Անի Քրիստին՝ նոր ընտանիք կազմելու, Հայաստանում բնակվելու և ծննդյան 27-ամյակի մասին (լուսանկարներ)

Երգչուհի Անի Քրիստին, թեև արդեն երկար ժամանակ է, ինչ բնակվում է ԱՄՆ-ում, և վերջերս էլ երգարվեստում «դադար է վերցրել», չի մոռացվել հայ հանդիսատեսի կողմից: Անին օրերս բոլորեց իր 27-ամյակը:

Ծննդյան օրվա անակնկալների, իր «լռության» և լիակատար երջանկության մասին երգչուհին կիսվեց Lurer.com-ի հետ:

-Անի՛, լրացավ Ձեր 27-ամյակը, ո՞ւմ հետ և ինչպե՞ս անցկացրեցիք այդ օրը:

-Ծննդյանս օրն անցկացրել եմ շատ գեղեցիկ միջավայրում՝ հարազատ մարդկանցով շրջապատված:

-Սովորաբար մեզ համար այդքան կարևոր օրը փոքր տարիքում ասոցացնում ենք նվերների հետ, շա՞տ բան է փոխվել այժմ:

-Բացարձակ ոչինչ չի փոխվել: Շարունակվում են լավագույն ավանդույթները: Բայց այս ամենի մեջ ամենակարևորը լավ ժամանակ անցկացնելն էր, ինչը, Փառք Աստծո, միշտ առկա է իմ ծննդյան տոներին:



-Իսկ նվերների հարցում քմահա՞ճ եք:

-Ոչ, բացարձակ: Ես սիրում եմ նվիրել ու նվերներ ստանալ: Ինձ համար դա գեղեցիկ ավանդույթ է և շատ հաճելի:

-Գիտեմ, որ այժմ սովորում եք, ի՞նչ մասնագիտությամբ և ինչո՞վ եք պատրաստվում զբաղվել ուսումն ավարտելուց հետո:

- Հիմա իմ մասնագիտության գծով կատարելագործում եմ գիտելիքներս (Անին սովորել է Կոմիտասի անվան կոնսերվատորիայում՝ հեղ.), բայց այս անգամ՝ անգլերենով: Հետագայում ուզում եմ դասավանդել: Մտածում եմ նաև երկրորդ մասնագիտության մասին, որը կլինի արվեստի ճյուղերից մեկին մոտ, սակայն դեռ հաստատ ոչինչ չեմ կարող ասել, թեև, որոշել եմ:

-Հայաստանում ամենուր Ձեզ ճանաչում են որպես երգչուհի Անի Քրիստի, չե՞ք հասցրել կարոտել հասարակության կողմից այդ ուշադրությանը՝ որպես ճանաչված անձ:

- Ես այստեղ էլ եմ բողոքում այդ ուշադրությունից (ծիծաղում է): Մեծամիտ չհնչի ասածս: Այստեղ ամենուրեք հայ համայնքում մարդիկ ճանաչում են, գեղեցիկ խոսքեր ասում:



-Ասում են, որ նրանք, ովքեր սովորում են ԱՄՆ-ի կյանքին, այլևս չեն կարող ապրել Հայաստանում: Համամի՞տ եք այդ կարծիքի հետ:

-Այո՛, համաձայն եմ: Կան մարդիկ, ովքեր ուշ են հարմարվում: Բայց որ հարմարվում են, արդեն շատ դժվար է լինում ընտելանալն այլ երկրում ապրելուն: Եվ խոսքը միայն Հայաստանում ապրելու մասին չէ:

-Եթե անկեղծ, ապա կարո՞ղ եք կրկին ապրել Հայաստանում:

-Այո՛, իհարկե կարող եմ: Շատ հարցերում միգուցե արդեն դժվարություններ լինեն, բայց ամեն ինչ մարդու համար է: Ինչու՝ մենք Հայաստանում չե՞նք ծնվել, մեծացել: Մենք չէ՞, որ տեսել ենք մութ ու ցուրտ տարիներ, մենք չե՞նք, որ մոմի լույսի տակ կրթվել ենք, հյուր ընդունել ու պատվով ճանապարհել:

Հիմա ավելի լավ է վիճակը, քան այն ժամանակ: Այնպես, որ ոչ մի բարդություն չեմ տեսնում:

-Ի՞նչ է այսօր Անիին պակասում լիակատար երջանկության համար:

-Փառք Աստծո, երջանիկների շարքին ինձ դասում եմ: Իսկ երջանկությունս ավելի լիակատար դարձնելու համար ես կցանկանայի ինքս ինձ՝ կարողանալ կողմնորոշվել ընտանիք կազմելու բարդ հարցում և ունենալ իմ նոր ընտանիքը՝ լի երազանքներով և հավատարիմ մարդկանցով։

Ի դեպ, նշենք որ երգչուհին իր ծննդյան օրվանից ընդամենը մի քանի օր առաջ ստացել է ԱՄՆ-ի քաղաքացիություն:

Հակոբյան Ռուբինա

Լուսանկարները՝ Անիի անձնական արխիվից 

{gallery}1059{/gallery}