Մեր վերջին ճիչն ու պահանջն է, որ շտապ արձագանքեք, դադարեցնեք ապօրինությունը

Երևանի Պարոնյան փող. 4 ա շենքի բնակիչները բաց նամակ են ուղղել Ս. Սարգսյանին, Տ. Սարգսյանին, ՀՀ ՄԻՊ Կ. Անդրեասյանին, ՀՀ ԱԻ նախարար Ա. Երիցյանին: Նամակում մասնավորապես գրված է.

«Հարգելի պարոնայք,

Բազմիցս դիմել ենք Ձեզ Երևանի Մաշտոցի պողոտայի ծածկած շուկայի տարածքում իրականացվող ինքնակամ վերակառուցման աշխատանքների մասին, ինչի վերաբերյալ Երևանի քաղաքապետարանը սահմանափակվել է միայն տուգանքներ նշանակելով և ոչ մի միջոցառում չի իրականցրել կանխելու աշխատանքները և դրանք իրավական դաշտ բերելու համար: Ներկայումս, բազմաբնակարան բնակելի շենքի բնակարանների պատուհանների դիմաց, անթույլատրելի հեռավորության վրա, արագ տեմպերով կառուցվում է վերին հարկի նոր հարկաբաժին, որը, խախտելով քաղաքաշինական նորմերը, էապես վատթարացնում է մեր բնակարանների առանց այն էլ անբավարար լուսավորությունը և տեսանելիությունը, ինչպես նաև վերջնականապես խաթարում հուշարձան շենքի կերպարը: Դա դեռ քիչ էր, հիմա էլ շուկայի ամբողջ շենքի երկարությամբ ինքնակամ, առանց համապատասխան քաղաքաշինական փաստաթղթերի փորվում է մոտ 7 մետր լայնքով և 8 մետր խորությամբ /շենքի հիմքերի հիմնատակից անհամեմատ մեծ խորությամբ/ փոսորակ, որը գտնվում է մեր բազմաբնակարան շենքից ընդամենը 5 մետր հեռավորության վրա, օդի մեջ թողնելով շենքի հիմքերը՝ սեյսմիկ տեսակետից վտանգելով 6 հարկանի շենքի ամրությունը: Շենքում բնակվում են շուրջ 300 բնակիչ, որոնց շահերը և կյանքի արժեքը պետությունը բացառձակապես հաշվի չի առնում և չի գնահատում, նրանց անվտանգությունը թողելով բախտի, ավելի ճիշտ կլինի ասել կառույցի սեփականատիրոջ քմահաճույքին: Սեյսմաակտիվ տարածքում քաղաքային իշխանությունները և համապատասխան մարմինները շատ արագ մոռացան երկրաշարժի հետևանքները: Երևի պետք է, որ այսպիսի իրավիճակում հայտնված շենքը քանդվի, որ նոր սկսեն մեղավորներ փնտրել, սակայն 40 տարուց ավել այդ շենքում անհոգ ապրած բնակիչների կյանքը հետ վերադարձնել էլ չի լինի:

Փաստորեն քաղաքի կենտրոնում բոլորի աչքի առաջ, բազմաթիվ գրավոր նախազգուշացումներից հետո, ինքնակամ խեղաթյուրվում է հուշարձան շենքը, խախտվում են բնակիչների արդարացի իրավունքները, իսկ իշխանությունները մատը մատին չեն տալիս իրենց պարտականությունները կատարելու համար:

Երբ ընտրություններից առաջ ժամանակավոր կասեցվել էր շինարարությունը մենք միամտաբար կարծեցինք, թե մեր ձայնը տեղ է հասել: Սակայն, հիմա երբ ընտրություններն ավարտվել են, կառուցապատողը նոր շնչով շարունակում է շինարարական աշխատանքները: Մի թե Հայաստանում այդ աստիճան անզոր է պետական համակարգը՝ բնակիչների օրինական իրավունքներն ու պահանջները պաշտպանելու համար:
Բնակիչների նախորդ դիմումին ի պատասխան ստացել ենք ՀՀ նախագահի աշխատակազմից գրություն, որ այն ուղարկված է քաղաքապետարան, սակայն անցել էր շուրջ 4 ամիս, իսկ քաղաքապետարահից նոր, մի քանի օր առաջ ստացանք պատասխան, որում միայն փաստում են, որ ինքնակամ շինարարության համար կառուցապատողը տուգանվել է, այն դեպքում երբ աշխատանքները չեն դադարեցվել, ավելին ինքնակամ, հողազավթումով, նաև վերը նշված նոր աշխատանքները մեծ թափով, առանց տոն և կիրակի օրերի, օրը 12 ժամ շարունակվում են՝ խախտելով բազմաթիվ բնակիչների հանգստի իրավունքը և անդորրը:

Մեր վերջին ճիչն ու պահանջն է, որ շտապ արձագանքեք, դադարեցնեք ապօրինությունը, վերացնեք դրա հետևանքները և պաշտպանեք բնակիչների օրինական իրավունքներն ու հուշարձան շենքը»: