Ադրբեջանը շատ զգայուն է վերաբերվում Երևան-Վան ավիաչվերթի բացման խնդրին

Ադրբեջանի նախագահի աշխատակազմի հասարակական-քաղաքական բաժնի ղեկավար Ալի Հասանովը հայտարարել է, որ Ադրբեջանը բազմիցս նշել է ու մեկ անգամ նորից կրկնում է, որ հատկապես զգայուն է վերաբերվում «զավթիչ Հայաստանի» և Լեռնային Ղարաբաղի հետ ցանկացած պետության հաստատած շփումներին, հատկապես, եթե շփում հաստատող կողմն Ադրբեջանի համար հանդիսանում է եղբայրական պետություն. Հասանովի խոսքերը փոխանցում է APA գործակալությունը:

Հասանովի խոսքերով՝ պաշտոնական Բաքուն նման շփումները գնահատում է որպես «զավթող կողմի՝ Հայաստանի» ուժեղացման դրսևորում: «Ցանկացած նման աջակցություն նպաստում է Հայաստանի նվաճողական քաղաքականության երկարաձգմանը: Երբ դա անում են այնպիսի պետություններ, որոնց ռազմավարական շահերն ուղղակիորեն համընկնում են Ադրբեջանի շահերին, ապա մենք կրկնակի զգայուն ենք դառնում նման խնդրի առջև: Սա ոչ միայն մեր վերաբերմունքն է, այլև թուրք հասարակության վերաբերմունքը»,-հայտարարել է նա:

«Երևան-Վան ավիաչվերթի բացումը մենք գնահատում ենք որպես Հայաստանի նվաճողական քաղաքականությանը ցուցաբերած պաշտոնական աջակցություն»,-հայտարարել է Հասանովը: