Այսօր Վարդուհի Վարդերեսյանի ծննդյան օրն է

Լրացավ Մեծ դերասանուհու 85-ամյակը:

Ծնվել է 1928թ. մարտի 19-ին, Ռումինիայի մայրաքաղաք Բուխարեստում: Դերասան, թատերագետ Գևորգ Աբաջյանի կինն է:

1946թ. տեղափոխվել է Հայաստան:

Դերասանուհու բեմելը եղել է Նուբարաշենի ինքնագործ թատրոնում:

1947-ին ընդունվել է Լենինականի դրամատիկական թատրոնին կից ստուդիան և նույն թվականից խաղացել է թատրոնում:

1958-ից տեղափոխվել է Երևանի Սունդուկյանի անվան թատրոն:

Նրա խաղացած հայտնի դերերից են՝ Շիրվանզադեի «Պատվի համար»՝ Մարգարիտ, Չեխովի «Բալենու այգի»՝ Ռանևսկայա, Քլերի Ցախնասյան, Սարոյանի «Իմ սիրտը լեռներում»՝ Ջոնի, Շանթի «Հին աստվածներ»՝ Իշխանուհի և այլն:

Խաղացել է նաև արևմտահայ դերերում՝ «Պաղդասար Աղբար»՝ Անույշ և այլն: Նկարահանվել է «Պատվի համար», «Մոր սիրտը», «Ճանապարհ դեպի կրկես», «Հայրիկ», «Կարինե» և այլ ֆիլմերում: Հայաստանի Ազգային ռադիոյի ոսկե ֆոնդում ունի ավելի քան 100 ձայնագրություն: 1958թ-ից նկարահանվել է հեռուստաներկայացումներում, ի դեպ, եղել է առաջին հեռուստաներկայացման դերասանուհիներից: 1985թ. հրավիրվել է Սիրիայի Հալեպ քաղաքի «Ադամյան» թատրոն, որտեղ արժանացել է ոսկե մեդալի:

Ստացել է բազմաթիվ պետական բարձրագույն պատվոգրեր, մրցանակներ, շնորհակալագրեր: 1965թ. արժանացել է ՀԽՍՀ, 1988թ.՝ ԽՍՀՄ ժողովրդական արտիստի կոչմանը: 1995թ. պարգևատրվել է ՀՀ «Մովսես Խորենացի» մեդալով, 2001թ.' Երևանի պատվավոր քաղաքացու կոչումով: