Ավետը, Լիլիթը, Հասմիկը և ուրիշներ՝ ժամացույցների և ժամանակի մասին

Շոու-բիզնեսի ներկայացուցիչները սիրում են ուշանալ՝ անկախ ազգությունից և զբաղեցրած դիրքից, ինչը, երևի, ուշադրություն գրավելու և անձի կարևորությունն ընդգծելու ձևերից է: Մենք էլ ունենք մշտապես ուշացող հայտնիներ, որոնց հետ պայմանավորվելիս եթե անգամ մեկ ժամ շուտ ժամադրենք, միևնույն է, կրկին ուշանալու են :)

Լիլիթ Հովհաննիսյան. «Եթե հարցնեն՝ ժամը քանիսն է, չեմ կարողանա ասել»

Լիլիթը խոստովանեց, որ այնքան էլ չի սիրում ժամացույցին նայել և ոչ միայն շատ ժամացույցներ չունի, այլև չի էլ կապում: «Նախ եթերի էթիկան չի թույլատրում ժամացույց կապել, հետո ես էլ չեմ սիրում անընդհատ նայել, թե ժամը քանիսն է: Իհարկե, եթե պայմանավորված եմ, աշխատում եմ չուշանալ, բայց հեռախոսի էկրանին նայելուց էլ ուշադրություն չեմ դարձնում ժամացույցին, ու եթե այդ պահին ժամը հարցնեն, չեմ իմանա՝ ինչ ասել, նորից ժամին կնայեմ: Երկու ժամացույց ունեմ, որոնցից մեկը երգչուհի Լիլիթ Հակոբյանի նվերն է Ֆրանսիայից՝ գեղեցիկ քարերով»,- նշեց երգչուհին:

Սոնա Շահգելդյան. «Արթանում եմ ճիշտ ժամին՝ առանց զարթուցիչի»

Սոնան այնքան է սիրում ժամացույց, որ դրա և ակնոցների հավաքածու ունի: «Ես չունեմ հին ու նոր ժամացույցներ: Ունեմ հինգ-վեց բրենդային ժամացույց, բայց հիմա կապում եմ «Բուրան» ապրանքանիշի ժամացույցը, որը նվեր եմ ստացել Յուրմալայում: Շատ եմ սիրում ճշտապահ մարդկանց, բայց երբեմն 5-10 րոպեով ուշանում եմ: Ժամանակի հետ խնդիր երբեք չեմ ունեցել, միշտ կարողանում եմ կարգավորել գործերս որոշակի ժամանակում: Եթե պետք է շատ շուտ արթնանալ, արթնանում եմ, բայց՝ առանց զարթուցիչի»:

Հասմիկ Կարապետյան. «Ես երջանիկ մարդ եմ ու ժամացույցին աշխատում եմ չնայել»

Թեև Հասմիկը պարտաճանաչ մարդու համբավ ունի, բայց ինքն էլ ժամացույց երբեք չի կապում: Դրա պատճառը երևի այն է, որ չի սիրում, երբ ժամանակը շատ արագ է անցնում: Առաջին ժամացույցս մորաքույրս էր բերել ԱՄՆ-ից, դպրոցում կապում էի, բայց միշտ նեղվում էի. այն միշտ խանգարում էր ինձ: Ասում են` երջանիկները չեն նայում ժամացույցին, իսկ ես ինձ երջանիկ եմ զգում: Եթե պայմանավորված չեմ, աշխատում եմ ժամացույցին չնայել: Ընդհանրապես, բնույթով ամառային մարդ եմ և ձմեռային ժամանակին անցնելիս զգում եմ աշնան շունչը, որ ամառն իսկապես վերջացել է՚:

Արտավազդ Ամիրյան «Մեծ ժամացույցների հանդեպ թուլություն ունեմ»

Արտավազդի համար ժամացույցը ավելի շուտ աքսեսուար է, քան ժամը իմանալու միջոց: Իր հավաքածուում նա 8-10 ժամացույց ունի, որոնք համադրում է տաբատների հետ: «Մեծ ժամացույցների հանդեպ թուլություն ունեմ. իմ աշխատասենյակում էլ, տանն էլ շատ մեծ ժամացույցներ են դրված, երևի քաղաքում ամենամեծերից մեկը :) Ձեռքի բոլոր ժամացույցներս էլ հավանում եմ, նաև նրանք, որոնք նվեր եմ ստացել մտերիմ մարդկանցից: Եթե ժամացույցը հավանում եմ, բրենդին կամ գնին չեմ նայում: Պատահում է' երբեմն ուշանում եմ, բայց գործերի կամ ճանապարհների խցանման պատճառով: Ասում են` ժամանակ չունի նա, ով ոչինչ չի անում, բայց օրվա ընթացքում հաճախ զգում եմ, որ ժամանակը իսկապես չի բավականացնում. կուզենայի օրը մի քանի ժամով երկարեր: Իսկ ժամանակի անցումն էլ ամառայինի կամ հակառակը, չեմ զգում, դա ինձ վրա ընդհանրապես չի ազդում»:

Ավետ Բարսեղյան. «Ամենաշատը գրպանի ժամացույց եմ սիրում»

Ավետը նշեց, որ հաճախ է գրպանի ժամացույց ունենում և նվեր ստանում և ունի ավելի քան 20 ժամացույց, որոնք համադրում է այդ օրվա իր կերպարի հետ: «Ժամացույցները որպես աքսեսուար եմ օգտագործում. ամենաթանկը «Պատել Ֆիլիպ» ապրանքանիշի ժամացույցն է: Եթե չկան օբյեկտիվ պատճառներ, չեմ ուշանում: Օրեր են լինում, երբ ուզում եմ, որ չավարտվեն. դրանք երջանիկ օրերս են»:

«Ե՞ս Yes!» ամսագիր, արխիվ