«Ժողովուրդ». Ի վերջո, ՌԴ-ն ոչ թե Սերժ Սարգսյանի, այլ Հայաստանի ռազմավարական դաշնակիցն է

Երեկ Մոսկվայում Սերժ Սարգսյանի հետ հանդիպման ժամանակ ՌԴ նախագահ Վլադիմիր Պուտինն իր խոսքի սկզբում անդրադարձել է
Հայաստանում կայացած նախագահական ընտրություններին՝ նշելով, որ Ս. Սարգսյանի ստացած «60 տոկոսից ավելի» ձայնը շատ
լավ արդյունք է: «Ժողովուրդը» նկատում է, որ ըստ պաշտոնական արդյունքների՝ նախագահական ընտրություններում Սարգսյանը ստացել է 58 տոկոս, և Պուտինի շեշտադրումը «60 տոկոսից ավելի» (Ещё раз хочу Вас поздравить с убедительной победой: свыше 60 процентов - это очень хороший результат) ձայն ստանալու մասին, մեղմ ասած, տարակուսանքի տեղիք է տալիս: Ու սա այն դեպքում, երբ ընտրություններից հետո Հայաստանում չեն դադարում բողոքի ակցիաները, ավելին, արդեն երեք օր է՝ Երևանի կենտրոնում հացադուլ է անում ՀՀ նախագահի թեկնածու Րաֆֆի Հովհաննիսյանը, ով կես միլիոն քվե է ստացել: Խոստովանենք՝ նման շեշտադրումներն այնքան էլ
գեղեցիկ չեն հնչում, մանավանդ եթե ՌԴ-ն համարվում է Հայաստանի ռազմավարական գործընկեր: Ի վերջո, ՌԴ-ն ոչ թե Սերժ Սարգսյանի, այլ Հայաստանի ռազմավարական դաշնակիցն է: Ի դեպ, ուշագրավն այն է, որ ըստ նախագահականի կայքի՝ Ս. Սարգսյանը Մոսկվայում է գտնվում Պուտինի հրավերով, մինչդեռ Կրեմլի կայքը համառորեն լռում է այս մասին: