Հանդիպում ԱԺ ՀԱԿ խմբակցությունում

ՀՀ ԱԺ «Հայ ազգային կոնգրես» խմբակցության քարտուղար Արամ Մանուկյանը մարտի 12-ին հանդիպեց Չեխիայի Հանրապետության արտաքին գործերի նախարարության Հյուսիսային եւ Արեւելյան Եվրոպայի երկրների վարչության պետ տիկին Ելիշկա Ժիգովայի հետ: Հանդիպմանը մասնակցում էին նաեւ ՀՀ-ում Չեխիայի Հանրապետության գործերի ժամանակավոր հավատարմատար Պետր Միկիսկան ու ՉՀ արտակարգ եւ լիազոր դեսպան Իվան Յեսթրաբը:

Որպես ԱԺ եվրոպական ինտեգրման հարցերի մշտական հանձնաժողովի ու Եվրոպական լիբերալ դեմոկրատական եւ բարեփոխումների կուսակցության խորհրդի անդամ՝ Արամ Մանուկյանը փաստեց եվրաինտեգրման կարեւորությունն ու համագործակցության պատրաստակամություն հայտնեց:

Հանդիպման ընթացքում զրուցակիցներն անդրադարձան Հայաստանում հետընտրական գործընթացներին: ՀԱԿ խմբակցության քարտուղարը միջազգային կառույցներին եւ հատկապես դիտորդական առաքելություններին կոչ արեց ուշադրության առանցքում պահել ընտրական գործընթացները:

Արամ Մանուկյանը հյուրերին տեղեկացրեց, որ Երեւանի ավագանու առաջիկա ընտրություններին ՀԱԿ-ը հակված է մասնակցել: Նա նշեց, որ ընտրություններին միասնական ցուցակով մասնակցելու վերաբերյալ խորհրդարանական այլ ուժերի հետ բանակցությունները դեռ չեն ավարտվել:

Չեխիայի արտգործնախարարության պաշտոնյան հետաքրքրված էր՝ արդյոք ընդդիմությունը տեսնում է բարեփոխումների եւ ընդհանրապես փոփոխությունների միտում: ՀԱԿ խմբակցության քարտուղարը փաստեց դրական տեղաշարժերը զանգվածային լրատվության միջոցների ազատության ուղղությամբ, նաեւ ընդգծեց, որ քաղաքական վիճակը համեմատելի չէ 2008 թ. հետ. այն զգալիորեն բարելավվել է:

Զրուցակիցներն անդրադարձան նաեւ տարածաշրջանային խնդիրների, ղարաբաղյան հակամարտության կարգավորմանն ու դրա ձեւաչափին, հայ-թուրքական հարաբերություններին, այլ հարցերի: