Հայկական բանակը մարտունակության առումով հաղթում է ադրբեջանական բանակին. զեկույց

Լոնդոնում տեղակայված ռազմավարական հետազոտությունների ինստիտուտը (The International Institute for Strategic Studies, IISS) պատրաստել է իր ամենամյա զեկույցը՝ նվիրված աշխարհի ավելի քան 160 երկրների ռազմական և ինքնապաշտպանական պոտենցիալին:

Զեկույցում մասնավորապես անդրադարձ է կատարվել Հայաստանի և Ադրբեջանի ռազմական հնարավորություններին. գրում է Contact.az-ը:

Զեկույցի հեղինակները նշում են, որ երկու երկրներն էլ բավականին գումարներ են ծախսում ռազմական ոլորտի ֆինանսավորման համար: Եթե Հայաստանը այդ նպատակով ծախսում է շուրջ 400 մլն դոլար, ապա Ադրբեջանը ռազմական ծախսերի համար հատկացնում է 1 մլրդ 770 մլն դոլար, ընդ որում, 2012-ին ծախսերը 90 մլն դոլարով ավելացել են՝ ի համեմատություն 2011-ի:

Ընդհանուր առմամբ, նշվում է փաստաթղթում, Ադրբեջանը ռազմական ծախսերի նպատակով օգտագործում է իր ՀՆԱ-ի 2.5%-ը, իսկ Հայաստանը՝ 4%-ը:

Զեկույցի հեղինակները նաև գնահատել են երկու բանակների մարտունակության մակարդակները: Այդ համեմատության մեջ Հայաստանը հաղթում է Ադրբեջանին:

«Հայաստանի զինված ուժերը բավականին մասնագիտացված են և հստակորեն պատկերացնում են իրենց առջև դրված նպատակներն ու խնդիրները: Բացի այդ, հայկական բանակում շատանում է պայմանագրային հիմունքներով մասնագիտացած զինծառայողների թիվը՝ չնայած այն բանին, որ պարտադիր զորակոչը շարունակում է գործել»,-ասված է զեկույցում:

Վերլուծելով Հայաստանի ԶՈՒ-ի առավելություններն ու թերությունները՝ զեկույցի հեղինակները նշում են, որ հայկական բանակի թույլ և խոցելի կողմը մնում են ռազմա-օդային ուժերը: «Հենց այդ պատճառով էլ Հայաստանի օդային սահմանների անվտանգության ապահովումը իր վրա է վերցրել Ռուսաստանը վարձակալված ավիաբազայի միջոցով». ասված է զեկույցում:

Մասնագետները բավականին քննադատաբար են վերաբերվել ադրբեջանական բանակի հնարավորություններին: Զեկույցում ասված է, որ չնայած Ադրբեջանի կողմից տպավորիչ քանակով զինամթերքի ձեռքբերմանը, որը հնարավոր է դառնում նավթի վաճառքից ստացած եկամուտների շնորհիվ, Զինված ուժերի ասպարեզում Ադրբեջանը ոչ մի կերպ չի կարողանում առավելություն ստանալ, ինչը կարող է լուրջ ռիսկի գործոն դառնալ Լեռնային Ղարաբաղում հնարավոր ռազմական գործողություններ ծավալվելու դեպքում:

«Նույն այդ նավթը Ադրբեջանին հնարավորություն տվեց գնել նորագույն C-300 համակարգ, սակայն դեռևս պարզ չէ, թե ինչ է դա առհասարակ տալիս Բաքվին մարտունակության բարձրացման տեսանկյունից»,-գրում է զեկույցը: