Հայաստանը հայտնվել է մարդկային զարգացվածության բարձր մակարդակ ունեցող երկրների շարքում. ՄԱԿ

Հայաստանը «Բազմակերպար աշխարհում մարդկային զարգացվածություն» խորագրով ՄԱԿ-ի հրապարակած զեկույցում հայտնվել է մարդկային զարգացման բարձր մակարդակ ունեցող երկների շարքում՝ զբաղեցնելով 87-րդ հորիզոնականը:

Զեկույցը պատրաստվել է ՄԱԿ-ի զարգացման ծրագրի շրջանակներում և պարունակում է տարբեր երկրների բնակիչների սոցիալական ապահովության, առողջապահության ցուցանիշների, կրթության մակարդակի, մշակութային զարգացման, հանցագործությունների քանակի, շրջակա միջավայրի պահպանության, հասարակական կյանքում մարդկանց մասնակցության, և առհասարակ՝ կենսամակարդակի վերաբերյալ տարբեր տվյալներ:

Նշված տվյաներից ելնելով՝ զեկույցը Նորվեգիային, Ավստրալիային, ԱՄՆ-ին, Նիդեռլանդներին և Գերմանիային դասել է աշխարհում մարդկային զարգացման մակարդակի առումով լավագույն երկրների հնգյակում:

Հետխորհրդային երկրներից այդ ցուցակում առաջատար դիրքերում են մերձբալթյան երկրները՝ Էստոնիան՝ 33, Լիտվան՝ 41 և Լատվիան՝ 44-րդ տեղերում:

Մարդկային զարգացման բարձր մակարդակ ունեցող երկների շարքում է նաև հետխորհրդային Բելառուսը՝ 50-րդ, Ռուսաստանը՝ 55-րդ, Ղազախստանը՝ 69-րդ հորիզոնականներով: Այս աղյուսակում են նաև Վրաստանը՝ 72, Ուկրաինան՝ 78, Ադրբեջանը՝ 82, և Հայաստանը՝ 87-րդ հորիզոնականներով:

Մարդկային զարգացվածության միջին մակարդակ ունեցող երկրներում են միջինասիական Թուրքմենստանը՝ 102-րդ տեղ, Մոլդովան՝ 113, Ուզբեկստանը՝ 114-րդը, իսկ Ղրղզստանն ու Տաջիկստանը կիսել են 125-րդ հորիզոնականը:

Մարդկային զարգացվածության ցածր մակարդակ ունեցող երկրների ցուցակը եզրափակել են Նիգերը, Կոնգոյի ժողովրդավարական հանրապետությունը, Մոզամբիկը, Չադը և Բուրկինա-Ֆասոն: