Նաիրա Մովսիսյանի ծննդյան տոնի հյուրերը, նվերները եւ ադամանդապատ զգեստը

Դերասանուհի Նաիրա Մովսիսյանը մարտի 16-ին իր մտերիմների հետ նշել է 25-ամյակը: BRAVO.am-ը 2012-ին եւս անդրադարձել էր նրա ծննդյան տարեդարձին, իսկ այս տարի մեր ֆոտոխցիկը ֆիքսել է խնջույքի աամենահետաքրքիր ակնթարթները:):

Մեզ հետ զրույցում հոբելյարը պատմել է, որ իրեն անակնկալներ են մատուցել դեռ գիշերվանից, ստացել է զանգեր, շնորհավորանքներ, նվերներ, որոնց թվում՝ ծաղիկներ, փուչիկներ, զարդեր. «Առաջինը մայրիկս վարդ նվիրեց: Նրա ամենակարեւոր նվերն այն է, որ ինձ կյանք է պարգեւել: Անսպասելի էր, որ ուղիղ կեսգիշերին «Սկայպ»-ով զանգահարեցին Միացյալ Նահանգներում բնակվող պարող Միհրանի եւ ռեժիսոր Գոռի ծնողները՝ Կարո Կիրակոսյանն ու Ալլա Պողոսյանը: Նրանք մոմեր էին դրել, որոնք միասին օնլայն փչեցինք:), բացի այդ ուղարկել էին ծաղիկներ եւ բնական վարդերով զարդարված տորթ: Ինձ համար շատ հարազատ մարդիկ են, կարծես երկրորդ ծնողներս լինեն, զգացված եմ ջերմ վերաբերմունքից»:

Նաիրան իր մտերիմների հետ խնջույքը շարունակել է երեւանյան ռեստորաններից մեկում, որին ներկա են եղել դերասան ընկերներից Ռոզի Ավետիսովան, Մարինա Խաչատրյանը, Տաթեւիկ Ադումյանը, երգչուհի Ալլա Նավասարդյանը եւ ուրիշներ. «Միայն շատ հարազատ մարդկանց՝ 30 հոգու հետ եմ նշել: Ընկերներիցս մեկն էլ ասաց՝ եթե քիչ մարդկանցով եմ նշում, ուրեմն հասունացել եմ: Ընտրում եմ իմ ընկերներին ու խնդրում, որ երրորդ անձինք չխառնվեն նույնիսկ իրենց բացակայությամբ»:

Հաճախ կրելով իր կարած զգեստները՝ այս անգամ դերասանուհին նախապատվությունը տվել է «Ralph Lauren» ապրանքանիշի սպիտակ զգեստին. «Հագնելուց առաջ մի քիչ վախենում էի, որ կարող է ինձ ճանապարհին գողանային, որովհետեւ զգեստն ադամանդներով է պատված: Այն մեկ անգամ հագել եմ Միացյալ Նահանգներում ու բերել Երեւան»:

Ռեստորանից հետո էլ Նաիրա Մովսիսյանը ծննդյան տարեդարձը մինչեւ ուշ գիշեր շարունակել է նշել ընկերներից մեկի տանը. «Քանի որ իմ ընկերների հայրիկը երեկոյան պետք է Կանադայից ժամաներ Երեւան, մեր տանը խնջույքը շարունակելու փոխարեն առաջարկեցին իրենց տանը նշել: Այնքան լավ տրամադրություն ունեի, որ չեմ էլ խմել, չնայած՝ որքան էլ ալկոհոլ օգտագործեմ, չեմ հարբում: Միշտ բանականությամբ եմ առաջնորդվում, բայց միեւնույն ժամանակ շատ անկանխատեսելի եմ»:

Դերասանուհին BRAVO.am-ի հետ զրույցում անկեղծորեն պատմել է, որ տարեդարձից մեկ օր առաջ մտադրված է եղել ընդհանրապես չնշել ու կորել բոլորի տեսադաշտից, նաեւ չի սիրում ռեստորանային միջավայր. «Բայց հիշեցի, որ ծնունդս իմ ամենասիրելի տոնն է եղել, որովհետեւ ապրում եմ: Չփոշմանեցի, որովհետեւ ընկերներս օրս տոն դարձրին: Պարզապես կուզեի մյուս տարիներին բացը լրացվի սիրելի տղամարդու ներկայությամբ: Երկրպագուներիս կողմից անակնկալներ եղան, բայց հերիք է ինձ նվերներ տան, ուզում եմ կողքիս ուժեղ տղամարդ տեսնել: Ինչպես անցած տարի մոմերը փչելիս, այս անգամ էլ ցանկությունս իրական սեր ապրելն է: Իմ սիրտը հիմա ազատ է...»: