Հովիկ Աբրահամյանն ընդունեց ՀՀ-ում Հնդկաստանի արտակարգ և լիազոր դեսպանին

Մարտի 21-ին ՀՀ ԱԺ նախագահ Հովիկ Աբրահամյանն ընդունեց ՀՀ-ում Հնդկաստանի նորանշանակ արտակարգ եւ լիազոր դեսպան Սուրեշ Բաբուին:

Շնորհավորելով դեսպանին պաշտոնը ստանձնելու կապակցությամբ՝ ԱԺ նախագահը համոզմունք հայտնեց, որ նրա պաշտոնավարման տարիներին երկու երկրների միջեւ բարեկամական հարաբերությունները առավել կամրապնդվեն, կխորանանան եւ զգալի ձեռքբերումներ կարձանագրվեն՝ ինչպես միջպետական, այնպես էլ միջխորհրդարանական հարաբերություններում: Հովիկ Աբրահամյանը ընդգծեց երկու երկրների միջխորհրդարանական կապերը ակտիվացնելու եւ զարգացնելու անհրաժեշտությունը՝ կարեւորելով փոխադարձ շփումները, կոնկրետ ծրագրերի մշակումն ու իրականացումը: ԱԺ նախագահը պատրաստակամություն հայտնեց աջակցել հայ-հնդկական փոխգործակցության զարգացմանը երկկողմ կարեւորություն ունեցող ոլորտներում: Խորհրդարանի ղեկավարը կարեւոր համարեց համագործակցությունը տեղեկատվական տեխնոլոգիաների, զբոսաշրջության, առողջապահության, գյուղատնտեսության, մշակույթի եւ կրթության բնագավառներում:

Հայաստանում Հնդկաստանի դեսպան Սուրեշ Բաբուն շնորհակալություն հայտնելով ընդունելության համար՝ նշեց, որ իր ջանքերը կներդնի հայ-հնդկական ջերմ եւ բարեկամական հարաբերությունները զարգացնելու տարբեր ուղղություններով: Երկուստեք կարեւորվեց միջխորհրդարանական կապերի զարգացման եւ խորացման անհրաժեշտությունը, համագործակցությունը միջազգային կառույցներում: Դեսպանը անհրաժեշտ համարեց առեւտրատնտեսական կապերի ակտիվացումը:

Հանդիպման ընթացքում քննարկվեցին այլ հարցեր եւս: