ԲՀԿ-ի ձայնը կտրեցին

Երեկվանից մեկնարկած ԲՀԿ-ական արշավն այսօր խոստանում էր ավելի հետաքրքիր դրսևորումներ ստանալ: Կրքերը թեժացած էին, ինչպես հարկն է: Թիմը ոտքի էր հանվել ողջ կազմով: Գիշերն անցել էր տենդագին պատրաստությունների մեջ: «Էսօր ավելի ուժեղ ա լինելու, կտենաք»,- հետաքրքրությունը մեծացնում էին ԲՀԿ-ական պատգամավորները: Սովորաբար միայն քարտուղարուհի-օգնականներով կենդանության նշաններ ցույց տվող ԲՀԿ խմբակցության դուռը մեկ էլ բացվում էր ու դուրս էին գալիս պատգամավորներ, որ այդ ժամին անհնար էր, որ Ազգային ժողովի նման՝ իրենց համար անհետաքրքիր «հիմնարկում» մնացած լինեին: Զգացվում էր, որ ինչ-որ բան է նախապատրաստվում: Քանի որ շեֆը՝ Գագիկ Ծառուկյանը, այն մարդը չէր, որ հանկարծ ու խորհրդարան եկած լիներ, հրատապ կարգով խորհրդակցություններ անցկացնողն ու խմբակցության պատգամավորներին անհրաժեշտ ցուցումներ տվողն, ըստ ամենայնի, Նաիրա Զոհրաբյանն էր:

Այդպես, խորհրդարանը սպասում էր ժամը 16:30-ին, երբ ԲՀԿ-ի աչքի «փուշը», «հասարակության համար ուժգին ապտակ» դարձած վարչապետը կներկայանար Ազգային ժողով: Հատկապես, որ երեկվա հայտարարություններից հետո վարչապետի մամլո խոսնակը համարձակվել էր պատասխանել ու ակնարկներ տեղալ «ֆեոդալների» հաշվով:

Հարցուպատասխանը սկսվեց: Նախ գրավոր պատասխանները: Սրանք քաղաքականության, քաղաքական թեժ իրավիճակի հետ կապ չունեցող «անշառ» հարցերն են: Պատգամավորը տալիս է հարցը՝ որպես կանոն, երկար-բարակ, երբեմն ելույթային նրբերանգներով, նախարարը՝ պատասխանում, որպես կանոն, էլի երկար-բարակ: Պատգամավորը կարող է գրավոր ու արդեն պատասխանված հարցը չհնչեցնել, բայց մեր պատգամավորները գտան, որ պետք է անպայման հնչեցնեն: Գրավոր հարցերի վրա ծախսվեց ուղիղ կես ժամ:

Սկսվեց բանավոր հարցերի համար հերթագրումը: Պատգամավորները «բոլ-բոլ» հերթագրվեցին: ԲՀԿ-ից հերթագրված պատգամավորների անունները խոսում էին պոտենցիալ «քանդուքարափ օպերացիայի» մասին: Նախնական խոսակցությունների ժամանակ արդեն իսկ այս պատգամավորների խոսքերից հասկացվում էր, որ Տիգրան Սարգսյանի կառավարության շրջանում ինչ փակ թեմա եղել էր, որոշել էին «մեյդան» հանել:

Սկսվում է բանավոր հարցուպատասխանը: Հերթը սկզբում ընդդիմությանն է: «Հրապարակ» է մտնում հեղափոխական Զարուհի Փոստանջյանը՝ կրծքին նարնջագույն ժապավենով և «բարև՛ հեղափոխություն և բարև՛ հեղափոխական կառավարություն: Չեմ ցանկանում մտածել, որ Դուք անմասն կմնաք հայկական Մեծ հեղափոխությունից» ասելով, Տիգրան Սարգսյանի, Հովիկ Աբրահամյանի և մյուսների տրամադրությունը կարգին բարձրացնելուց հետո հարցնում վարչապետին, թե արդյո՞ք նա չի պատրաստվում մասնակցել ուրբաթ օրը նախատեսվող հաղթահավաքին: Ձեռքերով դեմքը ծածկած և քրքիջը մի կերպ թաքցնող վարչապետը մոտենում է ամբիոնին և տալիս լուրջ պատասխան՝ կոչ անելով հեղափոխականներին մնալ քաղաքակիրթ երկխոսության շրջանակներում:

Քրքիջով, թե անքրքիջ, րոպեները հոսում են, ժամանակն էլ՝ սլանում առաջ: ՀԱԿ-ից Արամ Մանուկյանը հարց տալու իր հնարավորությունը մսխում է կառավարության կողմից օրինագծերի անընդհատ փոփոխությունների աննպատակահարմարության հարցի բարձրացման վրա՝ «օրինակ, իմ դիտարկած 7 օրենքներ 170 անգամ բերվել են Ազգային ժողով՝ փոփոխության նպատակով»:

ՀՅԴ-ից Աղվան Վարդանյանը հարց է ուղղում սոցիալական բնակարանաշինության հետ կապված: Ռուբեն Հակոբյանն էլի Հրայր Թովմասյանին սկսում է Սահմանադրական դատարանի փաստաբանությունը հիշեցնել: Թևան Պողոսյանն իր հերթին ինչ-որ հարց է տալիս, Լյուդմիլա Սարգսյանին՝ ԱՕՔՍ-ի շենքի հարևանությամբ նոր կառուցվելիք էլիտար բարձրահարկի հարցն էր հուզել…

Վերջապես ընդդիմության հարցերն ավարտվում են: Սկսվում են հերթագրված մյուս պատգամավորների հարցերը. քանի որ ժամանակին ԲՀԿ-ն այդպես էլ ինքն իրեն չպատկերացրեց ընդդիմադիր դաշտում և հռչակեց «այլընտրանք», ըստ այդմ, ԲՀԿ-ական պատգամավորները հարց տալու իրավունք են ստանում ճիշտ այնպես, ինչպես ՀՀԿ-ականները՝ ըստ հերթագրման հաջորդականության:

Հերթը ՀՀԿ-ական Մարտին Սարգսյանինն է: Պատգամավորին հուզել էր տաքսիստների՝ դեղին պետհամարանիշների փոփոխության հետ կապված բողոքը: Իրեն հատկացված րոպեները պատգամավորն օգտագործում է սրտի ուզածի պես՝ կառավարությանը հարց տալու հետ նաև կոչ անելով նման հարցերը նախապես քննարկման դնել, որպեսզի հետո խուսափեն հանրային հնչեղություն ստացող բողոքներից: Տրանսպորտի և կապի նախարար Գագիկ Բեգլարյանն իր հերթին մանրամասն պատասխան է տալիս իր իրավասության ներքո քննարկված հարցին:

Ժամացույցի սլաքներն արդեն մոտենում են վեցին, մնացել է մի քանի րոպե: Հույս կլինի՞, թե՞ չէ: Իշխանավորներն ավարտում են թանկարժեք ժամանակի մսխումը. հերթը ապարանցի Լյովա Խաչատրյանինն է, բայց արդեն վեցին մի քանի րոպե է պակաս, այսինքն՝ սա ԲՀԿ-ի միակ և բացառիկ շանսն է: Խաչատրյանը հնչեցնում է հարցը. պատգամավորը որոշել էր երեկվա հայտարարությունը հարցի ձևով շարադրել ու տալ կառավարությանը՝ առ այն, որ արագաչափերով գրանցվող տուգանքներն անհամաչափ են գյուղացիների թոշակներին ու նպաստներին և որ տուգանքների մուծումից հետո շատ ընտանիքներ մնում են առանց հացի: Լյովա Խաչատրյանը չի զլանում և կառավարությանը մեկ անգամ ևս պատմում է երեկվա պատմությունը տուգանված գյուղացու մասին, ում մայրը մի պարկ ալյուր էր խնդրել թոռնիկին կերակրելու համար և ասել թե՝ «ավելի լավ էր տղես ավարիա տար մեռներ, քան թե էսքան տուգանք տայինք ու սոված մնայինք»:

«Դե, հասկանում եմ, որ տուգանք պետք է տան, բայց հնարավոր չէ՞ գոնե դասակարգել ըստ սոցիալական խավերի, ասենք՝ աշխատանք չունեցողը մեկ դրամ վճարի, ունեցողը…»: Էմոցիաներով աչքի չընկնող արդարադատության նախարար Հրայր Թովմասյանի վրա, բնականաբար, սրտաճմլիկ պատմությունները չէին կարող ազդել. նախարարը սկսում է ներկայացնել, թե ինչ կարևոր դեր են խաղում արագաչափերը մեր կյանքում, թե ինչպես են դրանց շնորհիվ հաջողվել նվազեցնել վթարները, մի խոսքով, մի պարկ ալյուրին անհամարժեք «լապշա» է կախվում ունկնդիրների ականջներից՝ ի հավելումն մեջբերելով համաշխարհային փորձն առ այն, թե ուրիշ երկրներում շատ ավելի դաժան պատիժներ են նախատեսված, ընդհուպ մինչև ազատազրկում, այնպես որ մենք դեռ մարդասեր ենք…

«Մի քիչ շատ չե՞ք մտածում, թե՞ էնքան եք մտածելու՝ մինչև էլ մարդ չմնա երկրում: Պատժե՛ք, շարունակեք տուգանել, հա՛, տուգանքը լավ չի, նշանակեք ցմահ բանտարկություն»,- վրդովված արձագանքեց պատգամավորը:

Հարցուպատասխանն ավարտվում է: ԲՀԿ-ականների հարցերը մնում են թղթերի վրա, Տիգրան Սարգսյանի «գնդակոծությունն» էլ դառնում է ԲՀԿ-ի հերթական «երազախաբությունը»...

Հետգրություն

«Էս ի՞նչ արեցիք, խեղճերին չթողիք հարց տային»՝ ռեպլիկիս ՀՀԿ-ական մի պատգամավոր վրա է բերում. «Տո էրեկ էլ չպիտի թողնեինք թփրտային…»

Լուսինե Կեսոյան