Ադրբեջանցի երիտասարդների «արկածախնդրությունը» կձախողվի

Ինչպես արդեն տեղեկացրել էինք, ադրբեջանցի երիտասարդների մի խումբ որոշել է ոտքով անզեն երթ կազմակերպել դեպի Լեռնային Ղարաբաղ. նրանք մտադիր են շարժվել դեպի Աղդամ (այժմ՝ Ակնա):

Նախաձեռնության կազմակերպիչները կոչ են անում մայիսի 8-ին հավաքվել Աղդամի շրջան տանող ճանապարհի մուտքի մոտ:

Անդրադառնալով ադրբեջանցի ակտիվիստների այս նախաձեռնությանը՝ ադրբեջանագետ Սարգիս Ասատրյանը Lurer.com-ի թղթակցի հետ զրույցում ասաց, որ դա մի քանի կազմակերպությունների նախաձեռնություն է:

«Պետք չէ շատ լուրջ վերաբերվել այդ նախաձեռնությանը: Ես չեմ կարծում, որ շատ մարդ կմիանա երիտասարդներին»:

Հարցին, թե ինչ խնդիր են նրանք առաջ բերում, ինչ ազդակ են դրանով ցանկանում փոխանցել, ադրբեջանագետն ասաց.

«Հայտարարում են, թե ոտքով, անզեն ցանկանում են գալ Ղարաբաղ: Բայց, ամեն դեպքում, եթե կարողանան նախաձեռնությունն ի մի բերել, փորձեն գալ, նրանց ոչ ոք չի թողնի հատել սահմանը. հասկանո՞ւմ եք՝ զինվորը նրանց չի թողնի անցնել: Սահմանը կարող են անցնել, եթե հատուկ թույլտվություն լինի, օրինակ, երբ բարձաստիճան պաշտոնյա լինի եկողը և նախօրոք պայմանավորվածություն լինի»,-ասաց Սարգիս Ասատրյանը:

Վերջինիս խոսքով՝ այս նախաձեռնությունը երիտասարդական կազմակերպությունների մակարդակով է արվում՝ անկախ  այն բանից, թե դրա ետևում ով է կանգնած: 

Նշենք, որ երիտասարդ ակտիվիստները Facebook սոցիալական ցանցի իրենց էջում գրել են. «Որքան մենք շարունակենք սպասել, այնքան ավելի շատ կկորցնենք Ղարաբաղը: 20 տարվա ընթացքում չլուծված խնդիրը մենք ինքներս կլուծենք: Ո՛չ միջազգային ուժերը, ո՛չ գործող իշխանությունները չեն մեղադրի մեզ դրա համար: Մենք պատերազմ չենք ուզում: Մենք տուն ենք վերադառնում: Ղարաբաղի հանդեպ սերը մենք գործով ենք ապացուցում: Ոտքով և առանց զենքի: Որքան մենք շատ լինենք, այնքան քիչ արգելքներ կհանդիպեն մեր ճանապարհին: Մենք աշխարհին կապացուցենք, որ մենք իրավացի ենք»,-ասված է սոցցանցում տարածված հայտարարության մեջ:

Նելլի Ավետիսյան