ԲՀԿ-ին ընդդիմությունն էլ «քցեց»

Մարտի 20-ին Ազգային ժողովում կառավարության հետ հարցուպատասխանի ժամանակ ԲՀԿ խմբակցության կազմակերպած գրոհը «ջրելու» օպերացիայի մեջ, պարզվում է, որոշակի դերակատարություն են ունեցել նաև ընդդիմության ներկայացուցիչները: Այս պահին դժվար է ասել՝ դա տեղի է ունեցել կանխամտածված կերպով, թե՞ պարզապես ուզում էին՝ լավ լինի, բայց ստացվեց ինչպես միշտ, այնուամենայնիվ, փաստը մնում է փաստ, որ ԲՀԿ-ն հայտնվեց «քցված» կարգավիճակում:

Կեսօրին արդեն իսկ հայտնի էր, որ ԲՀԿ-ն պատրաստվում է գրոհել, անգամ թեմաներն էին հայտնի: ԲՀԿ խմբակցության քարտուղար Նաիրա Զոհրաբյանը նախապես մոտենում է ընդդիմադիր պատգամավորներին և հայտնում, որ լավ «պլան» ունեն մշակած, կարգին հարցեր են տալու, բարեկամորեն խնդրում է՝ թողեք տանք, տեսնենք հավերժական վարչապետը ո՞նց է պատասխանելու՝ «Նաիրիտ», ջրի խողովակներ, արտագաղթի կրիտիկական շեմ…

Նախապես տրված և պատասխանված գրավոր հարցերը ևս կարող էին չտրվել, բայց այնտեղ արդեն երկխոսությունից դուրս մնացած իշխանական պատգամավորներն էին, անգամ այնպիսիք, որոնց շունչը խորհրդարանի խոսափողներն, Աստված գիտե, մեկ էլ երբ էին զգացել: Անգամ նիստերի դահլիճում նստած գործընկեր-պատգամավորները չէին կարողանում թաքցնել ժպիտները, երբ Մխիկը՝ Աֆղանստանի պատերազմի վետերանների միության նախագահ Արմեն Մխիթարյանը, չէր կարողանում արտաբերել, ըստ երևույթին, րոպեներ առաջ միայն տրված թղթի վրա շարադրված հարցը: Բայց այս պահով ԲՀԿ-ում առանձնապես «նեղացվածություն» չկար:

Իշխանություններից ԲՀԿ-ն կարծես թե այլևս ակնկալիք չունի, իշխանությունների պահվածքն ավելի քան ընկալելի էր «այլընտրանք» հռչակված խմբակցությունում, բայց, ա՛յ, Արամ Մանուկյանի՝ «օրենքների փոփոխություններին», Լյուդմիլա Սարգսյանի՝ ԱՕՔՍ-ի շենքին, Աղվան Վարդանյանի՝ սոցիալական բնակարանաշինությանը վերաբերվող հարցերը մեծապես խոցել էին դեռ մի երկու ամիս առաջ ինտենսիվ բանակցային փուլում գտնվող գործընկեր կուսակցությանը: «Շատ հրատապ հարցեր էին պեղել»,- հեգնում էին ԲՀԿ-ականները:

Այդ միջադեպից, սակայն, ԲՀԿ-ում չեն հուսահատվել, ընդհակառակը՝ կուսակցությունն այս օրերին տենդագին պատրաստությունների մեջ է Երևանի ավագանու խորհրդի ընտրությունների հետ կապված և առաջիկա օրերին նախապատրաստում է է՛լ ավելի լայնամասշտաբ գրոհ: Ի դեպ, նիստին չհնչեցված հարցերից կառավարությունը մինչև վերջ չկարողացավ զերծ մնալ. պատգամավորները դրանք զետեղեցին իրենց ֆեյսբուքյան էջերում, այնտեղից էլ դրանք տարածվեցին լրատվամիջոցներով, այնպես որ, որքան էլ հաջողված, բայց և այնպես, երևի թե, ՀՀԿ-ին նման պրիմիտիվ տեխնոլոգիաներով այլևս դժվար կլինի խուսափել անցանկալի հարցերից:

Լուսինե Կեսոյան