Սերժ Սարգսյանի վախերն ու ԲՀԿ ռեաբիլիտացիան

Վերջին շրջանում Հայաստանում միաժամանակ տեղի ունեցան բավականին մեծ թվով իրադարձություններ, որոնց հետևանքները մինչ այսօր չեն էլ դադարում անհանգստացնել հասարակությանը: Այդ իրադարձությունների կիզակետում ի սկզբանե հայտնվել էին Սերժ Սարգսյանն ու Գագիկ Ծառուկյանը։ Մի շրջան կար, երբ բոլոր խոսակցություններն ուղղված էին այս տանդեմին, սակայն այնուհետև իրավիճակը միակողմանիորեն փոխվեց՝ տանդեմից դուրս մնաց Գագիկ Ծառուկյանը, ում տեղն ակամայից զբաղեցրեց Րաֆֆի Հովհաննիսյանը:

Արդյունքում՝ Րաֆֆի Հովհաննիսյանը գրանցեց Սերժ Սարգսյանի համար անսպասելի արդյունք, որը թույլ տվեց անգամ Րաֆֆի Հովհաննիսյանին ստվեր գցել ապրիլի 9-ին կայանալիք երդմնակալության արարողության վրա. անգամ որոշում կայացվեց այդ արարողությունն անցկացնել Կարեն Դեմիրճյանի մարզահամերգային համալիրում։ Այս փաստը միանշանակ խոսում է այն մասին, որ այսօր Սերժ Սարգսյանը չի տիրապետում իրավիճակին ամբողջությամբ, համենայն դեպս, վաղվա, մյուս օրվա, ու մասնավորապես՝ ապրիլի 9-ի հետ կապված վախերն ու կասկածները դեռ թույլ չեն տալիս հանգիստ շունչ քաշել մերօրյա նախագահին:

Առաջին կանխարգելիչ քայլը իշխանությունների կատարմամբ ստացված էր, իսկ ահա մյուս քայլը, ըստ էության, իշխանությունների համար առաջիկայում լինելու է Ազատության հրապարակում տիրող ծայրահեղական մթնոլորտը լիցքաթափելը: Իսկ դա լավագույնս կարելի է անել, ոչ ավել ոչ պակաս, Երևանի ավագանու ընտրությունների միջոցով, այսինքն՝ նախ նախագահական ընտրությունների հարթակից պայքարի տեղափոխման ապահովում Երևանի ավագանու ընտրությունների հարթակ, այնուհետև՝ վերջնական հանգուցալուծում: Այս տարբերակը ամենաիրատեսականն է ՀՀԿ-ի շահերի տեսանկյունից:

Իսկ իշխանություններին այս գործընթացի բարեհաջող իրականացման համար նորից պետք է գալիս ԲՀԿ-ն, և ահա թե ինչու. սկզբում՝ դեռևս նախագահական ընտրություններից առաջ, պարզ էր, որ Հայաստանում ԲՀԿ-ն գրավել է վարկանշային բոլոր չարտերը պոպուլյարության տեսանկյունից, ուստի և տիրապետում է բավականին մեծ քվեների տոկոսի, իսկ ԲՀԿ-ի ինքնաբացարկից հետո տարիների ընթացքում կուտակած այդ ողջ պաշարը ստացավ Րաֆֆի Հովհաննիսյանը, սա թերևս գաղտնիք համարել չի կարելի։ Եվ ահա հենց այս խաղաքարտից և պետք է օգտվի ՀՀԿ-ն, այսինքն՝ Երևանի ավագանու ընտրություններում ՀՀԿ-ի՝ ամեն դեպքում թվեր նկարելու ֆոնի վրա կարող է ձևավորվել նոր ընդդիմություն կամ պազապես այսօրվա ընդդիմությունների վազքում շատ հնարավոր է հայտնվեն նոր ֆավորիտներ, մասնավորապես հենց ԲՀԿ-ն, որն այս սցերանի զարգացման դեպքում ևս կբավարարի իր շահերը: Այնպես, ինչպես ակամայից Րաֆֆի Հովհաննիսյանը հայտնվել է այս իրավիճակում, նույն կերպ էլ դուրս կգա այս իրավիճակից՝ իր տեղը թողնելով, ասենք օրինակ ԲՀԿ-ից Նաիրա Զոհրաբյանին, ով թերևս ո՛չ ձայնային տվյալներով է զիջում Րաֆֆի Հովհաննիսյանին, ո՛չ էլ հռետորության առումով։ Նաիրա Զոհրաբյանից բացի՝ կա նաև Վարդան Օսկանյան: Իսկ այս ռոտացիայի գրավական որպես այդպիսին, իհարկե, կդառնա այն բողոքի մեծ ալիքը, որը կառաջանա հերթական անգամ իշխանությունների հաղթանակից կամ թվեր նկարելուց հետո:

Այսպիսով՝ ՀՀԿ-ն դեռևս նախագահական ընտրություններում թույլ տված իր բացթողումները կլրացնի հերթական անգամ ԲՀԿ-ի ծրագրերի միջոցով, իսկ, որ ամենահետաքրքրականն է, այս ամենը տեղի կունենա երկրորդի կամքից անկախ կամ երկրորդի հետևում կանգնած ուղեղի կամքով, բայց այն, ամեն դեպքում, տեղի կունենա:

Գևորգ Ավետիսյան