Գրադարաններն ապահովված կլինեն ջեռուցմամբ, իսկ մանկապարտեզները շարունակելու են գործել անվճար

Երևանի ավագանին միաձայն կողմ քվեարկությամբ հավանություն է տվել Երևան համայնքի սեփականություն համարվող մի շարք բնակարաններ անհատույց օտարելու մասին, ինչպես նաև ԳԱԱ ակադեմիկոս, ՀՌՀ հիմնադիր ռեկտոր, ականավոր գիտնական, հայ-ռուսական գրական և մշակութային կապերի մեծանուն գործիչ Լևոն Մկրտչյանի, ՀՀ գիտության վաստակավոր գործիչ, ԽՍՀՄ ԲԳԱ թղթակից անդամ, պետական մրցանակների դափնեկիր, բժշկական գիտությունների դոկտոր, պրոֆեսոր Վիլեն Աստվածատրյանի հիշատակը հավերժացնող հուշատախտակներ փակցնելու մասին որոշման նախագծերին:

Ընդմիջումից հետո, հարց ու պատասխանի ժամանակ պատասխանելով ավագանու ՀՀԿ խմբակցության անդամ Աննա Ասատրյանի՝ գրադարանների ջեռուցման ծրագրին առնչվող հարցին, քաղաքապետ Տարոն Մարգարյանը նշել է, որ 2013թ. բյուջեով համապատասխան գումար արդեն իսկ նախատեսված է, և 2013թ տարեվերջին ինչպես քաղաքապետարանի ենթակայության բոլոր գրադարանները, այնպես էլ մշակութային մյուս հաստատություններն ապահովված կլինեն ջեռուցմամբ:

Հաղթանակ գյուղում գյուղատնտեսական նշանակության հողերի իրավական կարգավիճակը ճշտելու մասին ԲՀԿ խմբակցության անդամ Ջիվան Պողոսյանի հարցին ի պատասխան քաղաքապետը նշել է, որ խնդիրը քաղաքապետարանի ուշադրության կենտրոնում է, և նման հարցեր կան նաև այլ վարչական շրջաններում: Քաղաքապետարանը, սակայն, առաջնային է համարում նման իրավական խնդիրներ ունեցող բնակարանների հարցի կարգավորումը, որից հետո, համապատասխան փաստաթղթային հիմնավորումների առկայության պարագայում, լուծում կտրվի նաև հողերի խնդրին: Անդրադառնալով համայնքի ենթակայության մանկապարտեզների գործունեությանը՝ քաղաքապետը վստահեցրել է, որ դրանք շարունակելու են գործել անվճար հիմունքներով, ինչի վերաբերյալ 2013թ. բյուջեով համապատասխան ֆինանսավորում է հատկացված: