Միշոն հարևանություն չի անում

«Զգուշացիր հարևաններից» խորագրի շրջանակներում ներկայացնում ենք, թե ինչպիսի հարևան կարող են լինել շոու-բիզնեսի արական սեռի ներկայացուցիչները. նրանցից առաջինը ռեփեր Միշոն է: Միշոյի հարևաններից հետաքրքիր էր պարզել՝ ինչպիսին էր ռեփերը մանկության տարիներին, ինչպիսին է այսօր և արդյոք լա՞վ հարևան է՝ փորձեցինք ճշտել նրա դրկիցներից, ինչպես նաև իմանալ՝ արդյոք նա էլ ազատ ժամանակ բակի տաղավարում նարդի կամ բլոտ խաղո՞ւմ է, թե՞ գերադասում է իր սեփական ակումբն ու այնտեղ հավաքվող հարազատ դեմքերի ընկերակցությունը:

Նոր նորքի 7-րդ զանգվածի բարձրահարկ շենքերից մեկի վեցերորդ հարկում բնակվում է «Հայ թիմի» ներկայացուցիչ Միշոն՝ ծնողների և եղբոր՝ Դավթի հետ: Ժամանակին այդ շենքում են բնակվել նաև ջազմեն Լևոն Մալխասյանը, ռեժիսոր Արմեն Մազմանյանը: Իսկ ընդհանրապես Նոր նորքի 7-րդ զանգվածում՝ չնայած քաղաքի կենտրոնից կտրված լինելուն, բավականին հայտնիներ կան. օրինակ՝ «Հայ թիմի» Համոն, «Հայլուրի» հաղորդավարուհի Սոնա Թորոսյանը և այլք:

Պարզվում է՝ Միշոյի երկրպագուհիները շատ լավ գիտեն երգչի տան հասցեն և երբեք այն չեն շփոթում հարևանների հասցեների հետ:
Միշոյենց բակում պատահած առաջին իսկ բնակչից փորձեցի տեղեկանալ՝ ճանաչո՞ւմ է ռեփերին, որին ի պատասխան հարևանուհին ասաց. «Անձամբ չենք շփվում, ոչինչ չեմ կարող ասել: Պարզապես գիտենք, որ մեր շենքում է բնակվում»: Իսկ երբ բակում խաղացող մի երեխայի հարցրեցի՝ սիրո՞ւմ ես Միշոյին, անմիջապես պատասխանեց՝ չէ:

Միշոյի հարևաններից տիկին Զարիկը անմիջապես սկսեց պատմել երգչի մանկությունից՝ նշելով, որ այժմ այնքան էլ շատ չի տեսնում նրան: «Շատ լավ երեխա էր, շատ էինք սիրում, պահում էինք: Իմ երեխաների նման սիրում էի, եթե մի օր չէինք տեսնում, կարոտում էինք»,- ասաց Զարիկ տոտան: Իսկ նրա որդի Գրիգորը, ով ավելի շատ Միշոյի հետ շփվում է դրսում, նույնպես հիշեց Միշոյի մանկությունը: «Մենք շատ լավ մանկություն ենք ունեցել. բակում շատ էինք խաղում: Մենք էլ ենք խաղացել ավազով, քարերով, մենք էլ ենք կռիվ արել,- պատմեց Միշոյի մանկության խաղընկեր Գրիգորը՝ շարունակելով-, այժմ միայն բակում ենք հանդիպում, երբ Միշոն երեկոյան ուշ տուն է գալիս, մենք էլ բակում ենք լինում, կանգնում ենք, զրուցում: Հարևանութjուն անել չի հասցնում, շատ զբաղված է և հաճախ տանը չի լինում»:

Տիկին Զարիկը նշում է, որ Միշոյին շատ է սիրում, բայց ռեփ ընդհանրապես չի լսում: «Ոչ մի կապ չունի, թե նա ինչ է երգում, դեռ մանկուց էլ շատ եմ սիրել նրան»,- ավելացրեց նա:

Երգչի տան դիմացի հարևանուհի տիկին Մարիամն ու իր աղջիկն էլ՝ Կարինեն, նույնպես պատմեցին՝ թե ինչպիսին է Միշոն տանը, հարևանների շրջապատում: «Երբ Միշան փոքր էր ու իրենց տուն էի մտնում, միշտ տեսնում էի, որ մայրը՝ Ալլան, նրա ու եղբոր՝ Դավթի համար հեքիաթ է կարդում: Շատ լուրջ երեխա էր. սիրում էր կարդալ, նաև բանաստեղծություններ էր գրում»,- ասաց տիկին Մարիամը, իսկ Կարինեի խոսքերով՝ Միշոն արդեն 14-15 տարեկանում երգեր էր գրում: «Այդ ժամանակ ես Բրյուսովի անվան համալսարանում էի սովորում, իսկ Միշոն նաև անգլերեն երգեր էր գրում: Ամեն անգամ բերում էր, որ տեսնեմ՝ ամեն ինչ ճի՞շտ է գրված. հետո էլ ասում էր՝ արի Շեքսպիրի նման ձևավոր գրենք»,- հիշեց Կարինեն: Տիկին Մարիամը պատմեց նաև, որ Միշոն պատանեկության տարիներին բասկետբոլի և լողի է հաճախել. «Միշտ գալիս և ամուսնուս ասում էր, որ միասին գնան մեր բակի խաղադաշտում բասկետբոլ խաղան»:

Հարևանուհու պատմելով՝ երբ առաջին անգամ Միշոյին տեսել են հեռուստաեթերով, անմիջապես նրանց տուն են վազել: «Մեզ համար մեծ անակնկալ էր՝ չգիտեինք և չէինք սպասում. առաջին երգը «Հարազատ քուչան» էր, երբ լսեցինք՝ հասկացանք, որ դա մեր բակի, շրջապատի մասին է»,- ասաց Կարինեն:

Ըստ տիկին Մարիամի՝ Միշոն շատ էր սիրում նոր թխած հաց: «Ամեն անգամ, երբ նոր հաց էի թխում, անպայման նրա համար պահում էի: Միշտ ասում էր՝ Մարիամ տոտա, ոչ մի հաց քո թխած հացից համով չի»,- ժպտալով վերհիշեց հարևանուհին:

Պարզվում է՝ Միշոյի երկրպագուհիները դիմացի հարևանուհու տուն նվերներ են բերում, որոնք Մարիամ տոտան սիրով փոխանցում է երգչին: «Վերջին անգամ կոնֆետների հավաքածու և նամակ էին բերել: Այն օրն էլ երկու երեխա էին եկել, որ Միշոյին տեսնեին. նրանցից մեկը Ապարանից էր և փոձում էր Միշոյի մասին տեղեկություններ իմանալ՝ ընկերուհի ունի, թե՝ չէ»,- պատմեց տիկին Մարիամի աղջիկը՝ Կարինեն:
Մարիամ տոտան պատմեց նաև, որ երբ վերջերս Միշոյին հեռուստատեսությամբ ուղիղ եթերի են հրավիրել, այդ օրը մայրն արդեն աշխատանքի է գնացած եղել, իսկ երգիչը արդուկած վերնաշապիկ չի ունեցել, բայց և ամաչել է դիմել ամենամոտ հարևանուհուն: Ստիպված Միշոյի մայրն է զանգահարել ու խնդրել՝ արդուկել տղայի վերնաշապիկը: «Միշայի մայրը զանգեց, ասում է՝ կգնա՞ս Միշոյի համար մի հատ վերնաշապիկ արդուկես: Ես էլ, բնականաբար, կատարեցի հարևանուհուս խնդրանքը. երկու վերնաշապիկ արդուկեցի, դրանցից մեկն էլ «Ֆորտ Բոյար»-ից էր բերել: Մի քանի ժամ անց տանը հեռուստացույց էինք նայում ու լրիվ մոռացել էինք Միշայի ուղիղ եթերի մասին: Հենց եթերում հայտնվեց Միշան, բացականչեցի՝ վաա¯այ, էսօր էս վերնաշապիկից եմ արդուկել…»,- ծիծաղելով պատմեց հարևանուհին:
Մարիամ տոտայի թոռնիկը՝ Արտյոմը, նույնպես մասնակցում էր մեր զրույցին: Երբ նրան հարցրի' Միշոյին տեսնելիս հետը շփվո՞ւմ է, պատասխանեց. «Երբ ինձ տենում ա, ասում ա՝ բա ե՞րբ ես ամուսնանալու»:

Հարևանուհիների խոսքերով՝ ժամանակ առ ժամանակ Միշոյի հյուրերն են լինում «Հայ թիմի» մյուս ներկայացուցիչները՝ DJ Սերժոն, Համոն և այլք:

«Ե՞ս Yes!» ամսագիր, արխիվ