարտի աշխարհի բրոնզե մեդալակիր, Եվրոպայի փոխչեմպիոն Հռիփսիմե Խուրշուդյանն արժանացավ «Հայուհի մարզիկ 2013» մրցանակին:

Նա այսօր չի մարզվում՝ դադարեցրել է մարզումները, քանի որ պատրաստվում է մայրանալ և գտնվում է հղիության 5-րդ ամսում: Այսօր Հռիփսիմեն սիրով համաձայնել է պատասխանել ArmStar.am-ի հարցերին:

Ինչպե՞ս եք Ձեզ զգում:

Շատ լավ եմ զգում, ինձ մոտ հանգիստ վիճակ է, ես չեմ մարզվում: Հիմնականում քնում եմ, իսկ երեկոյան զբոսանքի եմ դուրս գալիս ամուսնուս՝ Տարոնի հետ, ով ի դեպ նույնպես ծանրորդ է:

Որպես ծանրորդ, միգուցե Ձեզ հղիության ընթացքում բժիշկները հատուկ ռեժիմ են նշանակել:

Ոչ, չկա նման ռեժիմ, ինչպես բոլորին, այնպես էլ ինձ, բժիշկները խորհուրդ են տալիս չնյարդայնանալ, չհուզվել, պահպանել հանգիստ վիճակ, շատ քնել, ավտոմեքենա չվարել ու օրվա մեջ հաճախ քայլել: Անհրաժեշտ է, որ իմ սննդակարգում ավելացնեմ մրգերի, բանջարեղենի ու հյութերի քանակը:

Գիտե՞ ք արդեն երեխայի սեռը:

Ոչ, դեռ չգիտենք, բայց ես ինքս շատ եմ սպասում աղջիկ երեխայի, իսկ ամուսինս տղա է ցանկանում:

Որոշել եք ինչպե՞ս եք նրան անվանելու:

Այո, եթե տղա ծնվի՝ կկնքենք Տարոնի հայրիկի անունով՝ Աշոտ, իսկ եթե աղջիկ, ապա ես ու ամուսինս կընտրենք որևէ նորաոճ ու գեղեցիկ անուն:

Ե՞րբ կվերադառնաք մեծ սպորտ:

Փոքրիկիս կծնվի հուլիսին, իսկ հոկտեմբերին կսկսեմ արդեն մարզվել: Պետք է պատրաստվեմ 2014-ի Եվրոպայի առաջնությանն ու 2016-ի Օլիմպիական խաղերին: Ես դեռ ասելիք ունեմ ծանրամարտի ոլորտում. աշխարհի չեմպիոն դառնալու ցանկությունս ու ձգտումս մեծ է: