Երկրում դիֆիցիդ բաներ շատ կան, սակայն ամենակարևորը իսկականի պակասն է. Սոս Սարգսյան

Ստորև ձեզ ենք ներկայացնում Սոս Սարգսյանի «Վարագույրից այն կողմ» (տե՛ս նաև` «Ինչից է, որ մեր սուրը դառնում է «Թուր կեծակի», երբ բարձրացնում ենք իրար վրա. Սոս Սարգսյան», «Միտինգներում ուժաքամ եղավ ժողովուրդը, միտքն ու կիրքը թողեց Ազատության հրապարակում. Սոս Սարգսյան», «Կոմիտասի ոգին ոչ միայն չի թևածում, այլև իսկի ներկա էլ չէ. Սոս Սարգսյան», «Ազգային զգացմունքի սպեկուլյացիա կամ գավառական լալկանություն. Սոս Սարգսյան», «Խուլիգանը ազգություն չունի. Սոս Սարգսյան») գրքից մի փոքրիկ հատված:

Երկրում դիֆիցիդ բաներ շատ կան, սակայն ամենակարևորը իսկականի պակասն է. ասենք` իսկական բժշկություն, թատրոն, ուսում, իսկական նվիրում, իսկական հայրենասեր, իսկական ղեկավար … Խաբուսիկ, թվացյալ բաներով չթվացնենք մեզ, թե հայրենասիրական այս շմոլի մեջ իրար դեմ ատելություն սերմանելով, սրա-նրա վարկը գցելով, կասկածելով, մերժելով թունդ հայրենասեր ենք և վիթխարի օգուտ ենք տալիս ժողովրդին:

Գործադուլ, դասադուլ անողը նախ նրա վնասն ու օգուտը պետք է դնի կշեռքի նժարին, թե չէ …

Մինչև երկրաշարժն արդեն անժամկետ գործադուլները կոպիտ հարված էին մեր սեփական տնտեսությանը. Խաթարվեց ոչուփուչ մեր կարգապահությունը, ոչուփուչ ուսումը: Տեղից ձիգ չէինք, դարձանք անփույթ, մաքրասեր չէինք առանձնապես, քաղաքները կեղտի մեջ կորցրինք. Հազար ու մի բան … Տնտեսական մեր ուժն է Արցախի հենարանը …

Իշխանության հեղինակություն. Մոռացված բան: Հրամայել են և` վերջ: Գորբաչովը ձնհալ բերեց հետը, ու տակից երևաց անջրպետը, օտարացումը, որ կար ժողովրդի ու ղեկավարների միջև: «Որ կոծկես, ի՞նչ ես շահելու …»

Մտահոգվողը լրջորեն պետք է մտահոգվի: Մի խոսքով … Մի խոսքով` «ներքևը» ուժերը սպառում է «վերևին» չսիրելու վրա, մի խոսքով` ուժերի անտնտես վատնում: Շռայլություն:

Տիրասիրություն չենք ունեցել ու չունենք. տերե՞րը չեն եղել լավը … Մե՞նք էն չենք … «Մեր ուժը այդ է, դրա մեջ է, - շատերն են այսպես դատում, - այդպես ենք գոյատևել, ամեն հայ մի գեղի իշխան»:

Գոյատևեցինք «աբսուրդային այս տարածքում». մենք մնացինք իշխան, մեր «գեղերը շան բերան…» 18-19 թվականներին Աստաֆյան փողոցում հայաոց պառլամենտի դեպուտատներին կառքից իջեցնում էին, ծեծում … Տխրահռչակ մեր չտիրասիրությամբ, տխրահռչակ մեր խորամանկությամբ տասից ինը կորցրինք …

Ամաչելու բաները մոռանանք: Մոռանա՞նք որ …

 Նյութը`  Ք. Ա-ի