Համբերության բաժա՞կ. այն ամեն դեպքում չի լցվի

Քաղաքացիական խորհուրդ ընթացք. Ազատության հրապարակում Րաֆֆի Հովհաննիսյանը հենց այսպիսի անվանում տվեց նոր իշխանություն ձևավորելուն՝ նոր օրենսդիր, նոր գործադիր, նոր դատաիրավական համակարգ և այսպես շարունակ, նպատակը՝ կյանքի կոչել Նիկոլ Փաշինյանի գաղափարը:

Եվ ահա մի օր՝ ուշ երեկոյան, Ազատության հրապարակ Րաֆֆի Հովհաննիսյանին այցելելու է գալիս ԱԺ նախագահ Հովիկ Աբրահամյանը, ամենայն հավանականությամբ, յուրատեսակ ՀՀԿ դեսպան-դեսանտի կարգավիճակում: Կայացած հանդիպումից հետո պարզվել է, որ իրականում ինչ կատարվում է Ազատության հրապարակում, և ընդհանրապես հետընտրական այս խժդժուկը, իսկ իրականում՝ ժողովրդի այս պայքարը, ոչ այլ ինչ է, քան պրիմիտիվ բանավեճ, համենայն դեպս,. նմանատիպ կարծիքի է ԱԺ նախագահը, ով հայտնի է իր՝ «դոբրիով» հարցեր լուծելու տիեզերական ունակությամբ:

Երբեմն այդ ունակությունները սեփական ինքնաբուխ նախաձեռնությունների զոհ են դառնում, իսկ երբեմն էլ նույն այդ ունակություններն օգտագործվում են միմիայն պետության երաշխավորների՝ երաշխավորի ապահովության ու ապահովվածության ձևաչափով: Ահա Հովիկ Աբրահամյանի այս այցելությունը կարելի է դասել վերը թվարկածի երկրորդ դասին միայն: Չնայած նրան, որ Հովիկ Աբրահամյանը մինչև հիմա Րաֆֆի Հովհաննիսյանին չայցելելը բացատրել է ՍԴ-ի որոշմանը սպասելու հանգամանքով, այնուամենայնիվ, հասկանալի է, որ այս այցելությունը շարունակությունն է միայն խորհրդարանում տապալված բանակցությունների: Այն բանից հետո, երբ Րաֆֆի Հովհաննիսյանը հայտարարեց, որ ինքը կապ չունի խոհրդարանում ընթացող գործընթացների հետ, հասկանալի էր, որ այլ մոտեցում պետք է ցուցաբերվի, և ահա այդ այլ մոտեցումը Հովիկ Աբրահամյանը համարեց Ազատության հրապարակում՝ Րաֆֆի Հովհաննիսյանի բնորոշմամբ՝ «VIP սալոնում» հայտնվելու տարբերակը:

Այսպիսով՝ նախագծի հիմքերը գցված են Հովիկ Աբրահամյանի ձեռքերով, մնում է միայն հստակեցնել արտաքին տեսքի դիզայնը: Հենց սա է, որ այսօր շփոթմունք է առաջացնում Բաղրամյան 26-ում: Ինչպե՞ս կարող է ընտրություններում լավ արդյունքով՝ 60 և ավելի տոկոս քվեով առավելության հասած նախագահը չպատասխանի Ազատության հրապարակում իրեն ձեռնոց նետելուն, իսկ մյուս կողմից՝ հենց այդ պատասխանի միջոցով և հնարավոր է դառնում կոնստրուկտիվ ընդդիմություն կոչված գաղափարը կյանքի կոչելը, այն, ինչ բավարարում է բոլորի շահերը:  

Այժմ անկասկած քննարկվում են այն մոտեցումների հնարավոր տարբերակները, որոնք կազդարարեն Սերժ Սարգսյանի՝ Ազատության հրապարակում Րաֆֆի Հովհաննիսյանի հետ հանդիպման տարբերակը, իհարկե, այդ մոտեցումները պետք է բխեն միայն PR սկզբունքներից և այն դրական լույսի ներքո ներկայացնելուց, որի միջոցով և կհաստատվի այսօրվա ընդդիմության գագաթին Րաֆֆի Հովհաննիսյանի լինելու փաստը՝ ընդամենը պաշտոնական վերահաստատում: 

Իսկ Սերժ Սարգսյանի՝ Ազատության հրապարակ ժամանելու մասին հարցին Հովիկ Աբրահամյանի պատասխանը ոչ մի կերպ չի բացառում այդ հնարավոր ու շատ հավանական փաստը: Սերժ Սարգսյանը Րաֆֆի Հովհաննիսյանի հետ կհանդիպի այսօր, վաղը, թե՝ մյուս օրը, բացարձակապես նշանակություն չունի, նշանակություն ունի միայն այցելության փաստը, և այդ այցելությունը չի կարող լինել ավելի ուշ, քան երդմնակալության արարողությունը, այսինքն՝ մինչև ապրիլի 9-ը: Հակառակ դեպքում՝ Ազատության հրապարակում ընթացող գործընթացը կարող է վտանգել նախատեսված ապահով Սերժ Սարգսյանը երդմնակալության արարողությունը:

Հենց այս՝ օր օրի ահագնացող վտանգն է, որ ստիպեց Հովիկ Աբրահամյանին այցելել Րաֆֆի Հովհաննիսյանին, և որը, ըստ այս տրամաբանության, կստիպի նաև Սերժ Սարգսյանին հանդիպել Րաֆֆի Հովհաննիսյանի հետ: Հանդիպումը կարող է տեղի ունենալ ուշ երեկոյան, ինչպես Հովիկ Աբրահամյանի դեպքում, և վաղ առավոտյան, ինչպես Վլադիմիր Գասպարյանի դեպքում. երկու դեպքում էլ Սերժ Սարգսյանը հանդիպման ժամանակ մաքսիմալ կերպով կխուսափի հազարավոր մարդկանց ներկայությունից, իսկ այն մարդկանց, ովքեր այդ պահին ներկա կլինեն, Րաֆֆի Հովհաննիսյանը ուղղակի կհորդորի հարգել Սերժ Սարգսյանին և ավելորդություններ ցույց չտալ, չէ՞ որ Րաֆֆի Հովհաննիսյանը բազմիցս է հայտարարել, որ հարգում է Սերժ Սարգսյանին: Նման սցենարը բացառված չէ ոչ մի դեպքում:

Այսպիսով՝ ՀՀԿ-ի փոխզիջումային մեթոդը, որը նրանք համարում են համբերությունը, գերմանական ճշտությամբ աշխատում էր, սակայն երդմնակալության արարողության իդեալականացումը, որը չափազանց կարևոր է ձայների գրեթե կրկնակի առավելությամբ հաղթած թեկնածուի համար, այլևս թույլ չի տալիս հենվել այդ մեթոդի վրա, և այս պահից սկսած՝ այդ խնդրի միակ լուծում կարող է հանդիսանալ հանդիպումը վերը ներկայացված սցենարով: Հակառակ դեպքում՝ ՀՀԿ-ի համբերության բաժակը լցվելու դեպքում, այդ ամենը կդիտվի որպես 2008-ի մարտի 1-ի ևս մեկ դրսևորում, որը բացառված է ամեն պարագայում:

Համբերության բաժակը ամեն դեպքում չի լցվի…

Գևորգ Ավետիսյան