«168 Ժամ». Սերժ Սարգսյանը չի ընկալել ամենագլխավորը

«Ասուլիսի վերաբերյալ պետք է ասեմ, որ Սերժ Սարգսյանը ճիշտ չի ընկալել՝ ինչ է տեղի ունեցել Հայաստանի Հանրապետությունում
փետրվարի 18-ին, ինչու է ժողովուրդն այդ օրը համախմբվել, և միասնականորեն ինչի՞ դեմ են քվեարկել»,- «168 ժամի» թղթակցի
հետ զրույցում ասել է «Հանրապետություն» կուսակցության քաղխորհրդի նախկին անդամ Սմբատ Այվազյանը՝ խոսելով նախօրեին նախագահ Սերժ Սարգսյանի հայտնի մամլո ասուլիսի մասին:

Նա կարծիք է հայտնել, որ այդտեղ խնդիրը ո՛չ Սերժ Սարգսյանն է, ո՛չ էլ նախագահի մյուս նախկին թեկնածուն՝ Րաֆֆի Հովհաննիսյանը:

«Ժողովուրդն այդ օրը քվեարկել է այն իրավիճակի դեմ, որում հայտնվել է երկիրը, և այն ճանապարհի դեմ, որով ընթանում է երկիրը: Սա է գլխավորը: Սերժ Սարգսյանը կամ չի ընկալել ամենագլխավորը, կամ ընդհանրապես չի ուզեցել դրան անդրադառնալ: Այդ պատճառով՝ այդ մամուլի ասուլիսը ես համարում եմ խիստ մակերեսային, որովհետև նա չանդրադարձավ գլխավոր խնդրին: Իսկ ինչ վերաբերում է քրեաօլիգարխիկ համակարգին, իր կողմից բերված թվերին՝ այստեղ 3000 են կամ 30.000, չեմ ցանկանում ոչ համաձայնությունս հայտնել, ոչ էլ անհամաձայնությունս, քանի որ դա գլխավորը չէ, գլխավորն այն մթնոլորտն է, որը կա երկրում»,- նշել է Սմբատ Այվազյանը: