«Բնապահպանները հակա են մեր գյուղին, մեր պետությանը». գետահովիտցիներ (տեսանյութ)

Այսօր՝ մարտի 15-ին, ՀՀ բնապահպանության նախարարությունում տեղի ունեցավ «Խաչաղբյուր-2» փոքր հիդրոէլեկտրակայանի շինարարության հետ կապված քննարկում, որին, բացի մասնագետներից, մասնակցում էին նաև Տավուշի մարզի Գետահովիտ համայնքի բնակիչները, ՀԿ-ների ներկայացուցիչներ:

«Զարգացնենք այլընտրանքային էներգիան», «Գետահովիտը մեգաէներջիի հետ է», «Աշխատանք Գետահովիտի բնակիչներին», «Մի խանգարեք Գետահովիտի զարգացմանը», «Խաչաղբյուր 2-ը մի քաղաքականացրեք» գրություններով պաստառներ էին իրենց հետ բերել Գետահովիտի բնակիչները, ովքեր մասնակցում էին քննարկմանը հույսով, որ բնապահպանության նախարարը ճիշտ որոշում կկայացնի և վերջապես կկառուցվի «Խաչաղբյուր-2»-ը:

Գյուղի բնակիչների խոսքով՝ ՓՀԷԿ-ը աշխատատեղերի խնդիր կլուծի, որը սահմանամերձ գյուղի բնակիչների համար առաջնային խնդիր է։ Ինչ վերաբերում է ձկնաբուծությանը, գյուղացիները բերում էին փաստարկներ, որ «Խաչաղբյուր-2»-ի կառուցումը ոչ մի կերպ չի կարող խանգարել դրան:

Lurer.com-ի թղթակցի հետ զրույցում Գետահովիտի բնակիչներից Առուստամ Այդինյանն ասաց. «Ես՝ որպես համայնքի բնակիչ, իմ համաձայնությունը տալիս եմ, ես կողմ եմ, եթե իրենք պարտավորվում են գյուղում կատարեն բարեգործական աշխատանքներ, ես կողմնակից եմ ԳԵՍ-ի կառուցմանը։ Հանդիպումներ եղել է, քննարկել ենք։ Անտառային հատվածը ընդհանրապես չի տուժելու»։

«Ես Գետահովիտի բնակիչ եմ։ Մեզ խանգարող ոչինչ չկա այնտեղ։ Մենք այդ ջրից օգտվում ենք ՀԷԿ-ից ներքև, դրանից վերև օգտագործելու ոչ մի բան չունենք։ Մեր «կանալներն» ամբողջը դրանից ներքև ա։ Մենք վերևի հետ կապ չունենք, մեզ խանգարող բան չկա այդտեղ։ Էտ մասում քարափներ, լեռներ ա, մեզ չի խանգարում»,– ասաց մեկ այլ քաղաքացի։ Լրագրողի այն հարցին, թե ինչ օգուտ կարող է տալ ՀԷԿ-ի կառուցումը վերջինս պատասխանեց. «Մեզ համար աշխատատեղեր կբացվեն։ Մենք էլ չգիտենք, թե բնապահպաններն ինչի են դեմ արտահայտվում։ Գյուղացիների մեծամասնությունը կողմ է ՀԷԿ-ի կառուցմանը, ոչ մի վնաս այն չի կարող մեզ հասցնել»։

Այնուհետև քննարկմանը մասնակցող Գետահովիտի բնակիչները, զրուցելով Lurer.com–ի լրագրողի հետ, իրենց դժգոհությունները հայտնեցին՝ կապված բնապահպանների կասկածելի ակտիվության հետ. «Եկել են, խոչընդոտում են, չեն թողնում կառուցվի, իրենք հակա են մեր գյուղին, մեր պետությանը։ Ես խնդրում եմ Սերժ Սարգսյանին, խնդրում եմ՝ թող միջնորդի։ Բնապահպանները մեր գյուղի տեղը չգիտեին, էլ ո՞նց եկան իմացան, իրանք երևի ուզում են ատոմակայան կառուցվի, ոչ թե՝ ԳԷՍ»,– բնապահպանների գործողություններից դժգոհում է բնակիչներից մեկն ու հավելում,- «այդ գետից, որ վերցնում են ջուրը, նույնքան էլ հետ են թողնում։ Էս ԳԷՍ-ը դեռ պիտի կառուցվեր 20-30 տարի առաջ։ Եթե լիներ՝ ճգնաժամ չէինք ապրի, մեզ օգուտ ա տալիս։ Էն, որ լույս չկար, գազ չկար, սա կառուցված լիներ, գոնե էլեկտրականություն կլիներ։ Դա ոչ մի բնապահպանական խնդրի չի բերում, ընդամենը մի քանի ծառ կա, գետը վարարի՝ քշելույա տանի, ոչ մի բանին էլ չի խանգարում։

Բնապահպանները գալիս են, իրանցից տարիքով մեծ մարդիկ էլ կան, գալիս են, հայհոյում, կռիվ են սարքում՝ վերին աստիճանի բառերով։ Նման արգելք հլա ես ոչ մի տեղ չեմ տեսել։ Չեն ուզում, որ կառուցվի, ասում են ջրի ձուկը վերանում ա, բայց չի՛ վերանում՝ սո՛ւտ ա։ Մարդիկ թողնում Ռուսաստան են գնում, թողեք՝ թող աշխատեն, չգնան էս երկրից»,- խոսքները մեկ արած՝ ասում էին գյուղացիները։

Նելլի Ավետիսյան