ՄԱԿ-ը համաձայնության է եկել մուսուլմանների հետ կնոջ իրավունքների հռչակագրի ընդունման հարցում

ՄԱԿ-ի անդամ երկրները, որոնց թվում՝ նաև պահպանողական կաթոլիկ և մուսուլմանական պետությունները, երկարատև բանակցություններից հետո համաձայնության են եկել բռնությունից կնոջը պաշտպանելու վերաբերյալ հռչակագրի ձևակերպումների հարցում: Այս մասին մարտի 16-ին հայտնում է Աssociated Press-ը:

Մարտի 15-ին ընդունված փաստաթուղթը պարտադրում է բոլոր երկրներին ձեռնպահ մնալ իրենց ավանդությունները վկայակոչելու քողի տակ արդարացնել կնոջ նկատմամբ գործադրվող բռնությունները: Ընդ որում, հռչակագիրը հաստատում է սեռերի հավասարության սկզբունքը, ինչպես նաև կոչ է անում ՄԱԿ-ի անդամ երկրներին նպաստել դպրոցներում սեռական դաստիարակության խթանմանը, ստեղծել հատուկ կենտրոններ սեռական բռնություններից տուժած կանանց համար և ավելի խիստ պատժել գենդերային հողի վրա կատարված սպանությունները: Փաստաթղթից դուրս են բերվել սեռական փոքրամասնություններին վերաբերող դրույթները:

17 էջից բաղկացած նախագիծը ստորագրել են ՄԱԿ-ի անդամ հանդիսացող բոլոր 193 պետությունները:

Հռչակագրի ստորագրումը հատկապես սուր դիմադրության հանդիպեց Եգիպտոսի կողմից, ուր իշխող իսլամիստական «Մուսուլման եղբայրներ» կուսակցությունը օրինագիծը համարում էր իսլամի դրույթներին հակասող: Դրանով պայմանավորված՝ Եգիպտոսն առաջարկում էր փոփոխություններ մտցնել օրինագծում, որոնց համաձայն՝ այդ հռչակագիրը յուրաքանչյուր պետություն կկիրառեր իր ավանդույթներին համապատասխան: Սակայն Եգիպտոսի այդ առաջարկը մերժվեց: Արդյունքում, սակայն, Եգիպտոսը խոչընդոտ չհանդիսացավ օրինագծի ընդունման համար և մյուս երկրների շարքում դրեց իր ստորագրությունը փաստաթղթի տակ:

Եգիպտոսից բացի՝ օրինագծի որոշ դրույթների դեմ բողոքում էին Իրանը, Սուդանը, Լիբիան, ինչպես նաև Վատիկանն ու Ռուսաստանը: Նրանք առաջարկում էին մեղմացնել աբորտի արգելմանն ու ամուսնու կողմից կնոջ հետ բռնի ուժով սեռական գործողությունների մեջ մտնելը որպես բռնաբարություն որակելուն վերաբերող կետերը: Սակայն փոխզիջումների տարբերակով փաստաթղթից բացառելով նույնասեռականների իրավունքներին վերաբերող դրույթները՝ հաջողվեց պահպանել նաև այս կետերը: