Սերժ Սարգսյանի շախմատային դիվանագիտությունը՝ ռուս լրագրողի աչքերով

«Ռուսաստանի Ձայն»-ը, անդրադառնալով ՀՀ նախագահ Սերժ Սարգսյանի՝ դեպի Մոսկվա կատարած այցին, հոդված է հրապարակել, որում դիտարկում է նրա այդ քայլը իբրև տակտիկորեն մշակված հմուտ ռազմավարական քայլ: Մեջբերում ենք հոդվածագիր Միխայիլ Շեյնկմանի հոդվածը, որում նա գրել է. «Եվ իզուր չէ, որ ՀՀ նախագահ Սերժ Սարգսյանը միաժամանակ նաև ՀՀ շախմատի ֆեդերացիայի նախագահն է: Աշխարհաքաղաքական առումով նա իրեն դրսևորեց իբրև հմուտ ռազմավար, որի շնորհիվ էլ նախագահության առաջին ժամանակահատվածում վաստակեց շատ կենտրոնների հարգանքը: Ամենայն հավանականությամբ, կպահպանի այդ հարգանքը նաև նախագահական 2-րդ շրջանում:

Նախագահական երկրորդ շրջանը դեռ չի մեկնարկել, քանի որ երդմնակալության արարողությունը կայանալու է ապրիլի 9-ին, սակայն արդեն ակնհայտ է, որ Սարգսյանն արտաքին քաղաքականության առումով իր սկզբունքներին չի դավաճանելու: Ահա իսկական ընդօրինակման օրինակ Ուկրաինայի համար: Հայաստանը չի ընտրում Եվրամիության և Մաքսային միության միջև, սակայն վայելում է և՛ մեկի, և՛ մյուսի հարգանքը: Երևանում գտնվող վրաց վարչապետ Իվանիշվիլին բոլորի հետ համագործակցելու հենց այս հատկությունն անվանեց ընդօրինակման նախանձելի օրինակ:

Հայաստանը ձգտում է լինել բոլորի հետ, սակայն, պահպանելով իր դեմքը և մնալով իր տեղում: Դա այն պատճառով, որ նրա նախագահը լավ գիտի իր բոլոր քայլերը և ճիշտ է հաշվարկում իր այցելությունները: Օրինակ՝ այժմ նա ժամանել է Մոսկվա նախքան երդմնակալությունը, ու թվում է, թե անհասկանալի է՝ որպես գործող, թե՝ նորընտիր նախագահ է նա ժամանել Պուտինի հետ հանդիպմանը, սակայն նա նշում է, որ դա նախագահական ընտրություններից հետո նրա առաջին արտասահմանյան այցելությունն է:

Պուտինի հետ նրա հանդիպումը հենց այս պահին ապացուցում է, որ Հայաստանի հետ Ռուսաստանի հարաբերությունները մշտական են և կայուն՝ անկախ նախագահական ժամկետի հերթական թվից: Դրա փոխարեն՝ նախագահի լիազորությունները պաշտոնապես ստանձնելուց հետո նա կարող է գնալ արդեն ինչ-որ մի Բրյուսել: Ե՛վ Ռուսաստանը վիրավորված չի մնա, և՛ Արևմուտքին անհրաժեշտ հարգանքը կմատուցի իր այդ քայլով»,-գրում է հոդվածագիրը: