Նազենի Հովհաննիսյանը՝ «Մեր տանը», ինչպես իր տանը

Առաջին անգամ «Մեր տունը» կազմակերպություն ոտք դրեց դերասանուհի, հաղորդավարուհի Նազենի Հովհաննիսյանը: Թեև դերասանուհին հնարավորություն ունեցել էր տարբեր առիթներով առնչվել «Մեր տունը» կազմակերպությանը, ծանոթանալ նրա երիտասարդ ու գեղեցիկ բնակչուհիների հետ, սակայն աղջիկների հետ ընտանեկան մթնոլորտում անմիջական ու մտերմիկ շփվել դեռ չէր հաջողվել: Նազենիի այցելությունը «Մեր տունը» կազմակերպություն հենց այս օրերին պատահական չէր. Կանանց ու մայրերի միամսյակի կապակցությամբ հայտնի հյուրեր դեռ էլի կլինեն, սակայն աղջիկների համար թերևս ոչ ոք աղցան պատրաստելու պատիվ չունենա:)

Սակայն դեպքերից առաջ չընկնենք ու ամեն բան ներկայացնենք՝ ըստ հերթականության: Նազենիի հետ հանդիպեցինք Էջմիածին տանող ճանապարհին՝ Սբ. Հարություն եկեղեցու մոտ: Մինչ ճանապարհը շարունակելը՝ դերասանուհին ցանկություն հայտնեց մտնել եկեղեցի, աղոթել ու մոմ վառել: Մենք չխանգարեցինք դերասանուհուն՝ թողնելով նրան միայնակ իր աղոթքի մեջ:

Նազենիին «Մեր տանը» ջերմ ընդունեցին՝ մուգ կարմիր վարդերի փնջով: Դերասանուհին կազմակերպության տնօրեն Տիգրանուհի Կարապետյանի հետ շրջեց տան բոլոր սենյակներով, ծանոթացավ կարգ ու կանոնին ու այդ ողջ ընթացքում անընդհատ կրկնում էր. «Ինչ հաճելի ու գեղեցիկ տուն է»… Հաղորդավարուհուն հատկապես շատ դուր եկավ աղջիկների վարդագույն սենյակը, որի մասին կազմակերպության աշխատակիցներն ու աղջիկները հումորով ասացին, որ այդ սենյակում ապրողները հերթով ամուսնանում են. դա, իհարկե, շատ զվարճացրեց Նազենիին ու ինքն էլ իր հերթին կատակով ավելացրեց. «Ինձ էլ թույլ տվեք մի կես ոտքով այստեղ ապրել:)»:

«Մեր տան» առօրյային ծանոթանալիս աղջիկներից Անի Առաքելյանն առաջարկեց Նազենիին գորգագործություն սովորեցնել, ինչին հաճույքով համաձայնեց դերասանուհին.նա հանեց կոստյումը, ձեռքը վերցրեց գորգգործելու գործքին ու հետևեց Անիի ցուցումներին: Նազենիի մոտ կարծես ամեն ինչ շատ լավ էր ստացվում, ինչի շնորհիվ նա արժանացավ նաև Անիի դրական գնահատականին.«Նազենին բավականին խելացի աշակերտ է՝ հեշտ ըմբռնող ու ճկուն:)»

Երբ դերասանուհին ծանոթանում էր տան պայմաններին,բաց պատշգամբում նկատեց տանիք տանող աստիճանը,քայլերն ուղղեց այդ ուղղությամբ ու բավականին անկեղծ բացականչեց. «Եթե ես այստեղ ապրեի, հաստատ ամեն օր կբարձրանայի տանիք՝ մենակ մնալու»…

Ներքևում՝ «Մեր տան» հյուրասրահում, աղջիկները կազմ-պատրաստ սպասում էին Նազենիին. Նրանք «քրքրել» էին դերասանուհու «անձնական գործը», ինչը զարմացրեց դերասանուհուն, ով խոստովանեց, որ շատ լրագրողներ իր մասին անգամ այդքան տեղեկացված չեն: Թեև աղջիկները նախապես որոշել էին հարցեր տալ նրան, սակայն փոքր-ինչ կաշկանդվածության պատճառով հարցեր առանձնապես չհնչեցին, սակայն ասելիք, պատմելու բան Նազենին ուներ՝ որքան ասես:

Աղջիկները որքան լուռ էին հյուրասրահում, նույնքան աշխույժ, շփվող ու աղմկոտ էին խոհանոցում. կանանց համար տան խիստ անձնական հատվածն իր գործն արեց:) Նազենին էլ իսկական տան աղջկա պես անցավ գործի. հավաքեց մազերը, կապեց գոգնոցը, ծանոթացավ աղցանի համար նախատեսված բոլոր մթերքներին, անմիջապես կարգադրություններ տվեց աղջիկներին, թե ով, ինչ պետք է անի, ու համատեղ ուժերով անցան գործի:) Աղցան պատրաստելու ընթացքում էլ լուսանկարվեցին, էլ կատակներ արեցին, էլ իրենց պատրաստած զարդերից նվիրեցին Նազենիին, որոնք նա սիրով ընդունեց, էլ Լիլիթի պատրաստած դառը սուրճը խմեցին… Միակ բանը, որ «Մեր տան» հյուրը հրաժարվեց պաս պահելու պատճառով, աղջիկներից Սյուզիի՝ հատուկ այդ առիթով թխած էկլերն էր: Մի խոսքով, աղջկական հաճելի զբաղմունք, որի արդյունքը համեղ աղցանների տեսականին էր, որ ճաշակեցինք բոլորս միասին: Այս մասին գրում է esyes.am-ը:

Մինչ աղջիկներից մի քանիսն օգնում էին Նազենիին, մյուսներն արագ սեղան գցեցին: Մի մարդու նման միաբերան աղոթքից հետո բոլորս սեղան նստեցինք՝ որպես մեծ, բազմանդամ ու համերաշխ ընտանիք, որտեղ թագավորում է միայն հոգուց բխող սերն ու ջերմությունը:

{gallery}1082{/gallery}