Վարդան Ղուկասյանը, թալանելու մոլուցքով կուրացած, մոռանում է, որ ամեն ինչ թալանել ու կերել է

Այսօր Lurer.com-ի խնդրանքով Գյումրու քաղաքապետի մամլո խոսնակ Զոհրապ Եգանյանը, անդրադառնալով Գյումրու հեռուստաընկերություններից մեկին տված նախկին քաղաքապետ Վարդան Ղուկասյանի հարցազրույցին, ասաց.

«Երեկ «Ցայգ» հեռուստատեսությամբ հեռարձակված «ԻՐԱԿԱՆՈՒՄ» հաղորդաշարի հյուր, իրեն միոտանի ճարպիկ կերպար հայտարարող Վարդան Ղուկասյանը սեփական շահադիտական նպատակներով աղավաղում է Գյումրու վարկանիշը: 

Շուրջ 13 տարի մեր քաղաքի ղեկավար աշխատած անձի հայտարարություններին ու «մտքի» փայլատակումներին չենք պատասխանելու նույն ձևաչափով, և խնդիրը, բնականաբար, համարձակության կամ փաստարկների պակասը չէ , այլ ընդամենը կա 3 էական հանգմանք:

Առաջին. Անլուրջ է մեկնաբանել մի մարդու ասածները կամ վիճաբանել մեկի հետ, ով պաշտոնապես ախտորոշված է որպես հոգեպես ոչ առողջ մարդ, և Գյումրու քաղաքապետը պարտավոր է հոգալ նրա բուժման մասին, որպեսզի սովորության համաձայն՝ նա չխաբի իրեն բուժած արտասահմանյան հիվանդանոցներին, չվճարելով փախնի նրանցից և խայտառակի գյումրեցու բարի համբավը:

Երկրորդ. Կա մի այսպիսի ասացվածք. պետք չէ վիճել հիմարների հետ. նրանք սկզբից քեզ իջեցնում են իրենց մակարդակին, ապա հաղթում իրենց կենսափորձի շնորհիվ: Սամվել Բալասանյանի կենսափորձը թելադրում է ընդամենը արհամարհել այդ խեղկատակի ցնցումները, որը ձգտում է վերարտադրել խելառ Սարգսի կերպարը, սակայն աղավաղում է անգամ այն, քանի որ, ի տարբերություն Սարգսի, որը բարի էր և ժողովրդից խնդրում էր մեկ ավելորդ աբասի, սա ժողովրդից հափշտակել է վերջին աբասին (20 կոպեկ) և անսահման ագրեսիվ է, չի հանդարտվում, թալանելու մոլուցքով կուրացած մոռանում է, որ ամեն ինչ թալանել ու կերել է, և այդ պատճառով հորդորում եմ բոլոր լրատվամիջոցներին լինել ողջախոհ, ողորմած, կեղծանունով հերետիկոսին այսուհետ եթեր չտրամադրել, քանի որ դա իրեն նետում է պատրանքների գիրկը, սրացնում և աֆեկտի է հասցնում նրա ախտահարված երևակայությունը՝ անհնարին դարձնելով դևերը նրա ուղեղից քշելու և ապաքինելու փոքր հույսը:

Երրորդ. ամենակարևորը, Սամվել Բալասանյանը հստակ գիտակցում է, որ այս ամենը պարզապես նպատակ ունի իրեն շեղել իր ստանձնած առաքելությունից, շենացնել մեր քաղաքը եվ հավուր պատշաճի կրել «մշակութային մայրաքաղաք» տիտղոսը:

Սիրելի՛ գյումրեցիներ, քաղաքապետը հավաստիացնում է Ձեզ, որ ոչ մի սադրանք իրեն չի կարող հանել հավասարակշռությունից և շեղել ուղուց, մենք միասին շարունակելու ենք կառուցել ու շենացնել մեր քաղաքը այնպես, ինչպես խոստացել էինք, անում ենք և պետք է անենք»: