Իմ արժանիքները չեն սահմանափակվում մանեքենությամբ. Անի Քոչար

Մայիսի 5-ին տեղի կունենան Երևանի ավագանու ընտրությունները: «Ժառանգության» կողմից ԿԸՀ ներկայացված 64 հոգանոց ցուցակի 10-րդ հորիզոնականում է լրագրող, «Ես Yes!» երիտասարդական ամսագրի գլխավոր խմբագիր, հրապարակախոս, հասարակական գործիչ Անի Քոչարը:

Lurer.com-ի թղթակիցը մի քանի հարց ուղղեց Անի Քոչարին Երևանի ավագանու ընտրություններում վերջինիս մասնակցության վերաբերյալ:

-Ձեր մասնակցությունը Երևանի ավագանու ընտրություններում արդեն իսկ խոսակցությունների առիթ դարձավ: Քննադատում են՝ թե մանեքենուհին ինչ գործ ունի Երևանի ավագանու ցուցակում։ Ինչպե՞ս եք վերաբերվում այդ քննադատություններին, և ինչպե՞ս եք պատկերացնում քաղաքային իշխանություններում ձեր ներկայությունը։

-Ինձ ճանաչող մարդիկ ճանաչում են որպես լրագրող, որպես հրապարակախոս և ավելի քան 13 տարի լրագրության մեջ եփված մարդ: Այն, որ երկրորդ մասնագիտությամբ մանեքենուհի եմ, դեռ չի նշանակում, որ իմ արժանիքները սահմանափակվում են դրանով: Ինչ վերաբերում է իմ ամսագրին, այն երիտասարդական ամսագիր է և արծարծում է նաև շոուբիզնեսային հարցեր. դա ևս չի նշանակում, որ այն անլուրջ հրատարակություն է, որովհետև «Ես Yes!»-ը մի հաջողված նախագիծ է, որն ավելի քան 7 տարի առաջատար է ամսագրային շուկայում:

Կարծում եմ՝ այնքան էլ պատահական չէ, որովհետև շոու-բիզնեսի մասին գրող բազմաթիվ ամսագրեր կան, և եթե հաջողության գաղտնիքը միայն շոու-բիզնեսը լիներ, հաջողակ կլինեին նաև մյուս ամսագրերը:

2000 թվականից զբաղվել եմ հաշմանդամություն ունեցող մարդկանց իրավունքների պաշտպանությամբ, մի շարք ՀԿ-ների անդամ և կամավոր եմ եղել, զուգահեռաբար զբաղվել եմ մանկատան երեխաների և հիվանդ երեխաների խնդիրներով։ Այնպես որ, այն մարդիկ, ովքեր փորձում են ինձ ներկայացնել միայն որպես մանեքենուհի և ստվեր գցել իմ մյուս գործունեությունների վրա, կարծում եմ՝ այդ ամենը միտումնավոր է արվում, և հասկանում եմ, թե ինչու:

Ես չեմ կարծում՝ մանեքենուհի լինելը ստվեր է գցում իմ մարդկային արժանիքների և որպես հանրային գործիչ ունեցածս իմիջի վրա։ Շատ բաներ կան, որ պարզապես չեմ բարձրաձայնում։ Տեսանելի է լինում, ինչը որ տեսանելի է: Այն ամենը, ինչ ես անում եմ որպես ակտիվ քաղաքացի, որպես հանրային դեմք, այդ մասին չեմ բարձրաձայնում: Կուզեք՝ համեստություն անվանեք, կուզեք՝ գաղտնիության սկզբունք:
Այն, որ ես աշխատում եմ որպես ժամանցային ամսագրի գլխավոր խմբագիր և մոդելային ասպարեզում, դեռ չի նշանակում, որ ես, դրանցից բացի, այլ աշխատանքով չեմ զբաղվում: Ես այժմ էլ աշխատում եմ որպես հասարակական կազմակերպության անդամ, նաև մանկատան սաների խնդիրներով զբաղվող կազմակերպության վարչության անդամ եմ:

-Ձեզ պատկերացնո՞ւմ եք քաղաքականության մեջ, և Ձեր առաջին քայլը ո՞րն է լինելու, ի՞նչ հարցեր եք բարձրացնելու։

-Ես պետք է ասեմ, որ քաղաքային իշխանությունների մեջ ընդգրկված լինելը միևնույն ժամանակ կապ ունի և՛ քաղաքականության հետ, և՛ ոչ: Դա այն ոլորտն է, որտեղ ակտիվ քաղաքացիները կարող են մասնակցություն ունենալ իրենց քաղաքի կառավարման գործերում։ Այն, որ ես ավագանու ցուցակում եմ, դեռ չի նշանակում՝ քաղաքականությամբ եմ զբաղվելու, կանեմ այն, ինչ մինչ օրս եմ արել, պարզապես՝ այլ հարթակում:

2000 թվականից սկսած՝ բարձրաձայնել եմ մեր քաղաքի համար խոցելի և ցավոտ հարցեր, որոնք ցավոք սրտի, մինչ օրս լուծում չեն գտել, համենայն դեպս, փորձում եմ ինչ-որ գործողություններ այդ ուղղությամբ անել: Օրինակ՝ հարց եմ բարձրացրել թափառող կենդանիների, քաղաքի անմատչելի միջավայրի, հաշմանդամություն ունեցող մարդկանց համար տարրական պայմանների բացակայության, ջրահեռացման, լուսավորման հետ կապված խնդիրները:

Մենք ատոմակայան ունեցող երկիր ենք, բայց մեր քաղաքի լուսավորությունն այնպիսին է, որ զբոսաշրջիկների առջև կարելի է պարզապես խայտառակ լինել: Ծայրամասերի և մարզերի մասին դեռ չեմ խոսում: Հարևան պետություններ գնում ես, ապշում ես լուսավորությունից, իսկ մեր քաղաքում շատ լավ գիտենք ինչու է նման լուսավորություն և որտեղ են գնում այդ գումարները: Նույնը՝ ճանապարհաշինարարության ոլորտում, ամեն ինչ կատարվում է նորմերի խախտմամբ, հազարապատիկ գումարների ստվերմամբ, արդյունքում՝ անորակ մի բան: Մեր քաղաքն այսօր այնքան խնդիրներ ունի, թվարկելը պարզապես անհնար է: Ես նշեցի կոնկրետ այն խնդիրները, որոնց բազմիցս անդրադարձել եմ:

Գոնե այն տարիներին, երբ կլինեմ քաղաքային իշխանության մի օղակում, իմ քաղաքի, իմ քաղաքի բնակիչների համար կփորձեմ անել առավելագույնը:

-Ի՞նչ եք կարծում՝ «Ժառանգության» ներկայացրած ցուցակը մրցունա՞կ է։

-Կարծում եմ՝ գնահատականը ես չէ, որ պետք է տամ, բայց զուտ իմ անձնական տեսակետով՝ շատ ազնիվ ցուցակ է կազմված: Այդ ցուցակը բավականին մրցունակ է՝ սկսած առաջին հորիզոնականը զբաղեցնող մարդուց։ Թեև ցուցակում ընդգրկված բոլոր անհատներին ծանոթ չեմ, բայց վտսահ եմ՝ «Ժառանգությունը», ինչպես միշտ, հավատարիմ է իր գործելաոճին և ընդգրկել է մարդկանց, ովքեր իսկապես ցանկանում են կամ փորձում են մի հանրօգուտ բան անել: Ես կարծում եմ՝ ժամանակը բոլոր հարցերի պատասխանը տալիս է:

«Ժառանգությունն» իր փոքրաթիվ պատգամավորներով միշտ ապացուցել է, որ իրենք աշխատում են և միշտ ժողովրդի կողքին են:

Նելլի Ավետիսյան