«Նորաձևության ոստիկանություն». Քննում է Հրանուշ Եղոյանը

Շպռօտի պես բեմում և առօրյայում միմյանցից խիստ տարբեր կերպարներ ստեղծող անձնավորության չեմ ճանաչում: Անին և Շպռօտը միանգամայն տարբեր են: Առօրյայում Անին միշտ թույլ դիմահարդարմամբ է, ինչը շատ եմ գնահատում: Բեմում Շպռօտը ինձ ոչ այնքան հոգեհարազատ կերպարում է: Կարծում եմ՝ այն դիմահարդարումը, որ նրան անում են, գռեհիկ է: Եթե նրա հետ ես աշխատեի, այլ կերպ կներկայացնեի նրան: Շպռօտը մեծ ներուժ ունեցող երգչուհի է, նրան կարելի է շատ ավելի հետաքրքիր ներկայացնել:

Էմմին անսովոր, հետաքրքիր բեմական կերպար ունի. իսկապես ոչնչից չի վախենում: Նրա հետ բազմիցս եմ աշխատել և երբևէ չեմ ձանձրացել: Էմմիից միշտ մեծ ակնկալիքներ ունեմ: Չեմ կարող ասել, որ նրա մոտ միշտ հաջողված կերպար է ստացվում, բայց մեծամասամբ գրագետ ու ճիշտ լուծումներ է գտնում:

Քրիստինե Պեպելյանի դիմահարդարումը նախկինում շատ միակերպ էր, բայց հիմա բավականին փոփոխությունների է ենթարկվել: Գնահատելի է, որ Քրիստինեն առօրյայում շատ պարզ, ոչ ծանր դիմահարդարմամբ է. սպորտային կերպար է՝ առօրյա ոճի մեջ: Բեմում նա տարբերվում է, ինչը շատ ողջունելի է: Նրա հետ ընդամենը մի քանի անգամ եմ աշխատել:

Արմինկայի հետ բազմիցս եմ աշխատել: Նա շատ հաճելի և հետաքրքիր անձնավորություն է: Սիրում է նոր «փորձությունների» ենթարկել իր արտաքինը: Նրա հետ բավականին հեշտ է աշխատելը: Փորձում է միշտ գրագետ լինել և ինքն իր հանդեպ շատ պահանջկոտ է: Առօրյայում գերադասում է խնամված մաշկ ունենալ և դեկորատիվ դիմահարդարման միջոցներ քիչ օգտագործել:

Սիլվա Հակոբյանի կերպարը դեռ շատ անմշակ է, չկա բեմական հստակ կերպար, որում կարող ես նրան փոքր-ինչ հղկել: Կարծում եմ՝ նրա բեմական կերպարը դեռ ձևավորված չէ: Ինչպես երգերն են միմյանցից տարբեր, այնպես էլ դիմահարդարումը: Իր ոճը դեռ չի գտել:

Ալլա Լևոնյանին պետք է որոշակի փոփոխությունների ենթարկել: Ալլայի մոտ դիմահարդարում՝ որպես այդպիսին, չեմ տեսնում, շատ աննկատ է: Բնական է, որ դիմահարդարում արվում է, բայց գուցե մասնագետը այնպես չի աշխատում, որ նրա արտաքինում փոփոխությունը ակնհայտ լինի: Նրա ուրախ երգերին համապատասխան կարելի է շատ դինամիկ կերպարներ ստանալ:

Նազենի Հովհաննիսյանը առաջ հաճախ էր առօրյայում տոնական դիմահարդարմամբ, բայց հիմա նա այդ սխալն ուղղել է: Նազենին այնքան ցայտուն ու վառ դիմագծեր ունի, որ նույնիսկ չնչին դիմահարդարումը նրա դեմքին չափից ավելի է երևում: Նազենին վառ ու գունավոր անձնավորություն է: Նրան չի սազում այլ կերպար:

Աննա Կոկչյանի մոտ ամեն ինչ կեղծ է: Նրա մոտ ամեն ինչ չափից շատ է: Նա գեղեցիկ դիմագծեր ունի և սեքսուալ կնոջ կերպարը, որն ուզում է ստանալ, ավելի լավ կարելի է անել քիչ, քան շատ դիմահարդարմամբ:

{gallery}1067{/gallery}

«Ե՞ս Yes!» ամսագիր, արխիվ