Ցրտահարության վտանգ չկա

Մարտի 18-ին ՀՀ ԱԻ նախարարությունում տեղի է ունեցել հերթական ամենշաբաթյա խորհրդակցությունը, որը վարել է նախարար Արմեն Երիցյանը։

Խորհրդակցության ընթացքում ՓԾ տնօրեն, գեներալ-մայոր Ս. Ազարյանը զեկուցեց շաբաթվա ընթացքում գրանցված արտակարգ պատահարների ու արձագանքման միջոցառումների մասին: Ս. Ազարյանը նաև տեղեկացրեց, որ բոլոր մարզերում ջրածածկումների թեմայով ուսումնավարժություններ են անցկացվել։

Ճապոնիայի զարգացման միջազգային գործակալության հետ համատեղ սկիզբ է դրվում սողանքների կառավարման նոր ծրագրի։ Շաբաթվա ընթացքում ճապոնացի մասնագետները հանդիպումներ կունենան տեղացի գործընկերների հետ՝ քննարկելու ծրագրի հիմնական ուղղությունները։

ՍՊԾ գործակալության պետ Հ. Պետրոսյանը տեղեկացրեց, որ պատրաստվել է երկրաքիմիական հորատանցքերի վերազինման ծրագրի նախագիծ։ Անցած շաբաթ ՍՊԾ մասնագետներն այցելել են Գառնու դիտարան, որտեղ մանրամասն ուսումնասիրության են ենթարկել այնտեղ առկա 3 հիմնական սարքերի վիճակը և կազմել եզրակացություն, որը պիտի ուղարկվի Մոսկվա՝ ԳԱԱ Երկրի ֆիզիկայի ինստիտուտի մասնագետներին, որոնք էլ ժամանակին նախագծել և տեղադրել են նշված սարքերը:

Հիդրոմետ ծառայության տնօրեն Լ. Վարդանյանը, ներկայացնելով առաջիկա օրերին սպասվող եղանակի կանխատեսումները, հայտնեց, որ հնարավոր ցրտահարությունների հետ կապված բնակչության շրջանում տարածվող մտավախությունները հիմք չունեն։ Մոտակա օրերին Արարատյան դաշտավայրում զրոյից ցածր ջերմաստիճան չի սպասվում։

ԱԻ նախարարին զեկուցեցին նաև, որ նրա հանձնարարականի համաձայն՝ Ճգնաժամային կառավարման պետական ակադեմիայի ուսանողների համար կազմակերպվում են այցելություններ տարբեր մշակութային օջախներ։

Խորհրդակցության ընթացքում նշվեց, որ ԱԻ նախարարության վարկանիշի բարձրացման հետ միաժամանակ՝ հանրապետության տարբեր ԲՈՒՀ-եր ցանկություն են հայտնում երկարատև պայմանագրեր կնքել նախարարության հետ՝ իրենց ուսանողների ուսումնական պրակտիկան ԱԻ նախարարության համակարգում կազմակերպելու համար։

Անդրադառնալով խոհրդակցության օրակարգի մյուս հարցերին՝ նախարար Ա. Երիցյանը հանձնարարեց սերտացնել համագործակցությունը ԼՂՀ փրկարար ծառայության հետ՝ օժանդակելով կադրերի վերապատրաստման և տեղում ճգնաժամային կառավարման կենտրոն հիմնելու գործում։