Հայաստանի տնտեսության զարգացման համար Մրցունակության հիմնադրամը նոր քայլեր է կատարում

«… Քիչ ենք, բայց մեզ հայ են ասում» խոսքերը եւս մեկ անգամ ապացուցվեցին՝ այս անգամ ԱՄՆ—ում։ Փետրվարի 22—24—ը ԱՄՆ—ի Լոս Անջելես քաղաքում տեղի ունեցած հեղինակավոր զբոսաշրջային ցուցահանդեսի «Լավագույն նոր տաղավար» մրցանակի հաղթող ճանաչվեց Հայաստանի եւ Արցախի միասնական տաղավարը (այս մասին «Հայաստանի Հանրապետությունը»—ն հրապարակում ունեցել է)։ Մրցանակը հանձնվեց Հայաստանի ազգային մրցունակության հիմնադրամին (ՀԱՄՀ)։

Մրցանակը Հայաստանի ազգային մրցունակության հիմնադրամի պատվիրակության՝ վերջերս ԱՄՆ այցի ընթացքում գրանցած մի շարք ձեռքբերումներից մեկն է։ Արդյունքներ եղան ՀԱՄՀ գործունեության գրեթե բոլոր ոլորտներում։ Խոսելով լոսանջելեսյան ցուցահանդեսի մասին՝ մեզ հետ զրույցում հիմնադրամի գործադիր տնօրեն Արման Խաչատուրյանը վստահեցրեց, որ հայկական տաղավարը այցելուների պակաս չուներ ու մեծ հետաքրքրություն էր առաջացրել։ Նա տեղեկացրեց նաեւ, որ անցյալ տարվանից որդեգրել են քաղաքականություն, որի համաձայն ներկայացնում են նաեւ Արցախը։ «Միջազգային ցուցահանդեսները ոչ միայն զբոսաշրջության, այլեւ երկրի առաջմղման հարթակ են դարձել։ Այսպիսի միջոցառումները վերածվել են, այսպես ասած՝ «պատերազմի հարթակի»։ Ադրբեջանը բոլոր հարթակները փորձում է ծառայեցնել հակահայկական քարոզչություն իրականացնելու նպատակին։ Նաեւ մեր արվեստն ու մշակույթն իրեն վերագրելու կամ այն նվաստացնելու ընդգծված քաղաքականություն է իրականացնում։ Մենք էլ միջոցառումների շրջանակներում փորձում ենք հակազդել նմանատիպ բոլոր փորձերին։ Յուրաքանչյուր ցուցահանդեսի կազմակերպման կանոնակարգի կետերից մեկը այն է, որ ցուցահանդեսը չի կարող հանդիսանալ ազգային խտրականության, ազգային ատելության եւ քաղաքական քարոզչության դաշտ»,– հիմնադրամի գործադիր տնօրենը նկատում է, որ Ադրբեջանը հատկապես ցավոտ է ընդունում ԼՂՀ—ի մասնակցությունը միջազգային ցուցահանդեսներին, որովհետեւ նմանատիպ նախաձեռնությունները արդյունավետ են դառնում երկրի պատմությունը, մշակույթը ներկայացնելու հարցում։

Հայաստանի ազգային մրցունակության հիմնադրամը նախատեսում է այս տարի կազմակերպել ճանաչողական այց ամերիկյան առաջատար ԶԼՄ ներկայացուցիչների մասնակցությամբ եւ զարգացնել զբոսաշրջության խթանման ԱՄՆ ուղղությունը։

ՀԱՄՀ գործադիր տնօրենի խոսքերով՝ Հայաստանն արդեն այս տարվա առաջին եռամսյակում ապահովել է շուրջ 7 միջազգային ցուցահանդեսի մասնակցություն, ինչն աննախադեպ է մրցունակության հիմնադրամի կենսագրության մեջ։

Ցուցահանդեսներին մասնակցությունը իրենց արդյունքները տալիս են։ Ապացույցը, դիցուք, հյուրանոցների գերզբաղվածության փաստն է. այս տարի ապրիլ—սեպտեմբեր ժամանակահատվածում, կարելի է ասել՝ զբաղվածությունն արդեն ապահովված է։ Սա օրինաչափ է, եթե հաշվի առնենք, որ 2012 թ., համաձայն պաշտոնական վիճակագրական տվյալների, 2011թ. նկատմամբ արձանագրվել է ներգնա զբոսաշրջային այցելությունների երկնիշ աճ։ 2012—ին Հայաստան է ժամանել 843.330 զբոսաշրջիկ, այսինքն՝ 2011 թվականի նույն ժամանակաշրջանի նկատմամբ ցուցանիշն աճել է 11,3 տոկոսով։

Հատկանշական է, որ ըստ Համաշխարհային զբոսաշրջության մրցունակության զեկույցի՝ Հայաստանը 11 կետով բարելավեց իր դիրքերը՝ 140 երկրների շարքում զբաղեցնելով 79—րդ հորիզոնականը։

Այս տարի, ըստ մրցունակության հիմնադրամի գործադիր տնօրենի, նախատեսվում է ներգնա զբոսաշրջային այցելությունների մինչեւ 20 տոկոս աճ։

Հայաստանը՝ առողջապահական տարածաշրջանային կենտրոն

ԱՄՆ այցը նաեւ բովանդակալից էր առողջապահության ոլորտում առաջընթացի ապահովման տեսանկյունից։

Ինչպես արդեն տեղեկացրել ենք, Հայաստանի ազգային մրցունակության հիմնադրամը՝ ՀՀ էկոնոմիկայի նախարարության եւ ՀՀ առողջապահության նախարարության հետ համատեղ մշակել է Ուռուցքաբանության հայկական կենտրոնի ստեղծման ծրագիր։

Հիշեցնենք, որ կենտրոնի հիմնարկեքի արարողությունը տեղի ունեցավ անցած տարի աշնանը՝ ՀՀ նախագահ Սերժ Սարգսյանի ներկայությամբ։ «Կենտրոնի շինարարությունն ընթանում է՝ համաձայն սահմանված ժամանակացույցի,–նշեց Ա. Խաչատուրյանը։– Միեւնույն ժամանակ, զարգանում են ապացուցողական բժշկության սկզբունքներով կենտրոնի գործունեության համար անհրաժեշտ պայմանները»։

Ծրագրի ընդհանուր նպատակն է հիմք դնել Հայաստանի Հանրապետությունում գերժամանակակից միջուկային տեխնոլոգիաների վրա հիմնված բժշկության զարգացմանը եւ խթանմանը։ Ուռուցքաբանության գերազանցության հայկական կենտրոնը թույլ կտա հոգալու ինչպես ՀՀ բնակչության կարիքները, այնպես էլ դառնալու տարածաշրջանային կենտրոն։ Ծրագրի իրականացման արդյունքում հնարավորություն է ստեղծվում Հայաստանը դարձնելու ուռուցքաբանության եւ միջուկային բժշկության տարածաշրջանային կենտրոն։

Բացի շինարարությունից, մրցունակության հիմնադրամն ակտիվորեն աշխատում է հայաստանյան միջավայրում միազգային լավագույն փորձի, գիտելիքների ներդրման ուղղությամբ։

«Տեխասի համալսարանական «Էմ Դի Անդերսոն» (MD Anderson) ուռուցքաբանության կենտրոնի հետ համաձայնություն է ձեռք բերվել, որով հայաստանցի մասնագետները պարբերաբար այնտեղ մասնագիտական վերապատրաստում կանցնեն։ Ինչպես նաեւ Հայաստանում տեղայնացնելու համար կտրամադրվեն հիվանդությունների բուժման չափորոշիչները եւ արձանագրությունները»,–ընդգծեց Ա. Խաչատուրյանը։ «Աշխարհում բժշկական ծառայությունների մատուցման որակը էապես պայմանավորված է մի շարք բաղադրիչային գործոններով. հետազոտություն, ախտորոշում, բուժման նշանակում, բուժման վերահսկում, հետվերականգնողական թերապիա։ Նշված ողջ գործընթացը պետք է իրականացվի՝ ըստ չափորոշիչների եւ արձանագրությունների, կանոնակարգված, հակառակ դեպքում, որակը չի երաշխավորվում։ Դրանք անչափ կարեւոր նշանակություն ունեն բժշկական բարձրորակ ծառայությունների ապահովման, մեր կենտրոնի միջազգային վկայագրման համար եւ առողջապահական զբոսաշրջության խթանման համար»,– ասաց նա՝ հավելելով, որ երբ արդեն կենտրոնը գործի՝ կկնքվի քույր ինստիտուտների համագործակցության պայմանագիր, որով նաեւ կիրականացվի մեր կենտրոնի վկայագրումը ԱՄՆ—ում։ Դրանով էլ այն կդառնա համաշխարհային չափանիշներին համապատասխան ծառայություններ իրականացնող կենտրոն։

Ազգային մրցունակության առաջմղումը գլոբալ շուկայում

Հաջորդ կարեւոր ձեռքբերումը փետրվարի 28—ին՝ ԱՄՆ—ի մայրաքաղաք Վաշինգտոնում, ՀԱՄՀ—ի եւ Մրցունակության խորհուրդների համաշխարհային դաշնության (GFCC) միջեւ փոխըմբռնման հուշագրի ստորագրման փաստն էր։ Ըստ հուշագրի՝ ՀԱՄՀ—ն անդամագրվեց Մրցունակության խորհուրդների համաշխարհային դաշնությանը։ Ըստ այդմ՝ կողմերը կհաստատեն ռազմավարական գործընկերություն՝ խթանելու կայուն տնտեսական աճ եւ զարգացնելու արդյունավետ համաշխարհային մրցունակության քաղաքականություններ եւ ռազմավարություններ, բարձրարժեք նորարարական գործարարություն, գիտական եւ տեխնոլոգիական համագործակցություն եւ նորարարության վրա հիմնված աճ։

Հաշվի առնելով ՀԱՄՀ գործունեության ձեւաչափը եւ թիրախային ոլորտները՝ Մրցունակության խորհուրդների համաշխարհային դաշնությունը պատրաստակամություն է հայտնել խոր եւ բազմաբովանդակ համագործակցություն սկսել Հայաստանի հետ եւ նպաստել պետական—մասնավոր համագործակցության սկզբունքով ծրագրերի իրականացմանը։

«Սա իսկապես նշանակալից առաջընթաց քայլ էր մեզ համար՝ Հայաստանի մրցունակության մակարդակը գլոբալ շուկայում բարձրացնելու տեսանկյունից։ Մենք նպատակադրված ենք ակտիվացնելու մեր միասնական ջանքերը, որպեսզի խթանենք գիտելիքահենք մրցունակությունը եւ նորարարության վրա հիմնված տնտեսական աճը»,–ասաց Ա. Խաչատուրյանը։