Ինչպես Սերժ Սարգսյանը որակազրկեց ԲՀԿ-ին

Վերլուծական 22 Մարտ, 2013 13:45

Սերժ Սարգսյանը Վատիկան կատարած «ռազմավարական» մեծ նշանակություն ունեցող այցից առաջ վերջապես կարծես ամեն ինչ դրեց իր տեղը: Առաջին հերթին` դեմքի լուսափայլ արտահայտությամբ թվարկեց այն փոփոխությունները, որոնք իրականացվել են այս տարիների ընթացքում, այնուհետև, երկրում առկա գաղջ մթնոլորտը մատնացույց անելով, խոսեց բողոքավորների մասին։ Կարճ ասած, Սերժ Սարգսյանը նախորդ տարիների և, իհարկե, ներկայիս իրավիճակը գնահատեց բավականին լավ, եթե ոչ հիասքանչ, ու այսքանով ի ցույց բոլորի ևս մեկ անգամ փաստեց իր վճռականության և հաստատակամության մասին ու մեկնեց Վատիկան:

Այս ասուլիսից հետո, իհարկե, բոլոր քաղաքական ուժերը խառնվեցին իրար՝ ի դեմս, ըստ իր ներկայացուցիչների, Հայաստանում երկրորդ ուժ հանդիսացող ԲՀԿ-ի, որը, իհարկե, հույսեր էր փայփայում նոր կառավարության կազմում յուղալի չալաղաջի տիրանալու ակնկալիքով, սակայն Սերժ Սարգսյանը եկավ, ասուլիս տվեց և բոլորին հերթական անգամ իրենց տեղերը ցույց տվեց։ Արդյունքում՝ ԲՀԿ-ն հերթական անգամ մնաց ձեռնունայն:

Եվ ահա, այս պարագայում հետաքրքրական է ԲՀԿ-ի հետագա գործողությունների ծրագիրը ուսումնասիրելը, քանի որ միակ պատառիկը, որը դեռևս կարող է բաժին հասնել ԲՀԿ-ին, Երևանն է, չնայած նրան, որ այսօր Գյումրիի քաղաքապետը հենց ԲՀԿ-ական Սամվել Բալասանյանն է:

Ի տարբերություն մարզերում ունեցած պոպուլյարության՝ ԲՀԿ-ն Երևանում այդքան էլ պոպուլյար չէ՝ հաշվի առնելով մշակովի հողատարածքների գրեթե բացակայությունը, այսինքն՝ տրակտորների անպետքությունը: Եվ ահա այս պարագայում արդեն գործի պետք է դրվեն բոլոր հնարավոր միջոցները՝ սկսած կաշառքից, վերջացրած գրագետ քարոզարշավով: Ու արդեն իսկ մեկնարկած խոսակցությունները գալիս են հաստատելու այդ իրողությունը, ասել է թե՝ Գագիկ Ծառուկյանը հայտարարել է, որ չի խնայի ոչինչ՝ Երևանի ավագանու ընտրություններում ցանկալի արդյունքի հասնելու համար, չէ՞ որ ԲՀԿ-ի նշաձողը հաղթանակն է:

Այսինքն՝ ստացվում է, որ սկսած նախագահական ընտրություններից, երբ ԲՀԿ-ն հրաժարվեց սեփական թեկնածուով մասնակցել նախագահական ընտրություններին, վերջացրած մայիսի 5-ին կայանալիք ավագանու ընտրություններով, Սերժ Սարգսյանը վաղեմի բարեկամ կոալիցիոն դաշնակցին՝ ԲՀԿ-ին, դեռևս դրական վերաբերմունք չի ցուցաբերել, որն էլ, իհարկե, հանգեցրել է Գագիկ Ծառուկյանի՝ այս պայքարում հաղթանակի տենդագին մտքին:

Ամենայն հավանականությամբ, նախագահական ընտրություններից, ու մասնավորապես՝ ԲՀԿ-ի նախագահական պայքարից, հրաժարվելուց հետո կամ արդյունքում՝ ՀՀԿ-ի և ԲՀԿ-ի միջև տեղի է ունեցել փոխհամագործակցության ընդհատում, այսինքն՝ ինչպես ասում են, ՀՀԿ-ն և ԲՀԿ-ն «քվիդ են» եղել որոշակի հարցերի պարագայում, որից հետո էլ և յուրաքանչյուրը հնարավորություն է ստացել այսուհետև միայնակ շարունակելու իր ճանապարհը, իսկ ավելի կոնկրետ՝ ԲՀԿ-ն է հնարավորություն ստացել շարունակելու իր ճանապարհը՝ ազատվելով ՀՀԿ-ի հետ ունեցած հախ ու հաշվից:

Եվ չնայած ՀՀԿ-ի՝ ավագանու ընտրությունների համար առաջադրած ցուցակը Տարոն Մարգարյանի գլխավորելու փաստին, այդուհանդերձ, այսօր էլ ՀՀԿ-ի ունեցած ակտիվները՝ ավագանու ընտրություններում հաղթելու, գերակշռում են ԲՀԿ-ի ունեցածին, որն էլ իր հերթին բաց թողեց իր ձեռքից այդ պայքարում առաջինը լինելու հնարավորությունը՝ մերժելով մյուս քաղաքական ուժերի հետ ընտրություններին մեկ դաշինքով մասնակցելու տարբերակը:

Չնայած նրան, որ դեռևս ակտուալ է ապրիլի 9-ի թեման, միևնույն է, այսօր էլ արդեն զգացվում է ավագանու ընտրությունների հետընտրական պրոցեսի տեսլականը, որը միանշանակ չի լինի ավելի պակաս թեժ, քան այս օրերին Րաֆֆի Հովհաննիսյանի կողմից մղվող պայքարը և, իհարկե, բացառված չէ, որ այսօրվա՝ Ազատության հրապարակում ընթացող պայքարը կարող է վերափոխվել հենց ավագանու ընտրությունների պայքարին, համենայն դեպս Րաֆֆի Հովհաննիսյանը, մեկ անգամ չէ, որ խոսել է ընտրություններին ժողովրդի մասնակցության մասին:

Արդյունքում՝ լուսանցքից դուրս է մնում միայն նույն ԲՀԿ-ն, որը դեռևս նախորդ տարվա դեկտեմբեր ամսին վայելում էր ժողովրդի հավատը և, իհարկե, ԲՀԿ-ի համար ստեղծված այս իրավիճակում գլխավոր դերակատար որպես այդպիսին էլ կարելի է համարել ՀՀԿ նախագահին, ով ամեն կերպ «որակազրկեց» դեռևս ամիսներ առաջ «Հայաստանի առաջնության» լավագույն խաղացողին:

Գևորգ Ավետիսյան