Համագործակցություն` ԱՌՆԱՊ-ի շրջանակներում

Մարտի 14-ին Ալմաթայում տեղի է ունեցել Աղետների ռիսկի նվազեցման (ԱՌՆ) Միջինասիական և Անդրկովկասյան երկրների տարածաշրջանային համագործակցության հանդիպում, որը կազմակերպել էր ՄԱԿ-ի ԱՌՆ գրասենյակը: Հանդիպմանը մասնակցում էին Հայաստանի, Վրաստանի, Ադրբեջանի, Ղազախստանի, Ղրղզստանի, Ուզբեկստանի, Տաջիկստանի և Թուրքմենստանի ներկայացուցիչները:

Հիմնական նպատակն էր քննարկել 2015 թ. հետո Հյոգոյի գործողությունների ծրագրի (ՀԳԾ) շարունակականության ապահովման հետ կապված և ԱՌՆ տարածաշրջանային պլատֆորմ ստեղծելու հարցերը: Առաջին կետի շուրջ հայկական պատվիրակությունն առաջարկեց նույնը թողնել ՀԳԾ ներկայիս հինգ ուղղությունները՝ զարգացնելով դրանց գործառույթները։ Քանի որ Ճգնաժամային կառավարման տեսանկյունից՝ ներկայիս ուղղություններն ապահովում են միայն աղետներին նախապատրաստման և արձագանքման փուլերի իրականացումը, բաց թողնելով վերականգնման փուլը, մեր պատվիրակությունն առաջարկեց 2015 թ. հետո ընդգրկել նաև վերականգնման փուլի գործառույթները՝ այդպիսով ապահովելով ճգնաժամային կառավարման ամբողջական ցիկլը (նախապատրաստում, արձագանքում և վերականգնում):

Հայկական պատվիրակությունը կողմ արտահայտվեց ԱՌՆ տարածաշրջանային պլատֆորմ ստեղծելու գաղափարին և դրա վարչական կենտրոնն Ալմաթայում տեղակայելուն։ Որպես համագործակցության տեսանելի օրինակ՝ առաջարկվեց տարածաշրջանային պլատֆորմի կրթական կենտրոնը հիմնել ՀՀ ԱԻՆ Ճգնաժամային կառավարման պետական ակադեմիայում: Նշյալ առաջարկները հավանության արժանացան և կքննարկվեն Ժնևում կայանալիք ԱՌՆ գլոբալ պլատֆորմի հանդիպմանը:

Հանդիպման վերջում կնքվեց համագործակցության հուշագիր՝ Հայաստանի և Ղրղզստանի ԱՌՆ ազգային պլատֆորմների միջև: Այն նպատակ ունի սերտացնել երկու երկրների պլատֆորմների միջև համագործակցությունը:

Հայկական պլատֆորմի կառուցվածքային մոդելով առավել հետաքրքրված էին Տաջիկստանի և Թուրքմենստանի ներկայացուցիչները, որոնց հետ ձեռք բերվեց բանավոր համաձայնություն՝ առաջիկայում անցկացնել փորձի փոխանակման քննարկումներ: