Շատ խելացի ու կշռադատված նախարար Հրաչյա Ռոստոմյան

Մի բան է շարքային նախարար լինելը, մեկ այլ բան՝ խելացի ու կշռադատված նախարար լինելը, քանի որ խելացի ու կշռադատված նախարարը ապրում է խելացի ու կշռադատված, գործում է խելացի ու կշռադատված, պատասխաններ է տալիս խելացի ու կշռադատված և, վերջապես, կարելի է ենթադրել, անգամ փռշտում է՝ խելացի ու կշռադատված:

Այսօր վերջապես բացահայտվեց, թե ով է մեր կառավարության ամենա-ամենա խելացի ու կշռադատված նախարարը: Ազգային ժողովում կառավարության հետ հարցուպատասխանի ժամանակ ՀՅԴ-ական պատգամավոր Աղվան Վարդանյանը հարց ուղղեց Կապանում դեռևս 2009թ. սկսված սոցիալական բնակարանաշինության ծրագրի ընթացքի հետ կապված: Այս ծրագրով նախատեսվում էր շուրջ 315 երիտասարդ ընտանիքների՝ մանկավարժների, դասախոսների, բժիշկների՝ երևանյան համանման ծրագրի տարբերակով հատկացնել մատչելի բնակարաններ: Մեկնարկած շինարարությունը վաղուց դադարել է, շինարարական տեխնիկան էլ՝ հեռացել անհայտ ուղղությամբ:

Սպորտի և երիտասարդության հարցերի նախարար Հրաչյա Ռոստոմյանը, պատգամավորից լսելով, որ Կապան քաղաքում ինչ-որ բնակարաններ, ինչ-որ երիտասարդ ընտանիքների, մի խոսքով, իր նախարարությանը վերաբերող ինչ-որ հարց են տալիս, բնականաբար, միանգամից կողմնորոշվեց, ոտքի կանգնեց, մոտեցավ «ամենայն հայոց» վարչապետ Տիգրան Սարգսյանին, խոնարհվեց, լսեց վերջինիս հայրական հորդորները, հետո խոնարհումից դուրս եկավ և իր սլացիկ հասակն ուղղեց ամբիոն:

- Մենք Ձեր հարցին կծանոթանանք ու կպատասխանենք, - փաստորեն, հենց Հրաչյա Ռոստոմյանն էր այն նախարարը, որ վերջապես Հայաստանի Հանրապետության ողջ պատմության ընթացքում Ազգային ժողով-կառավարություն հարցուպատասխանի ընթացքում դարձավ նոր մշակույթի հիմքը դնողը՝ ցույց տալով բոլորին, թե ինչպե՛ս է պետք պատասխանել օրենսդիրների հարցերին: «Կծանոթանանք, կպատասխանենք»՝ վե՛րջ, կարճ ու կոնկրետ: Թե չէ, թողնես՝ նախարարները կսկսեն երկար-բարակ պատմություններ պատմել ու պատգամավորներին տալ-անցնել:

- Շնորհակալ եմ՝ շատ խելացի և կշռադատված պատասխանի համար,- նախարարի պատասխանն ըստ արժանվույն գնահատեց երբեմնի նախարար Վարդանյանը:

Լուսինե Կեսոյան