Մահացել է ամենադաժան ռեժիմներից մեկի`«կարմիր կհմերների» առաջնորդ Իենգ Սարին

Իր դաժանությամբ հայտնի «կարմիր կհմերների» ռեժիմի առաջնորդ Իենգ Սարին այսօր 87 տարեկան հասակում վախճանվել է Կամբոջայի Պնոմպենե քաղաքում: Այդ մասին հայտնել են նրա հարազատները. գրում է Deutsche-Welle-ն:

Իենգ Սարին եղել է Կամբոջայի կոմունիստական կուսակցության ռեժիմի առաջնորդ Պոլ Պոտի հավատարիմ համախոհը: 1975-ին Սարիի ղեկավարած «կարմիր կհմերների» ջոկատները երկրում ամերիկամետ ռեժիմի տապալումից հետո իրենց իշխանությունը հաստատեցին Կամբոջայում: Գյուղացիական սոցիալիզմ կառուցելու ընթացքում նրանք դաժանորեն ոչնչացրին երկրի բնակչության բուրժուազիայի և կիրթ զանգվածների ներկայացուցիչներին: Ամենատարբեր տվյալներով՝ այդ հաշվեհարդարներից երկրում սպանվել է 1.7-3 մլն մարդ:

Պո Պոտի և Իենգ Սարիի ռեժիմը տապալվել է 1979-ին Վիետնամի աջակցությամբ, սակայն «կարմիր կհմերները» դեռևս երկար ժամանակ նոր ղեկավարության դեմ պարտիզանական պատերազմ էին վարում ջունգլիներում: 1996-ին Իենգ Սարիին համաներում շնորհվեց Կամբոջայի թագավորի կողմից հանուն ազգային հաշտության: Սակայն 2007-ին նա կնոջ հետ ձերբակալվեց Միջազգային տրիբունալի կողմից «կարմիր կհմերների» հանցագործությունների հետաքննության գործով: 2009-ին Սարիին մեղադրանք ներկայացվեց ցեղասպանություն կազմակերպելու համար:

Վերջին տարիներին նա առողջական խնդիրներ ուներ և բանտից տեղափոխվել էր հիվանդանոց: