«Բլոգեր» Տիգրան Սարգսյանն ու դեղին մամուլը

Կառավարության այսօրվա նիստում բեկումնային մի բան արձանագրվեց՝ «ամենայն հայոց վարչապետ» Տիգրան Սարգսյանի աշխարհընկալման հետ կապված: Մասնավորապես, հարցը վերաբերում է զանգվածային լրատվամիջոցներ-իշխանություն, ավելի կոնկրետ՝ զանգվածային լրատվամիջոցներ-վարչապետ Տիգրան Սարգսյան փոխհարաբերություններին:

Դեռ տարիներ առաջ, երբ Տիգրան Սարգսյանը դեռ նոր էր նշանակվել վարչապետ և առաջին մղումը հնարավորինս դրական լույսի ներքո ներկայանալն էր, հայաստանյան հեղինակավոր օրաթերթերից մեկը՝ «Առավոտ»-ը, հերթական հրապարակումը ներկայացրեց Սյունիքի մարզպետ Սուրիկ Խաչատրյանի հետ կապված հերթական միջադեպի վերաբերյալ: Հրապարակմանը հաջորդող կառավարության նիստում վարչապետը խիստ տոնով ելույթ ունեցավ, ի լուր աշխարհի հայտարարեց, թե սրանից հետո ոչ մեկ անպատիժ չի լինելու և հանձնարարեց Տարածքային կառավարման նախարար Արմեն Գևորգյանին՝ հետաքննություն անցկացնել և հարկ եղած դեպքում պատժել մեղավոր մարզպետին:

Մինչ այդ հրապարակումն էլ Սյունիքի մարզպետի մասին արդեն հատորներ էին գրվել և բոլորն էլ գիտեին, թե ով է Սուրիկ Խաչատրյանը: Անցավ որոշ ժամանակ և հետաքննությունն ավարտվեց նրանով, որ վարչապետը հայտարարեց, թե Սուրիկ Խաչատրյանին հանիրավի զրպարտել են, մարդը պարզապես մի անմեղ հրեշտակ է և որ սրանից հետո կառավարությունն այլևս դեղին մամուլի նյութերին չպետք է ուշադրություն դարձնի, որովհետև դեղին մամուլը ծայրից ծայր լցված է հերյուրանքներով:

Անցավ մի քանի տարի: Այսօրվա նիստի հենց սկզբում նույն վարչապետը մտահոգություն հայտնեց առ այն, թե նույնականացման քարտերը որոշ մարմիններում հրաժարվում են ընդունել և ID քարտ ներկայացրած քաղաքացիներին նեղություն են պատճառում՝ պահանջելով անպայմանորեն անձնագիր ներկայացնել: «Մենք ահազանգեր ենք ստանում, մասնավորապես, «Վան» ռադիոկայանի բլոգներում կան օրինակներ, թե որտեղ, որ մարմիններում հրաժարվում են միայն ID-քարտով սպասարկելուց և պահանջում են նաև անձնագիր»,- գործընկերներին տեղեկացրեց վարչապետը՝ բացելով նաև գաղտնիքը, թե որտեղից է ստացել իր հույժ հավաստի տեղեկատվությունը:

Պրոգրեսն ավելի քան ակնառու է: Ինչպես տեսնում ենք, Տիգրան Սարգսյանի բլոգերությունն այդքան էլ ապարդյուն չէր և փաստորեն, հանրությունը վարչապետի բլոգերությունից գոնե այս օրինակով օգուտ քաղեց: Այլ հարց է, որ «Առավոտ» օրաթերթում կարող են իրավացիորեն վիրավորվել՝ հիշելով, որ իրենց թերթին մի ժամանակ նույն անձնավորությունը տվեց «դեղին մամուլ» որակումը, իսկ այսօր այդ նույն անձնավորությունը զբաղված է «Վան» ռադիոկայանի բլոգի «փիառով»: Թեև, լրագրողներն, ի տարբերություն շատ իշխանավորների, ավելի քան լայնախոհ, մեծահոգի և առաջընթացն իր բոլոր դրսևորումներով ողջունող մարդիկ են, այնպես որ, ամենայն հավանականությամբ, վարչապետի զանցանքը ներման կարժանանա:

Լուսինե Կեսոյան