Գրավաճառները «պանիխիդա են» անում. Քաղաքապետարանը պարզաբանում է

Երևանյան մետրոյի «Երիտասարդական» կայարանի հարևանությամբ գտնվող գետնանցումում սկսվել է բոլոր կրպակների և վաճառասեղանների ապամոնտաժման գործընթացը։

Գրավաճառները Լուրեր.com-ի հետ զրույցում իրենց դժգոհությունն էին հայտնել, ասելով, որ իրենք այդտեղ աշխատելով կարողանում էին իրենց հացի փողը վաստակել, բայց այսօր դա էլ չկա, որ գոյատևեն։

Երևանի քաղաքապետարանի տեղեկատվության և հասարակայնության հետ կապերի վարչության պետ Արթուր Գևորգյանը Լուրեր.com-ի հետ զրույցում ասաց, որ գրավաճառներին իրենց գործունեությունը շարունակելու համար առաջարկվել է երկու տարածք. «Մեկը՝ Ձկան խանութի մոտ, իսկ մյուսը՝ Մաշտոցի պուրակի մոտ գտնվող գետնանցումը։ Հիմա սպասում ենք իրենց որոշմանը, թե որ հատվածը կընտրեն»,-ասաց Գևորգյանը։

Այն հարցին, թե ինչով էր պայմանավորված նման որոշումը, Քաղաքապետարանի մամլո խոսնակը պատասխանեց. «Այդտեղ կա վարձակալ, գետնանցման մասին չէ խոսքը, թյուր ինֆորմացիա է տարածվել, որ գետնանցումը սեփականաշնորհվել է։ Գետնանցումները չեն սեփականաշնորհվում, դրանք ընդհանուր օգտագործման տարածքներ են, այնտեղ կան խանութներ, որոնք ունեն սեփականատեր, և նա պետք է իրականացնի վերանորոգման աշխատանքներ, և այդտեղ պետք է ելումուտ կարողանան ապահովել այդ մարդիկ՝ իրենց վերանորոգման աշխատանքները կատարելու համար»,-ասաց Արթուր Գևորգյանը, հավելելով, որ որևէ այլ պատճառ չկա։

Նրա խոսքերով՝ տարածքները գրավաճառներին տրամադրվելու են նախկինում եղած պայմաններով։