Սերժ Սարգսյանը «ապտակե՞ց» ԲՀԿ-ին

Սերժ Սարգսյանի ասուլիսը՝ հատկապես կառավարության կազմում «կարդինալ» փոփոխություններ չանելու միտքը, դեպրեսիա է առաջացրել ԲՀԿ շարքերում: ԲՀԿ-ականներից շատերի մոտ այսօր նկատելի էր «աշխարհը փուլ է գալիս, դեռ մի կտոր էլ պոչիկիս ընկավ» սինդրոմը. «էլ ի՞նչ, սենց որ գնաց, էլ ոչ մի բան էլ չի լինի, հեսա լրիվ երկիրը կդատարկվի…»: ԲՀԿ-ականների հոգում տիրող փոթորիկն անմիջական դրսևորում ստացավ խորհրդարանական հայտարարությունների ժամին:

Հարձակման թիրախում հիմնականում վարչապետ Տիգրան Սարգսյանն էր: «Ադեկվատ կառավարություն» երազող և այդ տեսլականով վերջին շրջանում կուսակիցներին կերակրող Նաիրա Զոհրաբյանը ևս մի փորձ կատարեց՝ Մշակույթի նախարարի պորտֆելին «տիրանալու» համար: ԲՀԿ քարտուղարի ելույթը նվիրված էր գրքին՝ գրքի համաշխարհային մայրաքաղաքում մեր ապաշնորհ կառավարության կողմից գրավաճառներին հենց միզահոտով ստորգետնյա անցում հրամցնելու փաստին:

Վահան Բաբայանի նկարագրած գույների սպեկտրն ավելի լայն էր և ավելի մռայլ: Այս անգամ գրավաճառներին միացան նաև ատամնաբույժները, տաքսիստները, արտագաղթողները և, բնականաբար, այդ ամենի մեղավորը դարձյալ վարչապետ Տիգրան Սարգսյանն էր: «Այս կառավարությունն օրեցօր դատարկվող Հայաստանը տարել է փակուղի»,- եզրակացրեց պատգամավորը՝ կարդալով վճռի վերջին տողերը. «Տիգրան Սարգսյանի վերանշանակումն ուժգին ապտակ կլինի հասարակությանը»:

Ապարանցի Լյովա Խաչատրյանն ավելի առաջ գնաց և է՛լ ավելի էմոցիոնալ երանգներ հաղորդեց «տիգրանսարգսյանական» աղետին: Պատգամավորը պատմեց, թե անցած օրը գյուղում մի կին իրենից մի պարկ ալյուր է խնդրել՝ բացատրելով, թե տանն ուտելու բան չունեն, քանի որ տղան հերթական անգամ տուգանվել է արագաչափերի կողմից: Տանը եղած-չեղած գումարն իրար վրա են դրել՝ ստացած թոշակ, նպաստ, ու վճարել: «Ավելի լավ էր տղես ավարիա տար, մեռներ, քան էսքան տուգանք տայինք»,- ասել էր կինը: «Որ պիտի տուգանվեն, բնական է, բայց ախր տուգանքները պետք է համարժեք լինեն թոշակներին ու աշխատավարձերին»,- ասում է պատգամավորը: Իսկ ի՞նչ կապ ունի այս ամենի հետ Տիգրան Սարգսյանն ու կառավարությունը: Անմիջական: Պատգամավորը հաշվել էր, թե մեկ ամսվա կտրվածքով արագաչափերի տուգանքները մոտ 2 մլրդ դրամ են կազմել: Արագաչափերը Տիգրան Սարգսյանի «Հայկական աշխարհի» առանցքն է. ալյուր խնդրող կինը անիծում էր սեփական զավակին՝ ինչ է թե նա զրկել էր ընտանիքին ապրուստի միջոցից՝ տուգանվելու պատճառով. կարելի է երևակայել, թե 2 միլիարդի հասնող տուգանքների տերերի մեջ քանիսն են անիծում հենց Տիգրան Սարգսյանին ու նրա «Հայկական աշխարհը»: «Բերեք ավարտե՛նք ««Հայկական աշխարհ» ծրագիրը»՝ եզրափակեց իր հայտարարությունը ԲՀԿ-ական պատգամավորը:

ԲՀԿ խոսնակ Տիգրան Ուրիխանյանն իր քննադատությամբ իշխանությունների վրա կազմակերպած համընդհանուր գրոհը սահուն կերպով տեղափոխեց դեպի Երևանի ավագանու ընտրությունների քարոզչական դաշտ: «Չկա՛ փող, չկա՛ միջոց, երևանցիների համար բա՛ն չկա, բայց կան շքեղ ավտոմեքենաներ, կա 81 մլն ծախս Երևանի քաղաքապետարանի գործուղումների համար: Էդ քաղաքապետարան է՞, թե՞ արտգործնախարարություն, որ էդքան գործուղումների են գնում: Կամ 344 մլն 600 հազար դրամ հատկացվել է շենքերի լուսավորման համար, կամ 73 մլն դրամ՝ դրոշների համար: Մյուս կողմից Վոլոչկովա կա, բան կա…»:

Ի տարբերություն ԲՀԿ-ականների՝ ՀՀԿ-ականներն այս անգամ բավական զուսպ էին: Չարձանագրվեց ո՛չ գերդոզավորված քծնանք առ Սերժ Սարգսյան, ո՛չ էլ որևէ մեկի մտքով անցավ «կրկնել» Հունան Ավետիսյանի սխրանքն ու կրծքով փակել Տիգրան Սարգսյանին ուղղված համազարկերի ճանապարհը: Ի դեպ, ԲՀԿ-ականներին պատած դեպրեսիան, կարծես թե, վարակել է նաև խորհրդարանի խոսնակին: Հովիկ Աբրահամյանի անկումային տրամադրությունը վերջին շրջանում արդեն իսկ ֆիքսվել էր, սակայն հայտարարությունների ժամին Արգամիչի վրա, կարելի էր ասել, գույն չկար, ընդհանրապես՝ Արգամիչից էլ հետք չկար՝ չկար ո՛չ նախկին էնտուզիազմը, ո՛չ նախկին ինքնագոհությունը, ինքնագոհությունից բխող ռեպլիկներն ու հումորը…

Լուսինե Կեսոյան